ಸದಿಲ್ಲಿ: ನಷ್ಟದ ಹೊರೆ ಹೊತ್ತಿರುವ ಏರ್‌ ಇಂಡಿಯಾ ಖರೀದಿಗೆ ಟಾಟಾ ಗ್ರೂಪ್‌ ಅಧಿಕೃತವಾಗಿ ಆಸಕ್ತಿಯನ್ನೇನೂ ತೋರಿಸಿಲ್ಲ. ಬದಲಿಗೆ ಇಂಡಿಗೊ ಕಂಪನಿಯು ಆಸಕ್ತಿ ತೋರಿಸಿದೆ. ಈ ಸಂಬಂಧ ವಿಮಾನಯಾನ ಸಚಿವಾಲಯದೊಂದಿಗೆ ಲಿಖಿತ ವ್ಯವಹಾರವನ್ನೂ ನಡೆಸಿದೆ ಎಂದು ಕೇಂದ್ರ ಸಚಿವ ಜಯಂತ್‌ ಸಿನ್ಹಾ ಹೇಳಿದ್ದಾರೆ.
ಸುದ್ದಿಗಾರರ ಜತೆ ಮಾತನಾಡಿದ ಅವರು, ''ಏರ್‌ ಇಂಡಿಯಾದ ದೇಶೀಯ ಮತ್ತು ಅಂತಾರಾಷ್ಟ್ರೀಯ ಕಾರ್ಯಾಚರಣೆಗಳನ್ನು ವಿಂಗಡಿಸಿ ಮಾರಾಟ ಮಾಡದೇ ಇಡಿಇಡಿಯಾಗಿಯೇ ಮಾರಾಟ ಮಾಡಲಾಗುವುದು,'' ಎಂದು ಹೇಳಿದರು.
ಏರ್‌ ಇಂಡಿಯಾ ಖರೀದಿ ಪ್ರಕ್ರಿಯೆಯಲ್ಲಿ ಭಾಗವಹಿಸುವ ಸಾಧ್ಯತೆಗಳನ್ನು ಪರಾಮರ್ಶಿಸುವುದಾಗಿ ಟಾಟಾ ಸನ್ಸ್‌ ಲಿಮಿಟೆಡ್‌ನ ಕಾರ್ಯನಿರ್ವಾಹಕ ಅಧ್ಯಕ್ಷ ಎನ್‌.ಚಂದ್ರಶೇಖರ್‌ ಇತ್ತೀಚೆಗೆ ಹೇಳಿದ್ದರು. ಈ ಹಿನ್ನೆಲೆಯಲ್ಲಿ ಏರ್‌ ಇಂಡಿಯಾ ಮತ್ತೆ ಟಾಟಾ ತೆಕ್ಕೆ ಸೇರಲಿದೆ ಎನ್ನುವ ಸುದ್ದಿಗಳು ಹರಿದಾಡಿದ್ದವು. ಇದಕ್ಕೆ ವಿವರಣೆ ನೀಡಿರುವ ಸಿನ್ಹಾ,''ಇಂಡಿಗೊದಿಂದ ಮಾತ್ರ ಲಿಖಿತ ರೂಪದಲ್ಲಿ ಪ್ರಸ್ತಾವನೆಯು ಸರಕಾರಕ್ಕೆ ಬಂದಿದೆ. ಈ ಬಗ್ಗೆ ಗಮನಹರಿಸುತ್ತೇವೆ,'' ಎಂದಿದ್ದಾರೆ.
ಜೂ.28ರಂದು ಹಣಕಾಸು ವ್ಯವಹಾರಕ್ಕೆ ಸಂಬಂಧಿಸಿದ ಸಂಪುಟ ಸಮಿತಿಯು ಏರ್‌ ಇಂಡಿಯಾದಲ್ಲಿ ಸರಕಾರದ ಹೂಡಿಕೆ ಕಡಿಮೆ ಮಾಡಲು ಸಮ್ಮತಿ ಸೂಚಿಸಿತ್ತು.