ಇನ್ಫೋಸಿಸ್‌ ಇದೀಗ ಸ್ಥಿರ: ನಂದನ್‌ ನಿಲೇಕಣಿ

ಬೆಂಗಳೂರು : ಇನ್ಫೋಸಿಸ್‌ ತನ್ನ ಸ್ಥಿರತೆಗೆ ಸಂಬಂಧಿಸಿ ಉಂಟಾಗಿದ್ದ ಕಳವಳಗಳನ್ನು ಪರಿಹರಿಸಲು ಹಲವು ಕ್ರಮಗಳನ್ನು ತೆಗೆದುಕೊಂಡಿದ್ದು, ಈಗ ಕಂಪನಿ ಅತ್ಯಂತ ಸ್ಥಿರತೆಯಿಂದ ಕೂಡಿದೆ ಎಂದು ಕಾರ‍್ಯಕಾರಿಯೇತರ ಅಧ್ಯಕ್ಷ ನಂದನ್‌ ನಿಲೇಕಣಿ ತಿಳಿಸಿದ್ದಾರೆ.

ಕಂಪನಿಯ ಸ್ಥಾಪಕ ಎನ್‌ಆರ್‌ ನಾರಾಯಣಮೂರ್ತಿ ಮತ್ತು ಹಿಂದಿನ ಆಡಳಿತ ಮಂಡಳಿಯ ನಡುವೆ ಕಾರ್ಪೊರೇಟ್‌ ಆಡಳಿತಕ್ಕೆ ಸಂಬಂಧಿಸಿ ವಿವಾದ ಉಂಟಾಗಿತ್ತು. ಪರಿಣಾಮ ಕಳೆದ ವರ್ಷ ಆಗಸ್ಟ್‌ನಲ್ಲಿ ಸಿಇಒ ವಿಶಾಲ್‌ ಸಿಕ್ಕಾ ರಾಜೀನಾಮೆ ನೀಡಿದ್ದರು. ಹಾಗೂ ಆಗಸ್ಟ್‌ನಲ್ಲಿ ನಂದನ್‌ ನಿಲೇಕಣಿಯವರು ಎರಡನೇ ಬಾರಿಗೆ ಕಾರ‍್ಯಕಾರಿಯೇತರ ಅಧ್ಯಕ್ಷರಾಗಿ ಮರಳಿದ್ದರು.

ಇನ್ಫೋಸಿಸ್‌ನ 37ನೇ ವಾರ್ಷಿಕ ಮಹಾ ಸಭೆಯನ್ನುದ್ದೇಶಿಸಿ ಮಾತನಾಡಿದ ನಿಲೇಕಣಿ, ಈಗ ನಾವು ಅತ್ಯಂತ ಸ್ಥಿರವಾದ ಆಡಳಿತಮಂಡಳಿಯನ್ನು ಹೊಂದಿದ್ದೇವೆ. ಕಂಪನಿಯ ಏಳಿಗೆಗೆ ಎಲ್ಲರೂ ಸಂಘಟಿತರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ ಎಂದರು.