ಎಲ್ಪಿಜಿ ಬಳಕೆಯಲ್ಲಿ ಭಾರತ 'ಉಜ್ವಲ'; ವಿಶ್ವದಲ್ಲೇ ನಂ.2ಕ್ಕೆ ಜಿಗಿತ

ಹೊಸದಿಲ್ಲಿ : ಬಡ ಕುಟುಂಬಗಳಿಗೆ ಉಚಿತ ಅಡುಗೆ ಅನಿಲ ಸಂಪರ್ಕ ಕಲ್ಪಿಸುವ ಉಜ್ವಲ ಯೋಜನೆಯ ಅನೂಹ್ಯ ಯಶಸ್ಸಿನ ಬೆನ್ನಲ್ಲೇ, ಭಾರತ ವಿಶ್ವದಲ್ಲಿಯೇ ಎರಡನೇ ಅತಿ ಹೆಚ್ಚು ಎಲ್ಪಿಜಿ ಬಳಸುತ್ತಿರುವ ರಾಷ್ಟ್ರವಾಗಿ ಹೊರಹೊಮ್ಮಿದೆ.

ಸ್ವಚ್ಛ ಇಂಧನವೆಂಬ ಹೆಗ್ಗಳಿಕೆಗೆ ಪಾತ್ರವಾಗಿರುವ ಅಡುಗೆ ಅನಿಲ ಎಲ್‌ಪಿಜಿಯ ವಿತರಣೆಯು ಉಜ್ವಲ ಯೋಜನೆಯ ಜಾರಿಯ ನಂತರ ಶರವೇಗದಲ್ಲಿ ಏರಿದೆ.

2014ರಲ್ಲಿ ಭಾರತದ ಶೇ.55 ಭಾಗದಲ್ಲಿ ಎಲ್ಪಿಜಿ ಸೌಲಭ್ಯ ಇದ್ದಿದ್ದರೆ, ಈಗ ಶೇ.90ರಷ್ಟು ಭಾಗದಲ್ಲಿ ಆವರಿಸಿದೆ ಎಂದು ಪೆಟ್ರೋಲಿಯಂ ಸಚಿವಾಲಯ ತಿಳಿಸಿದೆ.

ಪ್ರಧಾನಿ ಮೋದಿ ನೇತೃತ್ವದ ಎನ್‌ಡಿಎ ಸರಕಾರ 2014ರಿಂದ ಇಲ್ಲಿಯವರೆಗೆ 12.5 ಕೋಟಿಗೂ ಅಧಿಕ ಅಡುಗೆ ಅನಿಲ ಸಂಪರ್ಕ ಒದಗಿಸಿದೆ. ಇದರಲ್ಲಿ 6 ಕೋಟಿ ಸಂಪರ್ಕ ಉಜ್ವಲ ಯೋಜನೆಯ ಅಡಿಯಲ್ಲಿದ್ದು, ಬಡ ಮಹಿಳೆಯರಿಗೆ ನೆರವಾಗಿದೆ. ಹೀಗಾಗಿ ಇದರ ಗುರಿಯನ್ನು 8 ಕೋಟಿಗೆ ಏರಿಸಲಾಗುತ್ತಿದೆ ಎಂದು ತೈಲ ಸಚಿವ ಧರ್ಮೇಂದ್ರ ಪ್ರಧಾನ್‌ ತಿಳಿಸಿದ್ದಾರೆ.