ಅಧಿಕ ಆದಾಯ, ಲಾಭ ಬಿಂಬಿಸಲು ಯತ್ನ: ಇನ್ಫೋಸಿಸ್‌ ಸಿಇಒ ಸಲೀಲ್‌ ಪರೇಖ್‌ ವಿರುದ್ಧ ನೌಕರರ ಗುಂಪು ದೂರು

ಬೆಂಗಳೂರು: ವಿಶಾಲ್‌ ಸಿಕ್ಕಾ ಮತ್ತು ನಾರಾಯಣ ಮೂರ್ತಿ ನಡುವಿನ ಸಂಘರ್ಷ ಮುಗಿದು, ಇನ್ಫೋಸಿಸ್‌ನಲ್ಲಿ ಎಲ್ಲವೂ ತಿಳಿಯಾಯಿತು ಎನ್ನುವಾಗಲೇ ಹೊಸದೊಂದು ಬಿಕ್ಕಟ್ಟು ಎದುರಾಗಿದೆ. ತಮ್ಮನ್ನು ತಾವು 'ಎಥಿಕಲ್‌ ಎಂಪ್ಲಾಯೀಸ್‌' ಎಂದು ಕರೆದುಕೊಂಡಿರುವ ಅನಾಮಿಕ ಗುಂಪೊಂದು, ''ಇನ್ಫೋಸಿಸ್‌ ತನ್ನ ಆದಾಯ ಮತ್ತು ಲಾಭ ಹೆಚ್ಚಿಸುವ ವಿಷಯದಲ್ಲಿ ಅನೈತಿಕ ಮಾರ್ಗವನ್ನು ಅನುಸರಿಸಿದೆ,'' ಎಂದು ದೂರಿದೆ. ಇನ್ಫೋಸಿಸ್‌ ಸಿಇಒ ಸಲೀಲ್‌ ಪರೇಖ್‌ ಕಾರ್ಯವೈಖರಿಯನ್ನು ಟೀಕಿಸಲಾಗಿದೆ.

ಇನ್ಫೋಸಿಸ್‌ ಆಡಳಿತ ಮಂಡಳಿ ಮತ್ತು ಅಮೆರಿಕದ ಸೆಕ್ಯೂರಿಟೀಸ್‌ ಎಕ್ಸ್‌ಚೇಂಜ್‌ ಕಮಿಷನ್‌ಗೆ (ಎಸ್‌ಇಸಿ) ಈ ಗುಂಪು ಪತ್ರ ಬರೆದಿದೆ. ಆರೋಪ ಸಾಬೀತು ಪಡಿಸುವ ಸಂಬಂಧ ತಮ್ಮ ಬಳಿ ಇ-ಮೇಲ್‌ಗಳು ಮತ್ತು ಧ್ವನಿ ಮುದ್ರಿಕೆಗಳು ಇವೆ ಎಂದೂ ಹೇಳಿಕೊಂಡಿದೆ.

ಕಾರ್ಪೋರೇಟ್‌ ಆಡಳಿತ ಚೊಕ್ಕಟವಾಗಿರಬೇಕು ಎನ್ನುವ ನಿಯಮವನ್ನು ಪಕ್ಕಕ್ಕೆ ತೂರಿ, ಸಂಸ್ಥೆಯ ಅಲ್ಪಾವಧಿ ಆದಾಯ ಮತ್ತು ಲಾಭಾವನ್ನು ಹೆಚ್ಚಿಸಲು ಸಿಇಒ ಸಲೀಲ್‌ ಪರೇಖ್‌ ಅವರು ನೈತಿಕತೆಯನ್ನು ಮರೆತಿದ್ದಾರೆ ಎಂದು ದೂರಿನಲ್ಲಿ ಹೇಳಲಾಗಿದೆ. ''ನಾವು ಇನ್ಫೋಸಿಸ್‌ ಉದ್ಯೋಗಿಗಳಾಗಿದ್ದು, ಆಡಳಿತ ಮಂಡಳಿಯು ದೂರಿನ ಬಗ್ಗೆ ಕೂಡಲೇ ತನಿಖೆ ನಡೆಸಿ ಕ್ರಮ ಜರುಗಿಸುವ ವಿಶ್ವಾಸವಿದೆ'' ಎಂದು ಎಥಿಕಲ್‌ ಎಂಪ್ಲಾಯಿಸ್‌ ಪತ್ರದಲ್ಲಿ ಹೇಳಿದ್ದಾರೆ.

