ಇನ್ಫೋಸಿಸ್‌ಗೆ 4,457 ಕೋಟಿ ರೂ. ಲಾಭ: 2019 ಅಕ್ಟೋಬರ್‌-ಡಿಸೆಂಬರ್‌ನಲ್ಲಿ ನಿರೀಕ್ಷೆಗೂ ಮೀರಿದ ಆದಾಯ

ಬೆಂಗಳೂರು: ಐಟಿ ದಿಗ್ಗಜ ನ್ಫೋಸಿಸ್‌ 3ನೇ ತ್ರೈಮಾಸಿಕದ ಫಲಿತಾಂಶ ಪ್ರಕಟಿಸಿದ್ದು, 4,457 ಕೋಟಿ ರೂ. ಲಾಭ ಗಳಿಸಿದೆ. ಅಂದರೆ 23.5 ಪರ್ಸೆಂಟ್‌ ಏರಿಕೆಯಾಗಿದೆ. ಆರ್ಥಿಕ ಮಂದಗತಿಯ ನಡುವೆ ಇನ್ಫೋಸಿಸ್‌ನ ನಿರೀಕ್ಷೆಗೂ ಮೀರಿದ ಬೆಳವಣಿಗೆ ಆಶಾದಾಯಕವಾಗಿದೆ. ಇನ್ಫೋಸಿಸ್‌ನ ಸಕಾರಾತ್ಮಕ ಫಲಿತಾಂಶ ಷೇರುಪೇಟೆಗೂ ಶುಕ್ರವಾರ ಚೇತೋಹಾರಿಯಾಯಿತು.

ಇನ್ಫೋಸಿಸ್‌ 4,204 ಕೋಟಿ ರೂ. ನಿವ್ವಳ ಲಾಭ ಗಳಿಸಬಹುದು ಎಂದು ಅಂದಾಜಿಸಲಾಗಿತ್ತು. ಆದರೆ ನಿರೀಕ್ಷೆಗೂ ಮೀರಿ ಲಾಭ ಗಳಿಸಿದೆ. ಕಂಪನಿಯ ಆದಾಯ 7.9 ಪರ್ಸೆಂಟ್‌ ಹೆಚ್ಚಳವಾಗಿದ್ದು, 23,092 ಕೋಟಿ ರೂ.ಗೆ ವೃದ್ಧಿಸಿದೆ. ವರ್ಷದ ಹಿಂದೆ ಇದೇ ಅವಧಿಯಲ್ಲಿ21,400 ಕೋಟಿ ರೂ. ಗಳಿಸಿತ್ತು.

ಐಟಿ ಕಂಪನಿಗಳಲ್ಲಿ 40,000 ಉದ್ಯೋಗ ಕಡಿತ ಸಂಭವ: ಇನ್ಫೋಸಿಸ್‌ನ ಟಿ.ವಿ ಮೋಹನ್‌ ದಾಸ್‌ ಪೈ!

ಇನ್ಫೋಸಿಸ್‌ 2019-20ರಲ್ಲಿಆದಾಯ ಬೆಳವಣಿಗೆಯ ಮುನ್ನೋಟವನ್ನು ಶೇ.9-10ರಿಂದ ಶೇ.10-10.5ಕ್ಕೆ ವೃದ್ಧಿಸಿದೆ. '' ಡಿಜಿಟಲ್‌ ವಲಯದಲ್ಲಿಕಂಪನಿ ಗಣನೀಯ ಪ್ರಗತಿ ಸಾಧಿಸುತ್ತಿದ್ದು, ಮುಂದಿನ ಹಂತದ ಬೆಳವಣಿಗೆಯನ್ನು ದಾಖಲಿಸಲಿದ್ದೇವೆ'' ಎಂದು ಇನ್ಫೋಸಿಸ್‌ ಸಿಇಒ ಸಲೀಲ್‌ ಪರೇಖ್‌ ತಿಳಿಸಿದ್ದಾರೆ. ಇನ್ಫೋಸಿಸ್‌ 1.8 ಶತಕೋಟಿ ಡಾಲರ್‌ ಮೌಲ್ಯದ ಭಾರಿ ಆರ್ಡರ್‌ಗಳನ್ನು ಹೊಂದಿದೆ. ಅಕ್ಟೋಬರ್‌-ಡಿಸೆಂಬರ್‌ ಅವಧಿಯಲ್ಲಿಕಂಪನಿ 84 ಹೊಸ ಗ್ರಾಹಕರನ್ನು ಗಳಿಸಿದೆ.

ಇನ್ಫೋಸಿಸ್‌ನ ಆಡಳಿತ ಮಂಡಳಿ ವಿರುದ್ಧ ಕಂಪನಿಯ ಕೆಲ ಅನಾಮಿಕ ಉದ್ಯೋಗಿಗಳು ಮಾಡಿದ್ದ ಎಲ್ಲಆರೋಪಗಳನ್ನು ಕಂಪನಿಯ ಲೆಕ್ಕಪರಿಶೋಧನಾ ಸಮಿತಿ ನಿರಾಕರಿಸಿದೆ. ಕಂಪನಿಯ ಉನ್ನತ ಮಟ್ಟದ ಅಧಿಕಾರಿಗಳು ಹಣಕಾಸು ಅವ್ಯವಹಾರ ಮಾಡಿದ್ದಾರೆ ಎಂದೂ ಆರೋಪಿಸಲಾಗಿತ್ತು.