ತೈಲ ದರ ಜಿಗಿತ: ರೂಪಾಯಿ 67ಕ್ಕೆ ಕುಸಿತ

ಮುಂಬಯಿ: ಡಾಲರ್‌ ಎದುರು ರೂಪಾಯಿ ಮೌಲ್ಯ ಸೋಮವಾರ 67.13ಕ್ಕೆ ದಿಢೀರ್‌ ಕುಸಿತಕ್ಕೀಡಾಯಿತು. ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ತೈಲ ದರ ಏರಿಕೆಯಾಗುತ್ತಿದ್ದು, ಇದರ ಪರಿಣಾಮ ರೂಪಾಯಿ ಮೌಲ್ಯ ತಗ್ಗಿದೆ.

ಪ್ರತಿ ಬ್ಯಾರೆಲ್‌ ತೈಲದ ದರ 75 ಡಾಲರ್‌ಗೆ ವೃದ್ಧಿಸಿದ್ದು, ಕರೆನ್ಸಿ ಮೌಲ್ಯದಲ್ಲಿ ಇಳಿಕೆಗೆ ಕಾರಣವಾಯಿತು. ಆಮದುದಾರರು ಹೆಚ್ಚೆಚ್ಚು ಡಾಲರ್‌ಗಳನ್ನು ಖರೀದಿಸಿದರು. ಇದು ರೂಪಾಯಿ ಮೇಲೆ ತೀವ್ರ ಒತ್ತಡ ಸೃಷ್ಟಿಸಿತು.

ದಿನದ ಆರಂಭದಲ್ಲಿಯೇ ಮುಗ್ಗರಿಸಿದ ರೂಪಾಯಿ ಒಂದು ಹಂತದಲ್ಲಿ 67.18ಕ್ಕೆ ಕುಸಿಯಿತು. ಅಂತಿಮವಾಗಿ 26 ಪೈಸೆ ಕುಸಿದು 67.13ಕ್ಕೆ ಸ್ಥಿರವಾಯಿತು.

ಕಳೆದ 15 ತಿಂಗಳುಗಳಲ್ಲಿಯೇ ಇದು ರೂಪಾಯಿಯ ಗರಿಷ್ಠ ಮಟ್ಟದ ಇಳಿಕೆಯಾಗಿದೆ. 2017ರ ಫೆಬ್ರವರಿ 8ರಂದು ರೂಪಾಯಿ ಮೌಲ್ಯ ಈ ಮಟ್ಟದಲ್ಲಿತ್ತು. ಜಾಗತಿಕ ಮಾರುಕಟ್ಟೆಯಲ್ಲಿ ಇತ್ತೀಚೆಗೆ ಕಚ್ಚಾ ತೈಲ ದರ ಜಿಗಿಯುತ್ತಿದ್ದು, ಭಾರತದ ಕಳವಳಕ್ಕೆ ಕಾರಣವಾಗುವ ಲಕ್ಷಣ ಕಾಣಿಸುತ್ತಿದೆ. ಭಾರತ ಅತಿ ದೊಡ್ಡ ತೈಲ ಆಮದುದಾರ ರಾಷ್ಟ್ರಗಳಲ್ಲೊಂದಾಗಿದ್ದು, ತೈಲ ದರ ಏರಿಕೆಯಿಂದ ವಿತ್ತೀಯ ಕೊರತೆ ಹೆಚ್ಚುತ್ತದೆ. ಹೆಚ್ಚು ಮೊತ್ತದ ಬಂಡವಾಳ ಹೊರ ಹೋಗುತ್ತದೆ.

2014ರ ಕೊನೆಯ ಭಾಗದ ನಂತರ ಇದೇ ಮೊದಲ ಬಾರಿಗೆ ತೈಲ ದರ ಗಣನೀಯ ಏರಿಕೆ ದಾಖಲಿಸಿದೆ. ಮತ್ತೊಂದು ಕಡೆ ಷೇರು ಮಾರುಕಟ್ಟೆಯಲ್ಲೂ ವಿದೇಶಿ ಹೂಡಿಕೆದಾರರು ಹೂಡಿಕೆ ಹಿಂತೆಗೆದುಕೊಂಡ ಪರಿಣಾಮ ರೂಪಾಯಿ ಮೇಲೆ ಸೋಮವಾರ ಒತ್ತಡ ಬೀರಿತು. ಏಪ್ರಿಲ್‌ನಲ್ಲಿ ವಿದೇಶಿ ಹೂಡಿಕೆದಾರರು ಭಾರತೀಯ ಷೇರು ಮಾರುಕಟ್ಟೆಯಿಂದ 15,500 ಕೋಟಿ ರೂ. ಬಂಡವಾಳವನ್ನು ಹಿಂತೆಗೆದುಕೊಂಡಿದ್ದರು.

ದಿನ ಬಳಕೆಯ ವಸ್ತು ತುಟ್ಟಿ?

ಭಾರತ ತನ್ನ ತೈಲದ ಬೇಡಿಕೆಯನ್ನು ಪೂರೈಸಲು ಆಮದನ್ನೇ ನಂಬಿದೆ. ತೈಲ ದರ ಏರಿಕೆಯಾಗಿ, ಡಾಲರ್‌ ಎದುರು ರೂಪಾಯಿ ಕುಸಿದರೆ, ದಿನ ಬಳಕೆಯ ಹಲವು ಉತ್ಪನ್ನಗಳ ದರಗಳು ಏರಿಕೆಯಾಗುವ ಸಾಧ್ಯತೆ ಇದೆ.

ಸೋಪ್‌, ಡಿಟರ್ಜೆಂಟ್‌, ಶ್ಯಾಂಪೂ ಇತ್ಯಾದಿ ಡಿಟರ್ಜೆಂಟ್‌ಗಳು ಕಚ್ಚಾ ತೈಲದ ಜತೆ ಸಂಬಂಧ ಹೊಂದಿದ್ದು, ತೈಲ ದರ ಏರಿಕೆಯಿಂದ ಇವುಗಳೂ ತುಟ್ಟಿಯಾಗಬಹುದು. ಔಷದ, ರಸಗೊಬ್ಬರ, ಎಲೆಕ್ಟ್ರಿಕ್‌ ಸಾಧನಗಳು, ಗಣಿಗಾರಿಕೆ, ಅಲ್ಯುಮಿನಿಯಂ, ಕೀಟನಾಶಕ, ಜ್ಯುವೆಲ್ಲರಿ, ಪ್ಲಾಸ್ಟಿಕ್‌ ಉತ್ಪನ್ನಗಳ ಬೆಲೆ ಏರಿಕೆ ಸಾಧ್ಯತೆ ಇದೆ. ಇವುಗಳ ತಯಾರಿಕೆಗೆ ಬಲಸುವ ಕಚ್ಚಾ ವಸ್ತುಗಳು ರೂಪಾಯಿಯ ಅಪಮೌಲ್ಯದ ಪರಿಣಾಮ ತುಟ್ಟಿಯಾದೀತು. ಆದರೆ ರೂಪಾಯಿ ಬೆಲೆ ಇಳಿಕೆ ರಫ್ತು ಆಧಾರಿತ ಐಟಿ ಉದ್ದಿಮೆಗೆ ಅನುಕೂಲಕರ.