ಭಾರತಕ್ಕೆ ವಿದೇಶಗಳಿಂದ ಹಣ ಪಾವತಿ ಅಧಿಕ

ವಾಷಿಂಗ್ಟನ್‌ : ಭಾರತಕ್ಕೆ ಈ ವರ್ಷ ಕೂಡ ವಿದೇಶಗಳಲ್ಲಿ ನೆಲೆಸಿರುವ ಭಾರತೀಯರು ಹೆಚ್ಚಿನ ಪ್ರಮಾಣದಲ್ಲಿ ಹಣ ರವಾನಿಸಿದ್ದಾರೆ. ವಿದೇಶಗಳಿಂದ ಹಣ ಸ್ವೀಕೃತಿಯಲ್ಲಿ ಭಾರತವು ಚೀನಾವನ್ನೂ ಹಿಂದಿಕ್ಕಿದ್ದು, ಅಗ್ರಸ್ಥಾನದಲ್ಲಿದೆ.

ವಿಶ್ವಬ್ಯಾಂಕ್‌ ವರದಿಯ ಪ್ರಕಾರ, ವಿದೇಶಗಳಲ್ಲಿ ನೆಲೆಸಿರುವ ಭಾರತೀಯರು ಈ ವರ್ಷ 8000 ಕೋಟಿ ಡಾಲರ್‌ ಹಣವನ್ನು ಕಳಿಸಿದ್ದಾರೆ. (ಅಂದಾಜು 5.6 ಲಕ್ಷ ಕೋಟಿ ರೂ.)

ಭಾರತದ ನಂತರ ಚೀನಾಕ್ಕೆ ಅತಿ ಹೆಚ್ಚು ಹಣ ರವಾನೆಯಾಗಿದೆ. (6700 ಕೋಟಿ ಡಾಲರ್‌) ಮೆಕ್ಸಿಕೊ (3400 ಕೋಟಿ ಡಾಲರ್‌) ಮತ್ತು ಫಿಲಿಪ್ಪೀನ್ಸ್‌ (3400 ಕೋಟಿ ಡಾಲರ್‌) ನಂತರದ ಸ್ಥಾನದಲ್ಲಿದೆ. ಕಳೆದ ವರ್ಷ ಕೂಡ ಭಾರತ ಮೊದಲ ಸ್ಥಾನದಲ್ಲಿತ್ತು. ಹೀಗಿದ್ದರೂ, 2019ರಲ್ಲಿ ಅಭಿವೃದ್ಧಿ ಹೊಂದಿದ ದೇಶಗಳ ಆರ್ಥಿಕತೆಯೂ ಮಂದಗತಿಯಲ್ಲಿ ಮುಂದುವರಿಯುವ ನಿರೀಕ್ಷೆ ಇದ್ದು, ಹಣ ರವಾನೆಯೂ ಶೇ.4.3ರಷ್ಟು ಇಳಿಕೆಯಾಗುವ ಸಾಧ್ಯತೆ ಇದೆ.ತೈಲ ದರ ಇಳಿಮುಖವಾಗಿರುವುದರಿಂದ ಕೊಲ್ಲಿ ರಾಷ್ಟ್ರಗಳಿಗೆ ಜನರ ವಲಸೆ ಕೂಡ ಕಡಿಮೆಯಾಗುತ್ತಿದೆ. ಇದು ಕೂಡ ಹಣ ರವಾನೆಯ ಇಳಿಕೆಗೆ ಕಾರಣವಾಗಲಿದೆ.

2018ರಲ್ಲಿ ಅಭಿವೃದ್ಧಿಶೀಲ ರಾಷ್ಟ್ರಗಳಿಗೆ ಹಣದ ರವಾನೆ ಶೇ.10.8ರಷ್ಟು ವೃದ್ಧಿಸುವ ನಿರೀಕ್ಷೆ ಇದೆ. ದಕ್ಷಿಣ ಏಷ್ಯಾದ ಬಹುತೇಕ ರಾಷ್ಟ್ರಗಳಿಗೆ ವಿದೇಶಗಳಿಂದ ಹಣ ರವಾನೆಯಲ್ಲಿ ಏರಿಕೆಯಾಗಿದೆ. ಬಾಂಗ್ಲಾದೇಶ, ಪಾಕಿಸ್ತಾನಕ್ಕೂ ವೃದ್ಧಿಸಿದೆ.