3 ವರ್ಷದಲ್ಲಿ 15 ಪಟ್ಟು ಹೆಚ್ಚಿದ ಮೊಬೈಲ್‌ ಡೇಟಾ ಬಳಕೆ

ಹೊಸದಿಲ್ಲಿ: ಅಗ್ಗದ ದರದಲ್ಲಿ ಸ್ಮಾರ್ಟ್‌ಫೋನ್ ಹಾಗೂ ಇಂಟರ್‌ನೆಟ್ ಲಭ್ಯವಾಗುತ್ತಿರುವ ಕಾರಣ ಭಾರತೀಯರು ಹಿಂದೆಂದಿಗಿಂತಲೂ ಹೆಚ್ಚು ಡೇಟಾ ಬಳಸುತ್ತಿದ್ದಾರೆ. ಕಳೆದ ಮೂರು ವರ್ಷಕ್ಕೆ ಹೋಲಿಸಿದರೆ, ಡೇಟಾ ಬಳಕೆಯ ಪ್ರಮಾಣ 15 ಪಟ್ಟು ಹೆಚ್ಚಾಗಿದೆಯಂತೆ.

2014ರ ಅಂತ್ಯದಲ್ಲಿ ಒಬ್ಬ ವ್ಯಕ್ತಿಯ ಮಾಸಿಕ ಸರಾಸರಿ ಡೇಟಾ ಬಳಕೆ ಕೇವಲ 0.26 ಜಿಬಿಯಾಗಿದ್ದು, 2017ರ ಅಂತ್ಯದ ವೇಳೆಗೆ ಈ ಪ್ರಮಾಣ 4 ಜಿಬಿಗೆ ಹೆಚ್ಚಳವಾಗಿದೆ ಎಂದು ಅಂಕಿಅಂಶಗಳು ತಿಳಿಸುತ್ತಿವೆ.

ಕಡಿಮೆ ದರದಲ್ಲಿ ವೇಗದ ಇಂಟರ್‌ನೆಟ್ ಲಭ್ಯವಾಗುತ್ತಿದೆ ಎಂದು ಡೇಟಾ ಬಳಕೆ ಹೆಚ್ಚಳವಾಗುತ್ತಿಲ್ಲ. ಬದಲಿಗೆ ಸ್ಮಾರ್ಟ್‌ಫೋನ್‌ಗಳಿಗೆ ಲಭ್ಯವಿರುವ ಕಂಟೆಂಟ್‌ಗಳ ಹೆಚ್ಚಳದಿಂದ ಡೇಟಾ ಬಳಕೆ ಗಣನೀಯವಾಗಿ ಏರುತ್ತಿದೆ ಎಂದು ವಿಶ್ಲೇಷಿಸಲಾಗಿದೆ.

ಬಹುತೇಕ ಬಳಕೆದಾರರು ಆನ್‌ಲೈನ್‌ ವೀಡಿಯೋಗಳನ್ನು ಸ್ಮಾರ್ಟ್‌ಫೋನ್ ಮೂಲಕವೇ ವೀಕ್ಷಿಸುತ್ತಾರೆ. ಮಾಧ್ಯಮ ವಿಶ್ಲೇಷಣಾ ಸಂಸ್ಥೆಯಾದ ಕಾಮ್‌ಸ್ಕೋರ್ ನಡೆಸಿದ ಅಧ್ಯಯನದ ಪ್ರಕಾರ, ಶೇ.89ರಷ್ಟು ಭಾರತೀಯರು ಸ್ಮಾರ್ಟ್‌ಫೋನ್ ಹಾಗೂ ಟ್ಯಾಬ್‌ಗಳ ಮೂಲಕವೇ ಇಂಟರ್‌ನೆಟ್ ಬಳಸುತ್ತಾರೆ. ಇದು ಇಂಟರ್‌ನೆಟ್ ಬಳಕೆಯ ಸಿಂಹಪಾಲು ಎಂದು ತಿಳಿಸಿದೆ.

2014ರಲ್ಲಿ 269 ರೂಪಾಯಿ ಇದ್ದ ಒಂದು ಜಿಬಿ 4G ಡೇಟಾ ಬೆಲೆ, ಸದ್ಯ 19 ರೂಪಾಯಿಗೆ ಇಳಿಕೆಯಾಗಿದೆ. ‌ರಿಲಯನ್ಸ್ ಜಿಯೋ ಮಾರುಕಟ್ಟೆಗೆ ಲಗ್ಗೆ ಇಟ್ಟ ಬಳಿಕ ಪ್ರತಿಸ್ಪರ್ಧಿ ನೆಟ್‌ವರ್ಕ್‌ಗಳಾದ ಏರ್‌ಟೆಲ್, ವೋಡಾಫೋನ್, ಐಡಿಯಾ ಮತ್ತು ಬಿಎಸ್‌ಎನ್‌ಎಲ್‌ಗಳು ಸಹ ತಮ್ಮ 4ಜಿ ನೆಟ್‌ವರ್ಕ್‌ನ್ನು ವಿಸ್ತರಿಸಿದ್ದು, ಗ್ರಾಹಕರನ್ನು ಕಾಯ್ದುಕೊಳ್ಳುವ ಉದ್ದೇಶದಿಂದ ಬೆಲೆ ಕಡಿತ ಸೂತ್ರ ಅನುಸರಿಸಿದ್ದವು.

ಯೂಟ್ಯೂಬ್, ಗಾನಾ ಮತ್ತು ಹಾಟ್‌ಸ್ಟಾರ್ ಸೇರಿದಂತೆ ಅನೇಕ್ ಸ್ಟ್ರೀಮಿಂಗ್ ಸೇವೆಗಳಿಗೆ ವೈರ್‌ಲೆಸ್ ಡೇಟಾ ಹೆಚ್ಚು ಬಳಕೆಯಾಗುತ್ತಿದ್ದು, ನೆಟ್‌ಫ್ಲಿಕ್ಸ್ ಹಾಗೂ ಅಮೆಜಾನ್ ಸೇರಿದಂತೆ ಅನೇಕರು ಸ್ಥಳೀಯ ಭಾಷೆಗಳಲ್ಲಿ ಸೇವೆ ನೀಡಲು ಪ್ರಾರಂಭಿಸಿದ್ದವು.