ಭಾರತದಲ್ಲಿ ಮಿಲಿಯನೇರ್‌ಗಳ ಸಂಖ್ಯೆಯಲ್ಲಿ ಶೇ.20 ಏರಿಕೆ

ಹೊಸದಿಲ್ಲಿ : ಜಿಎಸ್‌ಟಿ ಜಾರಿಯ ಆರಂಭಿಕ ಅಡೆತಡೆಗಳ ಹೊರತಾಗಿಯೂ, ಭಾರತದಲ್ಲಿ 2017ರಲ್ಲಿ ಡಾಲರ್‌ ಲೆಕ್ಕದಲ್ಲಿ ಮಿಲಿಯನೇರ್‌ಗಳ ಸಂಖ್ಯೆಯಲ್ಲಿ ಶೇ.20ರಷ್ಟು ಏರಿಕೆಯಾಗಿದೆ. ಅವರ ಸಂಪತ್ತು ಕೂಡ ವೃದ್ಧಿಸಿದೆ ಎಂದು ವರದಿಯಾಗಿದೆ.

ಭಾರತದಲ್ಲಿ ಕಳೆದ ವರ್ಷ ಮಿಲಿಯನೇರ್‌ಗಳ ಸಂಖ್ಯೆ 2.63 ಲಕ್ಷಕ್ಕೆ ಏರಿಕೆಯಾಗಿದೆ. ಈ ಸಿರಿವಂತರ ಒಟ್ಟು ಆಸ್ತಿಯ ಮೌಲ್ಯದಲ್ಲೂ ಶೇ.21 ಹೆಚ್ಚಳವಾಗಿದ್ದು, 1 ಲಕ್ಷ ಕೋಟಿ ಡಾಲರ್‌ಗೂ (68 ಲಕ್ಷ ಕೋಟಿ ರೂ.) ಮೀರಿದೆ.

''ಭಾರತ ವಿಶ್ವದಲ್ಲಿಯೇ ಅತ್ಯಂತ ವೇಗವಾಗಿ ಬೆಳೆಯುತ್ತಿರುವ ಮಾರುಕಟ್ಟೆ'' ಎಂದು ಫ್ರಾನ್ಸ್‌ ಮೂಲದ ತಂತ್ರಜ್ಞಾನ ಕಂಪನಿ ಕೇಪ್‌ಜೆಮಿನಿ ಹೇಳಿದೆ.

ಅಮೆರಿಕ, ಜಪಾನ್‌, ಜರ್ಮನಿ ಮತ್ತು ಚೀನಾ ವಿಶ್ವದಲ್ಲಿಯೇ ಅತಿ ಹೆಚ್ಚು ಮಿಲಿಯನೇರ್‌ಗಳನ್ನು (ಎಚ್‌ಎನ್‌ಐ) ಒಳಗೊಂಡಿರುವ ಇತರ ದೇಶಗಳಾಗಿವೆ. ಎಚ್‌ಎನ್‌ಐ ಎಂದರೆ 10 ಲಕ್ಷ ಡಾಲರ್‌ಗೂ ಹೆಚ್ಚು ಹೂಡಿಕೆ ಮಾಡಬಲ್ಲಷ್ಟು ಸಂಪತ್ತು ಹೊಂದಿರುವ ವ್ಯಕ್ತಿ ಎಂದರ್ಥ.

ಕಾರಣವೇನು?

2017ರಲ್ಲಿ ಕಂಪನಿಗಳ ಷೇರುಗಳ ಮೌಲ್ಯದಲ್ಲಿ ಭಾರಿ ಏರಿಕೆಯಾಗಿರುವುದು ಸಿರಿವಂತರ ಸಂಪತ್ತಿನ ಹೆಚ್ಚಳಕ್ಕೆ ಮುಖ್ಯ ಕಾರಣವಾಗಿದೆ. ರಿಯಾಲ್ಟಿ ದರದಲ್ಲಿ ಶೇ.4.8 ಏರಿಕೆ, ಜಿಡಿಪಿ ಶೇ.6.7ಕ್ಕೆ ವಿಸ್ತರಣೆ ಕೂಡ ಸಕಾರಾತ್ಮಕ ಪ್ರಭಾವ ಬೀರಿದೆ.

ಜಿಎಸ್‌ಟಿಯಿಂದ ಸಿರಿವಂತರ ಸಂಪತ್ತಿನ ಮೇಲೆ ನಕಾರಾತ್ಮಕ ಪರಿಣಾಮ ಬೀರಿದ್ದರೂ, ಅದು ತಾತ್ಕಾಲಿಕವಾಗಿತ್ತು ಎಂದು ಕೇಪ್‌ಜೆಮಿನಿ ವರದಿ ತಿಳಿಸಿದೆ.