ಭಾರತದ ಆರ್ಥಿಕ ಬೆಳವಣಿಗೆ ಭವಿಷ್ಯ ಉಜ್ವಲ: ಐಎಂಎಫ್‌

ವಾಷಿಂಗ್ಟನ್‌ : ಭಾರತದ ಆರ್ಥಿಕ ಬೆಳವಣಿಗೆಯ ಭವಿಷ್ಯ ಉಜ್ವಲವಾಗಿದೆ ಎಂದು ಅಂತಾರಾಷ್ಟ್ರೀಯ ಹಣಕಾಸು ಸಂಸ್ಥೆ (ಐಎಂಎಫ್‌) ವಿಶ್ವಾಸ ವ್ಯಕ್ತಪಡಿಸಿದೆ.

ಕಚ್ಚಾ ತೈಲದ ದರ ಏರಿಕೆ, ಹಣದುಬ್ಬರ ನಿಯಂತ್ರಣಕ್ಕೆ ಕಠಿಣ ವಿತ್ತೀಯ ನೀತಿ ಹಾಗೂ ಜಾಗತಿಕ ಆರ್ಥಿಕ ಬಿಕ್ಕಟ್ಟಿನ ಹಿನ್ನೆಲೆಯಲ್ಲಿ ಐಎಂಎಫ್‌, ಭಾರತದ 2018-19ರ ಆರ್ಥಿಕ ಬೆಳವಣಿಗೆಯ ಮುನ್ನೋಟವನ್ನು, ಕಳೆದ ಏಪ್ರಿಲ್‌ಗೆ ಹೋಲಿಸಿದರೆ ಕೊಂಚ ಇಳಿಸಿದೆ. ಇಷ್ಟಾಗಿಯೂ, ದೇಶದ ಪ್ರಗತಿ ಅಭಾದಿತವಾಗಿದ್ದು, ವಿಶ್ವದಲ್ಲಿಯೇ ಅತ್ಯಂತ ವೇಗವಾಗಿ ಬೆಳೆಯುತ್ತಿರುವ ಆರ್ಥಿಕತೆ ಎಂಬ ಹೆಗ್ಗಳಿಕೆಯನ್ನು ಉಳಿಸಿಕೊಂಡಿದೆ ಎಂದು ಸ್ಪಷ್ಟವಾಗಿ ಹೇಳಿದೆ.

ಭಾರತದ ಆರ್ಥಿಕ ಬೆಳವಣಿಗೆ 2018ರಲ್ಲಿ ಶೇ.7.3 ಹಾಗೂ 2019ರಲ್ಲಿ ಶೇ.7.5ಕ್ಕೆ ಏರಿಕೆಯಾಗಲಿದೆ ಎಂದು ಐಎಂಎಫ್‌ ಅಂದಾಜಿಸಿದೆ. ಕಳೆದ ಏಪ್ರಿಲ್‌ನ ಮುನ್ನೋಟವನ್ನು ಹೋಲಿಸಿದರೆ, ಅನುಕ್ರಮವಾಗಿ ಶೇ.0.1 ಮತ್ತು ಶೇ.0.3ರ ಅಲ್ಪ ಇಳಿಕೆ ಮಾಡಿದೆ.

''ದೇಶದ ಆರ್ಥಿಕ ಪ್ರಗತಿ ಭವಿಷ್ಯದಲ್ಲಿ ಚುರುಕಾಗಲಿದೆ. ಸದ್ಯಕ್ಕೆ ಮಂದಗತಿಯಲ್ಲಿದ್ದರೂ, ಪ್ರಬಲವಾಗಲಿದೆ'' ಎಂದು ಐಎಂಎಫ್‌ನ ಸಂಶೋಧನಾ ವಿಭಾಗದ ಎಕನಾಮಿಕ್‌ ಕೌನ್ಸೆಲರ್‌, ಮೌರಿಸ್‌ ಒಬಸ್ಟ್‌ಫೆಲ್ಡ್‌ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದ್ದಾರೆ.

''ಭಾರತ ತೈಲವನ್ನು ಆಮದು ಮಾಡಿಕೊಳ್ಳುವುದರಿಂದ ಅದರ ದರ ಏರಿಕೆ ಪ್ರಭಾವ ಬೀರುತ್ತಿದೆ. ಜಾಗತಿಕ ಹಣಕಾಸು ಪರಿಸ್ಥಿತಿ ಕೂಡ ಪರಿಣಾಮ ಸದ್ಯಕ್ಕೆ ಕೊಂಚ ಹಿನ್ನಡೆಗೆ ಕಾರಣವಾಗಿದೆ'' ಎಂದು ಅವರು ಹೇಳಿದರು. ಈ ವರ್ಷ ಹಾಗೂ ಮುಂದಿನ ವರ್ಷ ವಿಶ್ವದ ಒಟ್ಟಾರೆ ಆರ್ಥಿಕ ಬೆಳವಣಿಗೆಯ ದರ ಶೇ.3.9 ಆಗಿರಲಿದೆ. ಹೀಗಿದ್ದರೂ, ಜಾಗತಿಕ ಮಟ್ಟದಲ್ಲಿ ವಾಣಿಜ್ಯ ಬಿಕ್ಕಟ್ಟು, ಸಂಘರ್ಷ , ರಾಜಕೀಯ ಅನಿಶ್ಚಿತತೆ ಉಲ್ಬಣಿಸಿದರೆ ಆರ್ಥಿಕ ಬೆಳವಣಿಗೆಯ ಮೇಲೂ ನಕಾರಾತ್ಮಕ ಪ್ರಭಾವ ಉಂಟಾಗಲಿದೆ ಎಂದು ಐಎಂಎಫ್‌ ಎಚ್ಚರಿಸಿದೆ.

ಐಎಂಎಫ್‌ ಚೀನಾಕ್ಕೆ ಈ ವರ್ಷ ಶೇ.6.6 ಹಾಗೂ 2019ಕ್ಕೆ ಶೇ.6.4ರ ಆರ್ಥಿಕ ಬೆಳವಣಿಗೆಯನ್ನು ಅಂದಾಜಿಸಿದೆ. ಅಮೆರಿಕಕ್ಕೆ ಈ ವರ್ಷ ಶೇ.2.9 ಮತ್ತು 2019ಕ್ಕೆ ಶೇ.2.7ರ ಅಂದಾಜು ನೀಡಿದೆ. ಯುರೋಪ್‌ ವಲಯಕ್ಕೆ ಆರ್ಥಿಕ ಬೆಳವಣಿಗೆಯ ಅಂದಾಜನ್ನು ಶೇ.2.2 ಮತ್ತು ಶೇ.1.9ಕ್ಕೆ ಕಡಿತಗೊಳಿಸಿದೆ.