ಇಂಧನ ದರ ಹೆಚ್ಚಿಸದಂತೆ ರೀಟೇಲರ್‌ಗಳಿಗೆ ಸೂಚನೆ

ಹೊಸದಿಲ್ಲಿ ; ಪೆಟ್ರೋಲ್‌ ಮತ್ತು ಡೀಸೆಲ್‌ನ ರೀಟೇಲ್‌ ದರಗಳನ್ನು ಹೆಚ್ಚಳ ಮಾಡದಂತೆ ಸರಕಾರಿ ಸ್ವಾಮ್ಯದ ಇಂಧನ ರಿಟೇಲ್‌ ಕಂಪನಿಗಳಿಗೆ ಕೇಂದ್ರ ಸರಕಾರವು ಸೂಚನೆ ನೀಡಿದೆ ಎಂದು ಮೂಲಗಳು ತಿಳಿಸಿವೆ.

ಜಾಗತಿಕ ಮಾರುಕಟ್ಟೆ ಪ್ರಭಾವದಿಂದ ಪೆಟ್ರೋಲ್‌ ಮತ್ತು ಡೀಸೆಲ್‌ ದರಗಳು ಏರಿಕೆಯಾಗಿವೆ. ಏತನ್ಮಧ್ಯೆ, ರೀಟೇಲ್‌ ದರಗಳನ್ನು ಹೆಚ್ಚಿಸಿ ಗ್ರಾಹಕರ ಮೇಲೆ ಇನ್ನಷ್ಟು ಹೊರೆ ಏರದಂತೆ ಸರಕಾರವು ಹೇಳಿದೆ. ಇಂಡಿಯನ್‌ ಆಯಿಲ್‌ ಕಾರ್ಪೊರೇಷನ್‌, ಭಾರತ್‌ ಪೆಟ್ರೋಲಿಯಂ ಕಾರ್ಪೊರೇಷನ್‌ ಮತ್ತು ಹಿಂದೂಸ್ಥಾನ್‌ ಪೆಟ್ರೋಲಿಯಂ ಕಾರ್ಪೊರೇಷನ್‌ ಸೇರಿದಂತೆ ಸರಕಾರಿ ಸ್ವಾಮ್ಯದ ಕಂಪನಿಗಳು ಪ್ರಸ್ತುತ ಲೀಟರ್‌ ಪೆಟ್ರೋಲ್‌ ಮತ್ತು ಡೀಸೆಲ್‌ಗೆ 1 ರೂ. ತನಕ ನಷ್ಟವನ್ನು ಅನುಭವಿಸುತ್ತಿವೆ. ''ಈ ಹೊರೆಯನ್ನು ಗ್ರಾಹಕರಿಗೆ ವರ್ಗಾಯಿಸಬೇಡಿ. ನಷ್ಟದ ಭಾಗವನ್ನು ನೀವೇ ಭರಿಸಬೇಕು,'' ಎಂದು ತೈಲ ಕಂಪನಿಗಳಿಗೆ ಸರಕಾರ ಹೇಳಿದೆ ಎನ್ನಲಾಗಿದೆ.

ಕೆಲವು ಕಂಪನಿಗಳು ಈ ಬಗ್ಗೆ ಪ್ರತಿಕ್ರಿಯಿಸಿಲ್ಲ. ಆದರೆ, ಎಚ್‌ಪಿಸಿಎಲ್‌ ತನಗೆ ಇಂಥ ಯಾವುದೇ ನಿರ್ದೇಶನ ಬಂದಿಲ್ಲ ಎಂದಿದೆ. ''ಕಚ್ಚಾ ತೈಲದ ದರ ಏರಿಕೆಯಿಂದ ಆದ ನಷ್ಟವನ್ನು ಕಂಪನಿಯೇ ಭರಿಸಬೇಕು ಎನ್ನುವಂಥ ಸೂಚನೆಗಳು ಸರಕಾರದಿಂದ ಬಂದಿಲ್ಲ,'' ಎಂದು ಎಚ್‌ಪಿಸಿಎಲ್‌ ಅಧ್ಯಕ್ಷರಾದ ಎಂ.ಕೆ.ಸುರಾನಾ ಹೇಳಿದ್ದಾರೆ.

ಈ ವರ್ಷ ಸರಣಿಯೋಪಾದಿಯಲ್ಲಿ ನಾನಾ ರಾಜ್ಯಗಳ ಚುನಾವಣೆ ನಡೆಯಲಿದ್ದು, ಜನರ ಬೆಂಬಲ ಗಳಿಸುವ ನಿಟ್ಟಿನಲ್ಲಿ ಇಂಧನ ದರ ಏರಿಕೆ ನಿಯಂತ್ರಿಸಲು ಕಸರತ್ತು ನಡೆದಿದೆ. ''ದೇಶವು ತನ್ನ ವಾರ್ಷಿಕ ಬೇಡಿಕೆ ಪೂರೈಸಲು ಶೇ.80ರಷ್ಟು ಕಚ್ಚಾ ತೈಲವನ್ನು ಆಮದು ಮಾಡಿಕೊಳ್ಳುತ್ತಿದೆ. ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ದರವು ಬ್ಯಾರೆಲ್‌ಗೆ 50 ಡಾಲರ್‌ಯಿದ್ದರೆ, ದೇಶದ ಆರ್ಥಿಕ ವ್ಯವಸ್ಥೆಯನ್ನು ಸಮರ್ಪಕವಾಗಿ ನಿಭಾಯಿಸಬಹುದು,'' ಎಂದು ಇಂಧನ ಸಚಿವ ಧರ್ಮೇಂದ್ರ ಪ್ರಧಾನ್‌ ಸಂದರ್ಶನವೊಂದರಲ್ಲಿ ಹೇಳಿದ್ದಾರೆ.

