ಶೀಘ್ರದಲ್ಲೇ ಬರಲಿದೆ ಚಿಪ್‌ ಆಧಾರಿತ ಇ-ಪಾಸ್‌ಪೋರ್ಟ್: ಹೇಗಿರಲಿದೆ ಇದು?

ಹೊಸದಿಲ್ಲಿ: ಭಾರತೀಯ ನಾಗರಿಕರು ಶೀಘ್ರದಲ್ಲೇ ಚಿಪ್ ಆಧಾರಿತ ಇ- ಪಾಸ್‌ಪೋರ್ಟ್‌ಗೆ ಅರ್ಜಿ ಸಲ್ಲಿಸಬಹುದಾಗಿದೆ. ಈಗಾಗಲೇ ಇ-ಪಾಸ್‌ಪೋರ್ಟ್‌ ಉತ್ಪಾದನೆಗಾಗಿ ಖರೀದಿ ಪ್ರಕ್ರಿಯೆ ನಡೆಯುತ್ತಿದೆ" ಎಂದು ಕೇಂದ್ರ ವಿದೇಶಾಂಗ ಸಚಿವ ಎಸ್. ಜೈಶಂಕರ್ ತಿಳಿಸಿದ್ದಾರೆ.

ದೇಶದಲ್ಲಿ ಚಿಪ್ ಒಳಗೊಂಡ ಇ-ಪಾಸ್‌ಪೋರ್ಟ್ ಜಾರಿ ಮಾಡುವುದರಿಂದ ಭದ್ರತಾ ವ್ಯವಸ್ಥೆಯನ್ನು ಮತ್ತಷ್ಟು ಬಲಪಡಿಸಿದಂತೆ ಆಗುತ್ತದೆ. ವಿದೇಶಾಂಗ ವ್ಯವಹಾರಗಳ ಇಲಾಖೆಯು ಇ-ಪಾಸ್‌ಪೋರ್ಟ್‌ಗೆ ಆದ್ಯತೆ ನೀಡಲು ನಿರ್ಧರಿಸಿದ್ದು, ಸುಧಾರಿತ ಭದ್ರತಾ ವೈಶಿಷ್ಟ್ಯಗಳನ್ನು ಒಳಗೊಂಡ ಪ್ರವಾಸಿ ದಾಖಲೆಯನ್ನು ನೀಡಲಾಗುವುದು ಎಂದು ಸಚಿವ ಜೈಶಂಕರ್‌ ಅವರು ತಿಳಿಸಿದರು.

114 ದೇಶಗಳಲ್ಲಿ ಇ-ಪಾಸ್‌ಪೋರ್ಟ್‌ ಜಾರಿ:

ವಿಶ್ವದ 114 ದೇಶಗಳಲ್ಲಿ ಇ-ಪಾಸ್‌ಪೋರ್ಟ್‌ ವ್ಯವಸ್ಥೆ ಹೊಂದಿವೆ. ಅಂದರೆ, ವಿಶ್ವಸಂಸ್ಥೆಯ ಸದಸ್ಯ ರಾಷ್ಟ್ರಗಳ (193) ಅರ್ಧಕ್ಕಿಂತ ಹೆಚ್ಚು ರಾಷ್ಟ್ರಗಳು ಇ-ಪಾಸ್‌ಪೋರ್ಟ್‌ ವ್ಯವಸ್ಥೆ ಹೊಂದಿದಂತಾಗಿದೆ.

ಬ್ಯಾಹ್ಯಾಕಾಶದ ಖಾಸಗೀಕರಣಕ್ಕೆ ಸಂಪುಟ ಅಸ್ತು: ಹೊಸ ಮಂಡಳಿ ರಚನೆಗೆ ನಿರ್ಧಾರ!

