ಜುಕರ್‌ಬರ್ಗ್‌ ರಾಜೀನಾಮೆಗೆ ಹೂಡಿಕೆದಾರರ ಪಟ್ಟು

ವಾಷಿಂಗ್ಟನ್‌: ಸಾಮಾಜಿಕ ಜಾಲತಾಣ ದಿಗ್ಗಜ ಫೇಸ್‌ಬುಕ್‌ನ ಸ್ಥಾಪಕ, ಅಧ್ಯಕ್ಷ ಹಾಗೂ ಸಿಇಒ ಮಾರ್ಕ್‌ ಜುಕರ್‌ಬರ್ಗ್‌ ತಮ್ಮ ಹುದ್ದೆಗೆ ರಾಜೀನಾಮೆ ನೀಡಬೇಕು ಎಂದು ಹೂಡಿಕೆದಾರರು ಪಟ್ಟು ಹಿಡಿದಿದ್ದಾರೆ.

ಫೇಸ್‌ಬುಕ್‌ ತನ್ನ ಪ್ರತಿಸ್ಪರ್ಧಿಗಳನ್ನು ಹಣಿಯಲು ಸಾರ್ವಜನಿಕ ಸಂಪರ್ಕ (ಪಬ್ಲಿಕ್‌ ರಿಲೇಶನ್ಸ್‌) ಕಂಪನಿಯೊಂದನ್ನು ನೇಮಕ ಮಾಡಿದೆ. ಹಾಗೂ ಹಲವಾರು ಅಕ್ರಮಗಳನ್ನು ಎಸಗಿದೆ ಎಂದು ಮಾಧ್ಯಮಗಳಲ್ಲಿ ಶನಿವಾರ ವರದಿಯಾಗಿರುವ ಬೆನ್ನಲ್ಲೇ, ಜುಕರ್‌ಬರ್ಗ್‌ ಪದತ್ಯಾಗಕ್ಕೆ ಹೂಡಿಕೆದಾರರು ಒತ್ತಡ ಹೇರಿದ್ದಾರೆ.

ಆದರೆ ಜುಕರ್‌ಬರ್ಗ್‌ ಈ ಎಲ್ಲ ಆರೋಪಗಳನ್ನು ತಳ್ಳಿ ಹಾಕಿದ್ದಾರೆ. ಆರೋಪಿತ ಪಿ.ಆರ್‌ ಕಂಪನಿಯ ಜತೆಗೆ ಫೇಸ್‌ಬುಕ್‌ಗೆ ಸಂಬಂಧ ಇಲ್ಲ ಎಂದಿದ್ದಾರೆ.

ನ್ಯೂಯಾರ್ಕ್‌ ಟೈಮ್ಸ್‌ ಪತ್ರಿಕೆಯಲ್ಲಿ ಪ್ರಕಟವಾದ ವರದಿಯ ಪ್ರಕಾರ, ಫೇಸ್‌ಬುಕ್‌ ತನ್ನ ಪ್ರತಿಸ್ಪರ್ಧಿ ತಂತ್ರಜ್ಞಾನ ಕಂಪನಿಗಳನ್ನು , ಹಾಗೂ ಟೀಕಾಕಾರರ ವಿರುದ್ಧ ಅಪಪ್ರಚಾರ ಮಾಡಲು ಪ್ರತ್ಯೇಕ ಪಿಆರ್‌ ಕಂಪನಿಯನ್ನೇ ನೇಮಿಸಿತ್ತು. ಈ ಪಿಆರ್‌ ಕಂಪನಿಯು ಫೇಸ್‌ಬುಕ್‌ನ ಪ್ರತಿಸ್ಪರ್ಧಿ ಹಾಗೂ ಟೀಕಾಕಾರರನ್ನು ಜನಾಂಗೀಯ ವಿರೋಧಿಗಳು, ಆ್ಯಂಟಿ-ಸೆಮೆಟಿಕ್‌ ಎಂದು ಕೆಸರೆರಚುತ್ತಿತ್ತು. ಇಲ್ಲವೇ ಬಿಲಿಯನೇರ್‌ ಉದ್ಯಮಿ, ಮಾನವಹಕ್ಕುಗಳ ಪ್ರತಿಪಾದಕ, ಜಾರ್ಜ್‌ ಸೋರ್ಸ್‌ ಅವರ ಏಜೆಂಟರು ಎಂದು ಅಪಪ್ರಚಾರ ಮಾಡುತ್ತಿತ್ತು. ಈ ಮೂಲಕ ಫೇಸ್‌ಬುಕ್‌ ತನ್ನ ಪ್ರತಿಸ್ಪರ್ಧಿ ಕಂಪನಿಗಳ ವಿರುದ್ಧ ಸಾರ್ವಜನಿಕರು ಆಕ್ರೋಶಗೊಳ್ಳುವಂತೆ ಮಾಡುತ್ತಿತ್ತು.

ರಿಪಬ್ಲಿಕನ್‌ ಪಕ್ಷದ ಮುಖಂಡರೊಬ್ಬರಿಗೆ ಸೇರಿದ ಪಿಆರ್‌ ಕಂಪನಿಯಾದ ಡಿಫೈನರ್ಸ್‌ ಪಬ್ಲಿಕ್‌ ಅಫೇರ್ಸ್‌ ಅನ್ನು ಈ ಕೃತ್ಯಗಳಿಗೆ ಫೇಸ್‌ಬುಕ್‌ ಬಳಸಿಕೊಂಡಿದೆ. 2016ರ ಅಮೆರಿಕದ ಅಧ್ಯಕ್ಷೀಯ ಚುನಾವಣೆಯ ವೇಳೆ ರಷ್ಯಾ ಮಧ್ಯಪ್ರವೇಶಿಸಿತ್ತು ಎಂಬ ಆರೋಪ ಹಾಗೂ ಕೇಂಬ್ರಿಡ್ಜ್‌ ಅನಾಲಿಟಿಕಾ ಹಗರಣದ ನಂತರ ಫೇಸ್‌ಬುಕ್‌ನ ವರ್ಚಸ್ಸು ಕುಸಿದಿತ್ತು. ಈ ಹೊಡೆತದಿಂದ ಚೇತರಿಸಿಕೊಳ್ಳಲು ಬಲಪಂಥೀಯ ಡಿಫೈನರ್ಸ್‌ ಪಬ್ಲಿಕ್‌ ಅಫೇರ್ಸ್‌ ನೆರವು ನೀಡಿತ್ತು ಎಂದು ವರದಿಯಾಗಿದೆ.

ಫೇಸ್‌ಬುಕ್‌ನಲ್ಲಿ ಷೇರು ಪಾಲು ಹೊಂದಿರುವ ಹೂಡಿಕೆದಾರ, ಹಿರಿಯ ಉಪಾಧ್ಯಕ್ಷ ಜಾನ್ಸ್‌ ಕ್ರೋನ್‌, ಜುಕರ್‌ಬರ್ಗ್‌ ಪದತ್ಯಾಗಕ್ಕೆ ಒತ್ತಾಯಿಸಿದ್ದಾರೆ. ಈ ಎಲ್ಲ ವಿವಾದಗಳ ಪರಿಣಾಮ ಫೇಸ್‌ಬುಕ್‌ನ ಉದ್ಯೋಗಿಗಳಲ್ಲಿ ಕಂಪನಿಯ ಭವಿಷ್ಯದ ಬಗ್ಗೆ ಅನಿಶ್ಚಿತತೆ ಉಂಟಾಗಿದೆ ಎಂದು ಮಾಧ್ಯಮಗಳು ವರದಿ ಮಾಡಿವೆ.