ಇನ್ಫೋಸಿಸ್‌ಗೆ 4,110 ಕೋಟಿ ರೂ. ಲಾಭ

ಹೊಸದಿಲ್ಲಿ: ಐಟಿ ದಿಗ್ಗಜ ಇನ್ಫೋಸಿಸ್‌ ಕಳೆದ ಜುಲೈ-ಸೆಪ್ಟೆಂಬರ್‌ ಅವಧಿಯಲ್ಲಿ 4,110 ಕೋಟಿ ರೂ. ನಿವ್ವಳ ಲಾಭ ಗಳಿಸಿದ್ದು, ಶೇ.10.30ರಷ್ಟು ಏರಿಕೆಯಾಗಿದೆ.

ಕಳೆದ ವರ್ಷ ಇದೇ ಅವಧಿಯಲ್ಲಿ ಇನ್ಫೋಸಿಸ್‌ 3,726 ಕೋಟಿ ರೂ. ಲಾಭ ಗಳಿಸಿತ್ತು. ಕಂಪನಿಯ ಆದಾಯದಲ್ಲಿ ಶೇ.17.30ರಷ್ಟು ಹೆಚ್ಚಳವಾಗಿದ್ದು, 20,609 ಕೋಟಿ ರೂ.ಗಳಾಗಿದೆ. ಒಟ್ಟು ಆದಾಯದಲ್ಲಿ ಡಿಜಿಟಲ್‌ ಸೇವೆಗಳ ವಿಭಾಗ ಶೇ.31ರಷ್ಟು ಪಾಲು ಕೊಟ್ಟಿದೆ.

ಇನ್ಫೋಸಿಸ್‌ ಪ್ರಸಕ್ತ ಸಾಲಿನಲ್ಲಿ ಶೇ.6-8ರ ಆದಾಯ ಗಳಿಕೆಯ ಮುನ್ನೋಟವನ್ನು ಉಳಿಸಿಕೊಂಡಿದೆ. ಈ ತ್ರೈಮಾಸಿಕದಲ್ಲಿ 200 ಕೋಟಿ ಡಾಲರ್‌ಗೂ ಅಧಿಕ ಮೊತ್ತದ ಡೀಲ್‌ಗಳನ್ನು ಪಡೆಯುವಲ್ಲಿ ಕಂಪನಿ ಯಶಸ್ವಿಯಾಗಿದೆ. ರಿಟೇಲ್‌, ಹಣಕಾಸು, ಉತ್ಪಾದನೆ ವಲಯದಲ್ಲಿ ಡಿಜಿಟಲ್‌ ಸೇವೆಗೆ ಸಂಬಂಧಿಸಿ ಉತ್ತಮ ವಹಿವಾಟನ್ನು ಕಂಪನಿ ನಡೆಸಿದೆ. ಪ್ರತಿ ಉದ್ಯೋಗಿಯಿಂದ ಸರಾಸರಿ ಆದಾಯದಲ್ಲಿ 54,900 ಡಾಲರ್‌ನಿಂದ 54,700 ಡಾಲರ್‌ಗೆ ಇಳಿಕೆಯಾಗಿದೆ. ಉದ್ಯೋಗಿಗಳ ವಲಸೆ ಶೇ.22.2ರಿಂದ ಶೇ.19.9ಕ್ಕೆ ಇಳಿಕೆಯಾಗಿದೆ. ಮಾಜಿ ಸಿಎಫ್‌ಒ ರಾಜೀವ್‌ ಬನ್ಸಾಲ್‌ ಜತೆಗಿನ ಬಾಕಿ ವೇತನ ವಿವಾದದ ಪ್ರಕರಣವನ್ನು ಸಂಧಾನದ ಮೂಲಕ ಇತ್ಯರ್ಥಪಡಿಸಲಾಗಿದ್ದು, ಬನ್ಸಾಲ್‌ ಅವರಿಗೆ 12 ಕೋಟಿ ರೂ.ಗಳನ್ನು ಬಡ್ಡಿ ಸಹಿತ ನೀಡಲಾಗುವುದು ಎಂದು ಇನ್ಫೋಸಿಸ್‌ ತಿಳಿಸಿದೆ.