ದೂರನ್ನು ಸಂಸ್ಥೆಯ ನಿಯಮಗಳ ಪ್ರಕಾರ, ಲೆಕ್ಕಪರಿಶೋಧನಾ ಸಮಿತಿಗೆ ರವಾನಿಸಲಾಗಿದೆ. ಜುಲೈ-ಸೆಪ್ಟೆಂಬರ್‌ನ ದ್ವಿತೀಯ ತ್ರೈಮಾಸಿಕದಲ್ಲಿ ಇನ್ಫೊಸಿಸ್‌ 4,019 ಕೋಟಿ ರೂ. ನಿವ್ವಳ ಲಾಭ ದಾಖಲಿಸಿತ್ತು.

ಇನ್ಫೋಸಿಸ್‌ ಲೋಪಗಳ ಕುರಿತು ಆರೋಪಗಳು ಹೊಸತೇನಲ್ಲ. ವಿಷಲ್‌ ಬ್ಲೋವರ್‌ಗಳು 2017 ಮತ್ತು 2018ರಲ್ಲೂಈ ಬಗ್ಗೆ ಧ್ವನಿ ಎತ್ತಿದ್ದರು. ದೂರಿನ ಬಗ್ಗೆ ಪರಿಶೀಲನೆ ನಡೆಸಲು ತನಿಖಾ ಸಮಿತಿಯನ್ನು ಸೆಬಿ ರಚಿಸಿತ್ತು.

ಸಂಸ್ಥೆಯ ಸಹ ಸಂಸ್ಥಾಪಕ ನಾರಾಯಣಮೂರ್ತಿ ಜೊತೆಗಿನ ಭಿನ್ನಾಭಿಪ್ರಾಯದಿಂದಾಗಿ ಅಂದಿನ ಸಿಇಒ ವಿಶಾಲ್‌ ಸಿಕ್ಕಾ ಅಧಿಕಾರ ತ್ಯಜಿಸಿದ್ದರು. ಸಲೀಲ್‌ ಪರೇಖ್‌ ಸಿಇಒ ಆಗಿ ನೇಮಕಗೊಂಡಿದ್ದರು.

ಆರೋಪಗಳೇನು?

ಅಲ್ಪಾವಧಿ ಲಾಭಾಂಶ ಮತ್ತು ಆದಾಯ ಹೆಚ್ಚಳಕ್ಕಾಗಿ ಇನ್ಫೋಸಿಸ್‌ ಸಿಇಒ ಸಲೀಲ್‌ ಪರೇಖ್‌ ನೈತಿಕತೆಯನ್ನು ಪಕ್ಕಕ್ಕಿಟ್ಟಿದ್ದಾರೆ.

ಇನ್ಫೋಸಿಸ್‌ನ ಅನೇಕ ಒಪ್ಪಂದಗಳು ನಿಯಮಬದ್ಧವಾಗಿಲ್ಲ. ನಿಯಮಾವಳಿಗಳಲ್ಲಿಬದಲಾವಣೆಗಳನ್ನು ಮಾಡಿ, ಅಧಿಕ ಲಾಭಾಂಶವನ್ನು ತೋರಿಸುವಂತೆ ಹಣಕಾಸು ತಂಡದ ಮೇಲೆ ಸಿಇಒ ಸಲೀಲ್‌ ಪರೇಖ್‌ ಮತ್ತು ಸಿಎಫ್‌ಒ ನಿಲಾಂಜನ್‌ ರಾಯ್‌ ಒತ್ತಡ ಹೇರುತ್ತಿದ್ದಾರೆ.

ವೆರಿಜನ್‌, ಎಬಿಎನ್‌ ಅಮ್ರೊನಂಥ ಡೀಲ್‌ಗಳಲ್ಲಿಮತ್ತು ಜಪಾನ್‌ನಲ್ಲಿಜಂಟಿ ಯೋಜನೆಗಳಲ್ಲಿಅಕ್ರಮಗಳು ನಡೆದಿವೆ. ವ್ಯವಹಾರಗಳ ಪ್ರಸ್ತಾವನೆಗಳ ಬಗ್ಗೆ ಆಡಿಟರ್‌ಗಳು ಪರಿಶೀಲನೆ ನಡೆಸಬೇಕು.

ಸಲೀಲ್‌ ಪರೇಖ್‌ರ ವೈಯಕ್ತಿಕ ವಾರದ ಟ್ರಿಪ್‌ಗಳಿಗೂ ಇನ್ಫೋಸಿಸ್‌ ಹಣ ನೀಡಿದೆ.

ಇನ್ಫೋಸಿಸ್‌ ವಿರುದ್ಧದ ಆರೋಪದಿಂದಾಗಿ, ಅಮೆರಿಕದಲ್ಲಿ ಇನ್ಫಿ ಷೇರುಗಳು ಸೋಮವಾರ ಶೇ. 16ರ ತನಕ ನಷ್ಟಗೊಂಡಿವೆ.