ಚೀನಾಕ್ಕೆ ಆಟಾಟೋಪಕ್ಕೆ ಬ್ರೇಕ್‌, ಭಾರತಕ್ಕೆ ಬರಲಿದೆ ಅತ್ಯಾಧುನಿಕ ಎಂಕ್ಯೂ-9ಬಿ ಡ್ರೋನ್‌

ಹೊಸದಿಲ್ಲಿ: ವಾಸ್ತವ ಗಡಿ ನಿಯಂತ್ರಣ ರೇಖೆ, ಹಿಂದೂ ಮಹಾಸಾಗರದಲ್ಲಿ ಚೀನಾದ ಕಿತಾಪತಿ ಹತ್ತಿಕ್ಕಲು ಅತ್ಯಾಧುನಿಕ ತಂತ್ರಜ್ಞಾನದ ಎಂಕ್ಯೂ-9ಬಿ ಡ್ರೋನ್‌ ಖರೀದಿಗೆ ಭಾರತ ಸರಕಾರ ಮುಂದಾಗಿದೆ. ಅಮೆರಿಕಾದೊಂದಿಗೆ ಈ ಸಂಬಂಧ ಪ್ರಾಥಮಿಕ ಹಂತದ ಮಾತುಕತೆಗಳು ನಡೆದಿದ್ದು, ಎಲ್ಲವೂ ಅಂದುಕೊಂಡಂತೆ ನಡೆದರೆ 22 ಸಾವಿರ ಕೋಟಿ ರೂ. (ಸುಮಾರು 3 ಬಿಲಿಯನ್‌ ಡಾಲರ್‌) ಮೊತ್ತದ 30 ಡ್ರೋನ್‌ಗಳು ಭಾರತದ ಸೇನಾಪಡೆ ಸೇರಲಿವೆ.ಚೀನಾದ ಗಡಿ ತಂಟೆ ಹೆಚ್ಚುತ್ತಿರುವುದರಿಂದ ವಾಸ್ತವ ನಿಯಂತ್ರಣ ರೇಖೆ ಮೇಲೆ ಹದ್ದಿನ ಕಣ್ಗಾವಲು ಇರಿಸಲು ಅಮೆರಿಕದ ಅತ್ಯಾಧುನಿಕ ತಂತ್ರಜ್ಞಾನದ ಎಂಕ್ಯೂ-9ಬಿ ಡ್ರೋನ್‌ ಖರೀದಿಗೆ ರಕ್ಷಣಾ ಇಲಾಖೆ ಮುಂದಾಗಿದೆ ಎಂದು ಹೇಳಲಾಗಿದೆ.

ಆದರೆ, ಭಾರತ ಸರಕಾರದ ಖರೀದಿ ವ್ಯವಹಾರದ ಬಗ್ಗೆ ಡ್ರೋನ್‌ ತಯಾರಿಸುವ ಅಮೆರಿಕದ ರಕ್ಷಣಾ ಸಾಮಗ್ರಿ ಉತ್ಪಾದಕ ಸಂಸ್ಥೆ 'ಮೇಜರ್‌ ಜನರಲ್‌ ಅಟಾಮಿಕ್‌' ನಿರಾಕರಿಸಿದೆ. ಈ ಸಂಬಂಧ ರಕ್ಷಣಾ ಹಾಗೂ ವಿದೇಶಾಂಗ ಇಲಾಖೆ ಸಚಿವರ ನಡುವೆ ನಡೆಯುವ ಮಾತುಕತೆ ಬಳಿಕ ಡ್ರೋನ್‌ ಖರೀದಿ ಕುರಿತು ಸ್ಪಷ್ಟ ನಿರ್ಧಾರ ಹೊರ ಬೀಳಲಿದೆ ಎಂದು ಹೇಳಿದೆ.


