ಕಪ್ಪು ಹಣ: ಸ್ವಿಸ್‌ ಬ್ಯಾಂಕ್‌ನಿಂದ 2ನೇ ಪಟ್ಟಿ ಸ್ವೀಕರಿಸಿದ ಭಾರತ

ಹೊಸದಿಲ್ಲಿ: ಸ್ವಿಸ್‌ ಬ್ಯಾಂಕ್‌ ಖಾತೆಗಳ ವಿವರಗಳನ್ನು ಒಳಗೊಂಡ ಎರಡನೇ ಪಟ್ಟಿಯನ್ನು(2ನೇ ಸೆಟ್‌) ಭಾರತ ಸರಕಾರವು ಪಡೆದುಕೊಂಡಿದೆ. ಸ್ವಿಜರ್ಲೆಂಡ್‌ನಿಂದ ಅಲ್ಲಿನ ಬ್ಯಾಂಕ್‌ಗಳಲ್ಲಿನ ಭಾರತೀಯ ಖಾತೆದಾರರ ವಿವರಗಳು ಸ್ವಯಂಚಾಲಿತ ಮಾಹಿತಿ ವಿನಿಮಯ ಒಪ್ಪಂದದ (ಸ್ವಯಂಚಾಲಿತ ಮಾಹಿತಿ ವಿನಿಮಯ ಚೌಕಟ್ಟು) ಅನ್ವಯ ಭಾರತಕ್ಕೆ ರವಾನೆಯಾಗಿವೆ.

ಸ್ಜಿಜರ್ಲೆಂಡ್‌ನ ಫೆಡರಲ್‌ ಟ್ಯಾಕ್ಸ್‌ ಅಡ್ಮಿನಿಸ್ಪ್ರೇಷನ್‌ (ಎಫ್‌ಟಿಎ) ಬಿಡುಗಡೆ ಮಾಡಿದ ಪತ್ರಿಕಾ ಪ್ರಕಟಣೆಯಲ್ಲಿ ಸುಮಾರು 31 ಲಕ್ಷ ಖಾತೆಗಳ ಮಾಹಿತಿಯನ್ನು 86 ದೇಶಗಳೊಂದಿಗೆ ಹಂಚಿಕೊಳ್ಳಲಾಗಿದೆ ಎಂದು ತಿಳಿಸಲಾಗಿದೆ. ಆದರೆ, ಭಾರತದ ಬಗ್ಗೆ ಯಾವುದೇ ಪ್ರತ್ಯೇಕ ಮಾಹಿತಿ ನೀಡಿಲ್ಲ.

ಕೇಂದ್ರ ಸರಕಾರವು ಕಪ್ಪು ಹಣದ ವಿರುದ್ಧ ಪ್ರಾರಂಭಿಸಿದ ಅಭಿಯಾನದಲ್ಲಿ ಈ ಬೆಳವಣಿಗೆಯು ಮಹತ್ವದ ಭಾಗವಾಗಿದೆ. ಸ್ವಿಸ್‌ ಬ್ಯಾಂಕ್‌ನ ಮೊದಲ ಪಟ್ಟಿಯು 2019ರ ಸೆಪ್ಟೆಂಬರ್‌ನಲ್ಲಿ ಭಾರತಕ್ಕೆ ಸಿಕ್ಕಿತ್ತು. ಸ್ವಿಜರ್ಲೆಂಡ್‌ನಿಂದ ಮಾಹಿತಿ ವಿನಿಮಯ ಮಾಡಿಕೊಳ್ಳುವ 86 ದೇಶಗಳಲ್ಲಿ ಭಾರತವೂ ಒಂದಾಗಿದೆ.