ಕೊರೊನಾ ಮಧ್ಯೆ 2.26 ಲಕ್ಷ ಕೋಟಿ ರೂ. ಹೂಡಿಕೆ ಗಳಿಸಿದ ಭಾರತೀಯ ಕಂಪನಿಗಳು

ಹಾಂಕಾಂಗ್‌/ಬೆಂಗಳೂರು: ಭಾರತದ ಆರ್ಥಿಕತೆಯ ಮಂದಗತಿಯ ನಡುವೆಯೂ, ಕೋವಿಡ್‌ ಆಪತ್ತಿನ ಮಧ್ಯೆಯೂ ದೇಶದ ಕಾರ್ಪೋರೇಟ್‌ ವಲಯದ ಕಂಪನಿಗಳು ಈ ವರ್ಷ ಇದುವರೆಗೆ ದಾಖಲೆಯ 31 ಶತಕೋಟಿ ಡಾಲರ್‌ಗಳಷ್ಟು (ಅಂದಾಜು 2.26 ಲಕ್ಷ ಕೋಟಿ ರೂ.) ಹೂಡಿಕೆಯನ್ನು ಗಳಿಸುವಲ್ಲಿ ಯಶಸ್ವಿಯಾಗಿವೆ.

ಏಪ್ರಿಲ್‌-ಜೂನ್‌ ತ್ರೈಮಾಸಿಕದಲ್ಲಿ ಜಿಡಿಪಿ ಮೈನಸ್‌ ಶೇಕಡಾ 23.9ರಷ್ಟು ಕುಸಿದಿತ್ತು. ಹೀಗಿದ್ದರೂ, ಹೂಡಿಕೆಗೆ ಕೊರತೆಯಾಗಿಲ್ಲ ಎನ್ನುವುದು ಗಮನಾರ್ಹ.

ಬ್ಯಾಂಕ್‌ಗಳು 13.68 ಶತಕೋಟಿ ಡಾಲರ್‌ ಹೂಡಿಕೆಯನ್ನು ಗಳಿಸಿವೆ. ಇಂಧನ ಮತ್ತು ವಿದ್ಯುತ್‌ ವಲಯದ ಕಂಪನಿಗಳು 7.05 ಶತಕೋಟಿ ಡಾಲರ್‌, ಕನ್‌ಸ್ಯೂಮರ್‌ ಪ್ರಾಡಕ್ಸ್ಟ್‌ ವಲಯದ ಕಂಪನಿಗಳು 3.41 ಶತಕೋಟಿ ಡಾಲರ್‌ ಹೂಡಿಕೆ ಗಳಿಸಿವೆ.

ಉದ್ಯಮಿ ಮುಕೇಶ್‌ ಅಂಬಾನಿ ನೇತೃತ್ವದ ರಿಲಯನ್ಸ್‌ ಇಂಡಸ್ಟ್ರೀಸ್‌ 7 ಶತಕೋಟಿ ಡಾಲರ್‌ ಹೂಡಿಕೆಯನ್ನು ಜೂನ್‌ನಲ್ಲಿ ಗಳಿಸುವಲ್ಲಿ ಯಶಸ್ವಿಯಾಗಿದೆ. ಇದರೊಂದಿಗೆ ರಿಲಯನ್ಸ್‌ ಇಂಡಸ್ಟ್ರೀಸ್‌ ಸಾಲ ಮುಕ್ತವಾಗಿದೆ. ಇದೀಗ ಫ್ಯೂಚರ್‌ ಗ್ರೂಪ್‌ನ ರಿಟೇಲ್‌ ಬಿಸಿನೆಸ್‌ ವಿಭಾಗವನ್ನು ರಿಲಯನ್ಸ್‌ ಖರೀದಿಸುತ್ತಿದೆ.

ರಿಯಲ್‌ ಎಸ್ಟೇಟ್‌ ಕಂಪನಿಗಳೂ ಹೂಡಿಕೆಯನ್ನು ಹೆಚ್ಚಿಸಲು ಮುಂದಾಗಿವೆ. ಕೇಂದ್ರ ಸರಕಾರ ಇತ್ತೀಚೆಗೆ ಘೋಷಿಸಿದ ನೆರವಿನ ಪ್ಯಾಕೇಜ್‌ ಪರಿಣಾಮ ವ್ಯವಸ್ಥೆಯಲ್ಲಿ ನಗದು ಹರಿವು ಹೆಚ್ಚಲಿದ್ದು, ಮುಂಬರುವ ತಿಂಗಳುಗಳಲ್ಲಿ ಕಂಪನಿಗಳ ಹೂಡಿಕೆ ಹೆಚ್ಚಳಕ್ಕೂ ಕಾರಣವಾಗಲಿದೆ ಎಂದು ಸಿಟಿಗ್ರೂಪ್‌ ಇಂಡಿಯಾದ ಬ್ಯಾಂಕಿಂಗ್‌ ವಿಭಾಗದ ಮುಖ್ಯಸ್ಥ ರವಿ ಕಪೂರ್‌ ತಿಳಿಸಿದ್ದಾರೆ.

ವಿದೇಶಿ ಹೂಡಿಕೆದಾರರು ಭಾರತೀಯ ಕಂಪನಿಗಳ ಷೇರುಗಳನ್ನು, ಈಕ್ವಿಟಿಗಳನ್ನು ವ್ಯಾಪಕವಾಗಿ ಖರೀದಿಸುತ್ತದ್ದಾರೆ. ಜೂನ್‌-ಆಗಸ್ಟ್‌ ಅವಧಿಯಲ್ಲಿ ವಿದೇಶಿ ಹೂಡಿಕೆದಾರರು 10.3 ಶತಕೋಟಿ ಡಾಲರ್‌ ಮೌಲ್ಯದ ಹೂಡಿಕೆಯನ್ನು ಮಾಡಿದ್ದಾರೆ.