ಚೀನಾದಲ್ಲಿ ಭಾರತದ ಕಸ್ಟಮ್ಸ್‌ ಇಂಟಲಿಜೆನ್ಸ್‌ ಅಧಿಕಾರಿಗಳ ನೇಮಕ

ಹೊಸದಿಲ್ಲಿ: ಕಾಳಧನ ನಿಗ್ರಹಕ್ಕೆ ಸಂಬಂಧಿಸಿದಂತೆ ದೇಶದ ಆಚೆಯೂ ಕೇಂದ್ರ ಸರಕಾರ ಕಣ್ಣಿಟ್ಟಿದೆ. ವ್ಯವಹಾರ ಆಧಾರಿತ ಕಾಳಧನ ವರ್ಗಾವಣೆ ಮತ್ತು ಇತರೆ ಹಣಕಾಸು ವಂಚನೆಗಳ ಪತ್ತೆ ಹಚ್ಚುವ ನಿಟ್ಟಿನಲ್ಲಿ ಚೀನಾದಲ್ಲಿ ಕಸ್ಟಮ್ಸ್‌ ಇಂಟಲಿಜೆನ್ಸ್‌ ಅಧಿಕಾರಿಗಳನ್ನು ನೇಮಕ ಮಾಡಲು ಸರಕಾರ ನಿರ್ಧರಿಸಿದೆ.

ಸಾಗರೋತ್ತರ ಕಸ್ಟಮ್ಸ್‌ ಗುಪ್ತಚರ ಜಾಲದಲ್ಲಿ(ಸಿಒಐಎನ್‌) ಎರಡು ಹುದ್ದೆಗಳನ್ನು ಸೃಷ್ಟಿಸಲಾಗುವುದು. ಬೀಜಿಂಗ್‌ನಲ್ಲಿರುವ ಭಾರತೀಯ ರಾಯಭಾರ ಕಚೇರಿ ಮತ್ತು ಗುವಾಂಗ್‌ಜೋದಲ್ಲಿನ ಕಾನ್ಸುಲೇಟ್‌ ಜನರಲ್‌ ಆಫ್‌ ಇಂಡಿಯಾದಲ್ಲಿ ಈ ಇಬ್ಬರು ಗುಪ್ತಚರ ಅಧಿಕಾರಿಗಳನ್ನು ಭಾರತ ನಿಯೋಜಿಸಲಿದೆ. ಅಧಿಕಾರಿಗಳ ಆಯ್ಕೆ ಪ್ರಕ್ರಿಯೆಯನ್ನು ಹಣಕಾಸು ಸಚಿವಾಲಯ ಈಗಾಗಲೇ ಆರಂಭಿಸಿದೆ ಎಂದು ಅಧಿಕಾರಿಗಳು ಭಾನುವಾರ ತಿಳಿಸಿದ್ದಾರೆ.

ಹೆಚ್ಚಿನ ಸಂಖ್ಯೆಯಲ್ಲಿ ಸೀಮಾ ಸುಂಕಗಳ ವಂಚನೆಗಳು ಮತ್ತು ಕಳ್ಳ ಸಾಗಣೆ ಪ್ರಕರಣಗಳನ್ನು ಕಂದಾಯ ಗುಪ್ತಚರ ನಿರ್ದೇಶನಾಲಯದ(ಡಿಆರ್‌ಐ) ಪತ್ತೆ ಹಚ್ಚಿದೆ. ವಾಣಿಜ್ಯ ವ್ಯವಹಾರ ಆಧಾರಿತ ಕಾಳ ಧನ ವರ್ಗಾವಣೆ ಮತ್ತು ಇತರೆ ಹಣಕಾಸಿನ ವಂಚನೆಗಳ ಹಿನ್ನೆಲೆಯಲ್ಲಿ ಕಸ್ಟಮ್ಸ್‌ ಗುಪ್ತಚರ ಅಧಿಕಾರಿಗಳನ್ನು ನಿಯೋಜಿಸಲಾಗುತ್ತಿದೆ. ಈ ಅಧಿಕಾರಿಗಳು, ಭಾರತೀಯ ಅಧಿಕಾರಿಗೊಂದಿಗೆ ಮಾಹಿತಿಯನ್ನು ವಿನಿಮಯ ಮಾಡಿಕೊಳ್ಳಲಿದ್ದಾರೆ.