ಬೆಂಗಳೂರು: ಐಟಿ ಕಂಪನಿ ಇನ್ಫೋಸಿಸ್‌ ಪ್ರಸಕ್ತ ಸಾಲಿನಲ್ಲಿ ತನ್ನ ವೆಚ್ಚದಲ್ಲಿ 100-150 ದಶಲಕ್ಷ ಡಾಲರ್‌ (ಅಂದಾಜು 10,500 ಕೋಟಿ ರೂ.) ಕಡಿತ ಮಾಡಲು ಮುಂದಾಗಿದೆ. ಈ ನಿಟ್ಟಿನಲ್ಲಿ ಮಧ್ಯಮ ಮತ್ತು ಹಿರಿಯ ಉದ್ಯೋಗಿಗಳ ಮಟ್ಟದಲ್ಲಿ ಹೊಸಬರನ್ನು ನೇಮಿಸಲು ನಿರ್ಧಾರ ತೆಗೆದುಕೊಂಡಿದೆ.

ಸಿಇಒ ಸಲೀಲ್‌ ಪರೇಖ್‌ ಸಾರಥ್ಯದಲ್ಲಿಇನ್ಫೋಸಿಸ್‌ ಮುಂದಿನ ಹಂತದ ಬೆಳವಣಿಗೆಗೆ ಭಾರಿ ಹೂಡಿಕೆ ಮಾಡಿರುವುದರಿಂದ ಸದ್ಯ ಲಾಭಾಂಶದಲ್ಲಿ ಇಳಿಕೆಯಾಗಿದೆ. ಹೀಗಾಗಿ 100-150 ದಶಲಕ್ಷ ಡಾಲರ್‌ ಉಳಿತಾಯಕ್ಕೆ ಸಿದ್ಧತೆ ನಡೆಸುತ್ತಿದೆ.

ಇನ್ಫೋಸಿಸ್ ಉದ್ಯೋಗಿಗಳಿಗೆ ಶಾಕಿಂಗ್ ನ್ಯೂಸ್! ಸಾವಿರ ಸಾವಿರ ಸೀನಿಯರ್‌ಗಳಿಗೇ ಗೇಟ್‌ ಪಾಸ್!

''ಕಂಪನಿಯಲ್ಲಿ ವೆಚ್ಚ ಉಳಿತಾಯಕ್ಕೆ ಸಂಬಂಧಿಸಿ ಹಲವು ಮಾರ್ಗೋಪಾಯಗಳನ್ನು ಕಂಡುಕೊಳ್ಳಲಾಗುತ್ತಿದೆ'' ಎಂದು ಮುಖ್ಯ ಹಣಕಾಸು ಅಧಿಕಾರಿ ನೀಲಾಂಜನ್‌ ರಾಯ್‌ ತಿಳಿಸಿದ್ದಾರೆ. ಕಂಪನಿ ಅಮೆರಿಕ ಮತ್ತು ಯುರೋಪ್‌ನಲ್ಲಿ ಕಳೆದ ವರ್ಷ 1,700 ಮಂದಿ ಹೊಸಬರನ್ನು ನೇಮಿಸಿಕೊಂಡಿತ್ತು.

ಇನ್ನು ಈ ಸಂಬಂಧ ಬುಧವಾರ ಪ್ರತಿಕ್ರಿಯೆ ನೀಡಿದ್ದ ಇನ್ಫೋಸಿಸ್‌ ಅಧ್ಯಕ್ಷ ನಂದನ್‌ ನಿಲೇಕಣಿ, "ಇದು ಸಾಮೂಹಿಕ ಉದ್ಯೋಗ ಕಡಿತವಲ್ಲ. ಕಾರ್ಯಕ್ಷಮತೆ ಕೊರತೆಯ ಉದ್ಯೋಗಿಗಳನ್ನು ಅನೇಕ ಹಂತಗಳಲ್ಲಿ ವಜಾ ಮಾಡಲಾಗುತ್ತಿದೆ. ಕಂಪನಿಯ ಕಾರ್ಯಕ್ಷಮತೆ ಹೆಚ್ಚಿಸುವ ನಿಟ್ಟಿನಲ್ಲಿಈ ಪ್ರಕ್ರಿಯೆ ಚಾಲ್ತಿಯಲ್ಲಿದೆ," ಎಂದಿದ್ದರು.

"ಕಾರ್ಯಕ್ಷಮತೆ ನಿಟ್ಟಿನಲ್ಲಿ ಉದ್ಯೋಗ ಗಾತ್ರದ ಪರಿಷ್ಕರಣೆ ನಡೆಸುವುದು ದೊಡ್ಡ ಕಂಪನಿಯಾದ ಇನ್ಫೋಸಿಸ್‌ಗೆ ಸಹಜ ಪ್ರಕ್ರಿಯೆ," ಎಂದು ಇನ್ಫೋಸಿಸ್‌ ಹೇಳಿಕೊಂಡಿತ್ತು. ಆದರೆ, ಎಷ್ಟು ಉದ್ಯೋಗಿಗಳನ್ನು ವಜಾ ಮಾಡಲಾಗಿದೆ ಎನ್ನುವ ಸಂಖ್ಯೆಯನ್ನು ಕಂಪನಿ ಸ್ಪಷ್ಟಪಡಿಸಿಲ್ಲ.