ಭಾರತದ ನೌಕಾ ಪಡೆಯಲ್ಲಿ ಈಗಾಗಲೇ ಎಂಕ್ಯೂ-9 ಬಿ ಡ್ರೋನ್‌ ಬಳಕೆಯಾಗುತ್ತಿದೆ. 2020ರಲ್ಲೇ ಎರಡು ಡ್ರೋನ್‌ಗಳು ಒಂದು ವರ್ಷದ ಅವಧಿಗೆ ಗುತ್ತಿಗೆ ಆಧಾರದ ಮೇಲೆ ನೌಕಾಸೇನೆಯಲ್ಲಿ ಬಳಕೆಯಾಗುತ್ತಿದ್ದು, ಹಿಂದೂ ಮಹಾಸಾಗರದಲ್ಲಿ ಚೀನಾ ಯುದ್ಧ ನೌಕೆಯ ಮೇಲೆ ಹದ್ದಿನ ಕಣ್ಣಿಟ್ಟಿವೆ. ಈಗಾಗಲೇ ಡ್ರೋನ್‌ ಗುತ್ತಿಗೆಯನ್ನು ಮತ್ತೊಂದು ಅವಧಿಗೆ ವಿಸ್ತರಿಸಲಾಗಿದೆ.

ದಿಲ್ಲಿಯಲ್ಲಿ ಭಾರತ್ ಡ್ರೋನ್‌ ಉತ್ಸವಕ್ಕೆ ಚಾಲನೆ: ಉತ್ಪಾದನೆ, ಬಳಕೆ, ಹೂಡಿಕೆಗೆ ಆದ್ಯತೆ ಎಂದ ನರೇಂದ್ರ ಮೋದಿ
ಏನಿದು ಎಂಕ್ಯೂ-9ಬಿ ಡ್ರೋನ್‌?

ಸುಧಾರಿತ ಅತ್ಯಾಧುನಿಕ ತಂತ್ರಜ್ಞಾನವನ್ನು ಈ ಡ್ರೋನ್‌ಗಳು ಹೊಂದಿದೆ. ಎಂಕ್ಯೂ-9 ಡ್ರೋನ್‌ನ ಸುಧಾರಿತ ರೂಪಾಂತರವೇ ಎಂಕ್ಯೂ-9ಬಿ ಡ್ರೋನ್‌ ಆಗಿದೆ. ಅಫ್ಘಾನಿಸ್ತಾನದ ಕಾಬೂಲ್‌ನಲ್ಲಿ ವಿಶ್ವದ ಮೋಸ್ಟ್‌ ವಾಂಟೆಡ್‌ ಉಗ್ರ, ಅಲ್‌ಕೈದಾ ಮುಖ್ಯಸ್ಥ ಅಯ್ಮನ್‌ ಅಲ್‌ ಜವಾಹಿರಿ ಹತ್ಯೆಗೆ ಇದೇ ಡ್ರೋನ್‌ ಬಳಕೆಯಾಗಿತ್ತು. ಶತ್ರುಗಳ ಕಣ್ತಪ್ಪಿಸಿ ಮುನ್ನುಗ್ಗಿ ಹೋಗಿ ಗುರಿ ಸಾಧಿಸುವ ಶಕ್ತಿಯನ್ನು ಈ ಡ್ರೋನ್‌ ಹೊಂದಿದೆ. ರಿಮೋಟ್‌ ಮೂಲಕವೇ ಆಗಸದಲ್ಲಿ 35 ಗಂಟೆಗಳ ಕಾಲ ಈ ಡ್ರೋನ್‌ ಹಾರಟ ನಡೆಸಬಲ್ಲದು.

ತೀಕ್ಷ್ಣ ಒಳನೋಟ ಹಾಗೂ 20ಕ್ಕೂ ಹೆಚ್ಚು ವಲಯಗಳ ವಿಸ್ತೃತ ಮಾಹಿತಿ ಒಳಗೊಂಡ 'ಎಕನಾಮಿಕ್ ಟೈಮ್ಸ್' ವಿಶೇಷ ಲೇಖನಗಳಿಗಾಗಿ ಈಗಲೇ ಸಬ್‌ಸ್ಕ್ರೈಬ್ ಆಗಿ.