ಇನ್ಫೋಸಿಸ್‌ ನಿವ್ವಳ ಲಾಭ 3,612 ಕೋಟಿ ರೂ.ಗೆ ಏರಿಕೆ

ಬೆಂಗಳೂರು: ಜೂನ್‌ 30ಕ್ಕೆ ಅಂತ್ಯವಾದ ಮೊದಲ ತ್ರೈಮಾಸಿಕದ ಫಲಿತಾಂಶವನ್ನು ಇನ್ಫೋಸಿಸ್‌ ಶುಕ್ರವಾರ ಪ್ರಕಟಿಸಿದೆ. ನಿವ್ವಳ ಲಾಭ ಶೇ.3.7ರಷ್ಟು ಏರಿಕೆಯಾಗಿದ್ದು 3,612 ಕೋಟಿ ರೂ.ಮುಟ್ಟಿದೆ. ವರ್ಷದ ಹಿಂದೆ ಇದೇ ಅವಧಿಯಲ್ಲಿ 3,483 ಕೋಟಿ ರೂ. ದಾಖಲಾಗಿತ್ತು. ಇದೇ ವೇಳೆ, ಷೇರುದಾರರಿಗೆ 1:1 ಬೋನಸ್‌ ಅನ್ನೂ ಕಂಪನಿ ಘೋಷಿಸಿದೆ. ಇದು ಷೇರುದಾರರ ಪಾಲಿಗೆ ಅಚ್ಚರಿದಾಯಕ ಉಡುಗೊರೆ.

ದೇಶದ ಸಾಫ್ಟ್‌ವೇರ್‌ ಸೇವೆಗಳಲ್ಲಿ ಎರಡನೇ ಸ್ಥಾನದಲ್ಲಿರುವ ಬೆಂಗಳೂರು ಮೂಲದ ಇನ್ಫೋಸಿಸ್‌ನ ಕಾರ್ಯಾಚರಣೆಯ ಆದಾಯ ಏಪ್ರಿಲ್‌-ಜೂನ್‌ ತ್ರೈಮಾಸಿಕದಲ್ಲಿ ಶೇ.12ರಷ್ಟು ಅಂದರೆ 19,128 ಕೋಟಿ ರೂ. ವೃದ್ಧಿಯಾಗಿದೆ. ವರ್ಷದ ಹಿಂದೆ ಇದೇ ಅವಧಿಯಲ್ಲಿ 17,078 ಕೋಟಿ ರೂ. ಇತ್ತು. ನಿವ್ವಳ ಲಾಭವನ್ನು ವಾರ್ಷಿಕವಾಗಿ ಹೋಲಿಸಿದರೆ ಲಾಭ ಕಂಡುಬಂದಿದೆ, ಆದರೆ ತ್ರೈಮಾಸಿಕವಾಗಿ ನೋಡಿದರೆ ಶೇ.2.1 ನಷ್ಟವಾಗಿದೆ.

ಇನ್ಫೋಸಿಸ್‌ ಆಡಳಿತ ಮಂಡಳಿಯು ಪ್ರತಿ ಷೇರಿಗೆ ಒಂದು ಷೇರನ್ನು ನೀಡುವ(1:1 ಬೋನಸ್‌ ಷೇರು) ಪ್ರಸ್ತಾವನೆಗೆ ಅನುಮೋದನೆ ನೀಡಿದೆ. ಅಲ್ಲದೇ, ಪ್ರತಿ ಅಮೆರಿಕನ್‌ ಡಿಪಾಸಿಟರಿ ಷೇರುದಾರರಿಗೂ(ಎಡಿಎಸ್‌) ಒಂದು ಷೇರು ಡಿವಿಡೆಂಟ್‌ ನೀಡಲಾಗಿದೆ. 2014ರಲ್ಲಿ ಇದೇ ರೀತಿಯಲ್ಲಿ 1:1 ಬೋನಸ್‌ ಷೇರನ್ನು ಕಂಪನಿ ನೀಡಿತ್ತು.

ಇನ್ಫೋಸಿಸ್‌ ಆದಾಯದ ಬೆಳವಣಿಗೆಯನ್ನು ಕಾಯ್ದುಕೊಂಡಿದೆ. ''ಉತ್ತಮ ಆದಾಯವನ್ನು ಕಂಪನಿ ದಾಖಲಿಸಿದ್ದು, ಮಾರುಕಟ್ಟೆಯಲ್ಲಿ ಉತ್ತಮ ಬೇಡಿಕೆಯನ್ನು ಕಾಯ್ದುಕೊಂಡಿದೆ,'' ಎಂದು ಇನ್ಫೋಸಿಸ್‌ ಸಿಇಒ ಮತ್ತು ಎಂಡಿ ಸಲೀಲ್‌ ಪರೇಖ್‌ ಹೇಳಿದ್ದಾರೆ.

ಷೇರು ಮಾರುಕಟ್ಟೆ ಅವಧಿ ಮುಕ್ತಾಯಗೊಂಡಿದ್ದ ಸಮಯದಲ್ಲಿ ಫಲಿತಾಂಶ ಪ್ರಕಟವಾಗಿದೆ. ಮುಂಬಯಿ ಷೇರುಪೇಟೆಯಲ್ಲಿ ಶುಕ್ರವಾರ ಇನ್ಫೋಸಿಸ್‌ ಷೇರುಗಳು ಶೇ.1.12ರಷ್ಟು ಲಾಭ ಗಳಿಸಿವೆ. ದೇಶದ ಮತ್ತೊಂದು ಪ್ರಮುಖ ಕಂಪನಿಯಾದ ಟಿಸಿಎಸ್‌ನ ನಿವ್ವಳ ಲಾಭ ಜೂನ್‌ ತ್ರೈಮಾಸಿಕದಲ್ಲಿ ಶೇ.23.4 ಏರಿಕೆಯಾಗಿದ್ದು, 7,340 ಕೋಟಿ ರೂ. ಇದೆ.