ವಿಮಾನಯಾನಕ್ಕೆ ಹೆಚ್ಚಿದ ಬೇಡಿಕೆ, ಇಂಡಿಗೊದ 1000 ವಿಮಾನಗಳ ಹಾರಾಟ ಶುರು

ಹೊಸದಿಲ್ಲಿ: ಇಂಡಿಗೊ ಏರ್‌ಲೈನ್ಸ್‌ 65 ಸ್ಥಳಗಳಿಂದ 1,000 ವಿಮಾನಗಳ ಹಾರಾಟವನ್ನು ಮಂಗಳವಾರದಿಂದ ಆರಂಭಿಸಿದೆ. 59 ದೇಶಿ ಮತ್ತು 6 ಅಂತಾರಾಷ್ಟ್ರೀಯ ತಾಣಗಳಿಗೂ ವಿಮಾನ ಹಾರಾಟ ಆರಂಭಿಸಿದೆ.

ಕೋವಿಡ್‌-19 ಗೆ ಮುನ್ನ ಏರ್‌ಲೈನ್‌ ನಿತ್ಯ 1,500 ವಿಮಾನ ಹಾರಾಟವನ್ನು ನಿರ್ವಹಿಸುತ್ತಿತ್ತು. ಎಲ್ಲ ಬಗೆಯ ಮುಂಜಾಗರೂಕತಾ ಕ್ರಮಗಳನ್ನು ಕೈಗೊಂಡು ಹಾರಾಟವನ್ನು ವ್ಯವಸ್ಥೆಗೊಳಿಸಲಾಗಿದೆ ಎಂದು ಏರ್‌ಲೈನ್‌ ವಕ್ತಾರರು ತಿಳಿಸಿದ್ದಾರೆ.

"ದೇಶಿ ಹಾಗೂ ಅಂತಾರಾಷ್ಟ್ರೀಯ ವಿಮಾನ ಹಾರಾಟ ಲಾಕ್‌ಡೌನ್‌ ನಂತರ ಶೂನ್ಯಕ್ಕಿಳಿದಿತ್ತು. ಆದರೆ ಈಗ ನಿತ್ಯ 1,000ಕ್ಕೆ ಹಾರಾಟ ಏರಿಕೆಯಾಗಿದೆ. ಪ್ರಯಾಣಿಕರಿಗೆ ಸುರಕ್ಷಿತ ಪ್ರಯಾಣದ ಅನುಭವ ನೀಡಲು ಶ್ರಮಿಸಲಾಗಿದೆ. ವಿಮಾನ ಪ್ರಯಾಣಕ್ಕೆ ಬೇಡಿಕೆಯೂ ವೃದ್ಧಿಸಿದೆ. ಕೋವಿಡ್‌-19 ಪೂರ್ವ ಅವಧಿಯ ಸುಮಾರು ಶೇ.70ರಷ್ಟು ಮಟ್ಟಕ್ಕೆ ನಾವೀಗ ವಿಮಾನ ಹಾರಾಟಗಳನ್ನು ನಡೆಸುತ್ತಿದ್ದೇವೆ" ಎಂದು ಇಂಡಿಗೊದ ಸಿಇಒ ರಂಜೊಯ್‌ ದತ್ತಾ ಹೇಳಿದ್ದಾರೆ.

ಕೊರೊನಾ: ಭಾರತ - ಸೌದಿ ಅರೇಬಿಯಾ ನಡುವಿನ ವಿಮಾನಯಾನಕ್ಕೆ ನಿಷೇಧ ಹೇರಿದ ಸೌದಿ ಸರಕಾರ
ಇಂಡಿಗೊ 2020ರ ಮೇ 25 ಮತ್ತು ನವೆಂಬರ್‌ 11ರ ನಡುವೆ 1 ಲಕ್ಷ ವಿಮಾನ ಹಾರಾಟವನ್ನು ನಿರ್ವಹಿಸಿತ್ತು. ಕೇಂದ್ರ ನಾಗರಿಕ ವಿಮಾನಯಾನ ಇಲಾಖೆ ಇತ್ತೀಚೆಗೆ ದೇಶಿ ಏರ್‌ಲೈನ್ಸ್‌ಗಳಿಗೆ ತಮ್ಮ ಚಟುವಟಿಕೆಗಳನ್ನು 60-70 ಪರ್ಸೆಂಟ್‌ ವೃದ್ಧಿಸಲು ಅನುಮತಿ ನೀಡಿತ್ತು. ಇದರಿಂದಾಗಿ ನಷ್ಟದಲ್ಲಿದ್ದ ಏರ್‌ಲೈನ್‌ಗಳಿಗೆ ಭರವಸೆ ಮೂಡಿದಂತಾಗಿದೆ.

ಲಂಡನ್‌ಗೆ ಏರ್‌ ಇಂಡಿಯಾ ನೇರ ವಿಮಾನ

ಏರ್‌ ಇಂಡಿಯಾ 2021ರ ಜನವರಿಯಿಂದ ಚೆನ್ನೈ ಮತ್ತು ಲಂಡನ್‌ ನಡುವೆ ನೇರ ವಿಮಾನ ಹಾರಾಟವನ್ನು ಆರಂಭಿಸಲಿದೆ. ಪ್ರತಿ ವಾರ 7 ವಿಮಾನಗಳ ಹಾರಾಟವನ್ನು ಕೈಗೊಳ್ಳಲಿದೆ.