ಏನಿದು ಇ-ಪಾಸ್‌ಪೋರ್ಟ್‌?
ಅರ್ಜಿದಾರರ ಎಲ್ಲ ವೈಯಕ್ತಿಕ ಮಾಹಿತಿಗಳನ್ನು ಡಿಜಿಟಲ್‌ ಸೈನ್‌ ಮಾಡಿಸಿ ಚಿಪ್‌ನಲ್ಲಿ ಸಂಗ್ರಹಿಸಲಾಗುತ್ತದೆ. ಒಂದೊಮ್ಮೆ ಯಾರಾದರೂ ಚಿಪ್‌ನ್ನು ಟ್ಯಾಂಪರ್‌ ಮಾಡಲು ಮುಂದಾದರೆ, ಅದು ತಕ್ಷಣ ಗೊತ್ತಾಗುತ್ತದೆ ಮತ್ತು ಪಾಸ್‌ಪೋರ್ಟ್‌ ದೃಢೀಕರಣ ವಿಫಲವಾಗುತ್ತದೆ. ಹಾಗಂತ ಇದರ ಮಾಹಿತಿಯನ್ನು ಯಾರು ಬೇಕಾದರೂ ಓದಲು ಸಾಧ್ಯವಿಲ್ಲ. ಅದಕ್ಕೆ ಪಾಸ್‌ವರ್ಡ್‌ ಇರಲೇಬೇಕು. ಇದನ್ನು ಬಯೋಮೆಟ್ರಿಕ್‌ ಪಾಸ್‌ಪೋರ್ಟ್‌ ಎಂದೂ ಕರೆಯಲಾಗುತ್ತದೆ.

ಸಹಕಾರ ಬ್ಯಾಂಕುಗಳು ಆರ್‌ಬಿಐ ಉಸ್ತುವಾರಿಗೆ: ಸುಗ್ರೀವಾಜ್ಞೆಗೆ ಕೇಂದ್ರ ಸಂಪುಟ ನಿರ್ಧಾರ!

ಹಿಂದಿನದಕ್ಕಿಂತ ಹೇಗೆ ಭಿನ್ನ?

• 1. ಇ-ಪಾಸ್‌ಪೋರ್ಟ್‌ನ ಎದುರು ಮತ್ತು ಹಿಂಬದಿಯಲ್ಲಿ ದಪ್ಪನೆಯ ಹೊದಿಕೆ ಇರುತ್ತದೆ.
• 2. ಹಿಂದಿನ ಕವಚದಲ್ಲಿ ಅಂಚೆ ಸ್ಟಾಂಪ್‌ಗಿಂತಲೂ ಸಣ್ಣದಾದ ಸಿಲಿಕಾನ್‌ ಚಿಪ್‌ ಇರುತ್ತದೆ. ಅದಕ್ಕೆ ಒಂದು ಆಯತಾಕಾರದ ಆ್ಯಂಟೆನಾದ ಸಂಪರ್ಕವಿರುತ್ತದೆ.
• 3. ಚಿಪ್‌ ರೀಡ್‌ ಆಗಲು ಕೆಲವೇ ಸೆಕೆಂಡ್‌ಗಳು ಸಾಕು. ಹೀಗಾಗಿ ವಲಸೆ ಕೇಂದ್ರಗಳಲ್ಲಿ ಸಮಯದ ಉಳಿತಾಯವಾಗುತ್ತದೆ.
• 4. ಇದರ ಸಾಫ್ಟ್‌ ವೇರನ್ನು ಐಐಟಿ ಕಾನ್ಪುರ್‌ ಮತ್ತು ರಾಷ್ಟ್ರೀಯ ಮಾಹಿತಿ ಕೇಂದ್ರ(ಎನ್‌ಐಸಿ)ದಲ್ಲಿ ಅಭಿವೃದ್ಧಿಪಡಿಸಲಾಗಿದ್ದು, ಯಾವುದೇ ಬಾಹ್ಯ ಏಜೆನ್ಸಿ ಭಾಗಿಯಾಗಿಲ್ಲ.
• 5. ಚಿಪ್‌ನಲ್ಲಿ 64 ಕಿಲೋಬೈಟ್‌ನಷ್ಟು ಸ್ಮರಣೆ ಅವಕಾಶವಿದ್ದು, 30 ಪ್ರಯಾಣ ಮತ್ತು ಅಂತಾರಾಷ್ಟ್ರೀಯ ಪ್ರವಾಸ ವಿವರಗಳನ್ನು ದಾಖಲಿಸಿಕೊಳ್ಳುತ್ತದೆ.
• 6. ಚಿಪ್‌ನಲ್ಲಿ ವ್ಯಕ್ತಿಯ ಭಾವಚಿತ್ರ ಮತ್ತು ಬೆರಳಚ್ಚನ್ನೂ ಹೊಂದಿಸಲಾಗುತ್ತದೆ.
• 7. ಇದರ ಮೊದಲ ಪರೀಕ್ಷೆಯನ್ನು ಅಮೆರಿಕ ಸರಕಾರದ ಪ್ರಯೋಗಾಲಯದಲ್ಲಿ ನಡೆಸಲಾಗಿದೆ.