''ಇತ್ತೀಚಿನಜಿಎಸ್‌ಟಿ ದರಗಳ ಇಳಿಕೆಯಿಂದ ಸರಕಾರಕ್ಕೆ ಬರುತ್ತಿದ್ದ ಆದಾಯವು ಇಳಿಕೆಯಾಗಿದೆ. ಹೀಗಾಗಿ, ಅಬಕಾರಿ ಸುಂಕ ಕಡಿತದ ಸಾಧ್ಯತೆಗಳು ಇಲ್ಲ,'' ಎಂದು ಅಧಿಕಾರಿಗಳು ಅಭಿಪ್ರಾಯಪಟ್ಟಿದ್ದಾರೆ.

2014ರಂದು ಅಧಿಕಾರಕ್ಕೆ ಬಂದ ದಿನದಿಂದಲೂ ಮೋದಿ ಸರಕಾರವು ಕಚ್ಚಾ ತೈಲ ದರ ಇಳಿಕೆಯಿಂದ ಆದ ಹೆಚ್ಚಿನ ಲಾಭವನ್ನು ಪಡೆಯುತ್ತಲೇ ಬಂದಿದೆ. 2019ರಲ್ಲಿ ಲೋಕಸಭೆ ಚುನಾವಣೆ ಎದುರಾಗಲಿದ್ದು, ಇಂಧನ ದರ ಏರಿಕೆಯ ಸವಾಲು ಸರಕಾರದ ಮುಂದಿದೆ. 2016ರಲ್ಲಿ ಕಚ್ಚಾ ತೈಲದ ದರವು ಬ್ಯಾರೆಲ್‌ಗೆ 27.1 ಡಾಲರ್‌ಗೆ ಇಳಿದಿತ್ತು. ಬ್ರೆಂಟ್‌ ಕಚ್ಚಾ ತೈಲದ ದರ ಈಗ 70 ಡಾಲರ್‌ ಮಟ್ಟದಲ್ಲಿದೆ.

===

ತೈಲ ಏರಿಕೆ, ಷೇರು ಕುಸಿತ

ಮಧ್ಯಪ್ರಾಚ್ಯ ಮತ್ತು ಸಿರಿಯಾದಲ್ಲಿನ ತಲ್ಲಣಗಳಿಂದಾಗಿ ಜಾಗತಿಕ ಮಟ್ಟದಲ್ಲಿ ಕಚ್ಚಾ ತೈಲದ ದರ ಏರಿಕೆಯಾಗಿದೆ. ಸೋಮವಾರ ಬ್ರೆಂಟ್‌ ಕಚ್ಚಾ ತೈಲವು ಬ್ಯಾರೆಲ್‌ಗೆ 67 ಡಾಲರ್‌ಯಿದ್ದರೆ, ಈಗ ಅದು 70.77 ಡಾಲರ್‌ ಮುಟ್ಟಿದೆ. ಬ್ರೆಂಟ್‌ ಕಚ್ಚಾ ತೈಲದ ದರ 4 ವರ್ಷಗಳ ಗರಿಷ್ಠ ಮಟ್ಟಕ್ಕೆ ಏರಿಕೆಯಾಗಿದ್ದು, ಇದರಿಂದ ತೈಲ ಕಂಪನಿಗಳ ಷೇರುಗಳು ಕುಸಿದಿವೆ. ಎಚ್‌ಪಿಸಿಎಲ್‌, ಬಿಪಿಸಿಎಲ್‌, ಐಒಸಿ ಕಂಪನಿಗಳ ಷೇರುಗಳು ಶೇ.8ರ ತನಕ ನಷ್ಟ ಅನುಭವಿಸಿವೆ. ಇಂಡಿಯನ್‌ ಆಯಿಲ್‌ನ ಷೇರುಗಳು ಶೇ.7.6ರಷ್ಟು ಕುಸಿದಿವೆ. 2016ರ ನವೆಂಬರ್‌ನಿಂದ ಈಚೆಗೆ ಇದೇ ಗರಿಷ್ಠ ಕುಸಿತ. ಎಚ್‌ಪಿಸಿಎಲ್‌ ಸಹ ಶೇ.8.3ರಷ್ಟು ನಷ್ಟ ಅನುಭವಿಸಿದೆ.