ಷೇರು ಕುಸಿತ: ಹೂಡಿಕೆದಾರರಿಗೆ 1.79 ಲಕ್ಷ ಕೋಟಿ ರೂ. ನಷ್ಟ

[This story originally published in times of India on oct 3, 2018]

ಮುಂಬಯಿ: ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ದರ ಏರಿಕೆ, ಡಾಲರ್‌ ಎದುರು ರೂಪಾಯಿ ಮೌಲ್ಯ ಕುಸಿತ ಸೇರಿದಂತೆ ಜಾಗತಿಕ ಮತ್ತು ದೇಶೀಯ ಪ್ರಭಾವಗಳಿಂದ ಷೇರುಪೇಟೆ ತತ್ತರಿಸಿದೆ.

ಬುಧವಾರ ಸೆನ್ಸೆಕ್ಸ್‌ 551 ಅಂಕ ಕಳೆದುಕೊಂಡು 36,000 ಮಟ್ಟಕ್ಕಿಂತ ಕೆಳಗಿಳಿದಿದೆ. ಸೆನ್ಸೆಕ್ಸ್‌ 35,975.63ಕ್ಕೆ ಕುಸಿದಿದ್ದು, ಕಳೆದ 3 ತಿಂಗಳಲ್ಲಿಯೇ ಇದು ಕನಿಷ್ಠ ಮಟ್ಟ.

ಕರಡಿ ಕುಣಿತದಿಂದ ಷೇರುಪೇಟೆ ಹೂಡಿಕೆದಾರರ 1.79 ಲಕ್ಷ ಕೋಟಿ ರೂ. ಸಂಪತ್ತು ಬುಧವಾರ ಒಂದೇ ದಿನದಲ್ಲಿ ಕರಗಿಹೋಗಿದೆ.

ತೈಲ ದರ ಏರಿಕೆ, ರೂಪಾಯಿ ಕುಸಿತ, ವಿದೇಶಿ ಹೂಡಿಕೆಯ ಹೊರ ಹರಿವು ಹೆಚ್ಚಳದಿಂದ ಷೇರುಪೇಟೆ ಕುಸಿಯಿತು. ಐಟಿ, ಆಟೊ ಮತ್ತು ಟೆಲಿಕಾಂ ಷೇರುಗಳ ಮಾರಾಟದ ಭರಾಟೆ ಹೆಚ್ಚಿದ ಪರಿಣಾಮ ಷೇರುಪೇಟೆ ತತ್ತರಿಸಿತು. ರಾಷ್ಟ್ರೀಯ ಷೇರುಪೇಟೆ ಸೂಚ್ಯಂಕ ನಿಫ್ಟಿ 150.05 ಅಂಕ ನಷ್ಟವಾಗಿದ್ದು, 35,975.63ಕ್ಕೆ ವಹಿವಾಟು ಅಂತ್ಯವಾಯಿತು.

''ಇಂಧನ ದರ ಏರಿಕೆಯ ಪರಿಣಾಮ ಡಾಲರ್‌ ಎದುರು ರೂಪಾಯಿ ಮೌಲ್ಯ ಇನ್ನಷ್ಟು ಕುಸಿಯಿತು. ಈ ಪರಿಣಾಮ ಮಾರುಕಟ್ಟೆ ತತ್ತರಿಸಿತು,'' ಎಂದು ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ. ಏಷ್ಯಾ ಮತ್ತು ಯುರೋಪ್‌ ಮಾರುಕಟ್ಟೆಯಲ್ಲಿ ಮಿಶ್ರ ಟ್ರೆಂಡ್‌ ಕಂಡು ಬಂದಿದೆ.

ಮುಂಬಯಿ ಷೇರು ಮಾರುಕಟ್ಟೆಯಲ್ಲಿ ಬುಧವಾರ 1,450 ಷೇರುಗಳು ಮುನ್ನಡೆ ಸಾಧಿಸಿದರೆ, 1,215 ಷೇರುಗಳು ಕುಸಿದಿವೆ. 153 ಷೇರುಗಳು ಸ್ಥಿರವಾಗಿವೆ.

ಗುರುವಾರ ಕಾರ್ಯತಂತ್ರ ಸಭೆ

ರೂಪಾಯಿ ಕುಸಿತದ ಬಗ್ಗೆ ಚರ್ಚಿಸಲು, ಮತ್ತಷ್ಟು ಕುಸಿಯದಂತೆ ಕಾರ್ಯತಂತ್ರ ರೂಪಿಸುವ ಹಿನ್ನೆಲೆಯಲ್ಲಿ ವಾಣಿಜ್ಯ ಸಚಿವ ಸುರೇಶ್‌ ಪ್ರಭು ಉನ್ನತ ಅಧಿಕಾರಿಗಳ ಸಭೆಯನ್ನು ಗುರುವಾರ ಕರೆದಿದ್ದಾರೆ.

ಶುಕ್ರವಾರದತ್ತ ಎಲ್ಲರ ಚಿತ್ತ

ಆರ್‌ಬಿಐ ಆರ್ಥಿಕ ಪರಾಮರ್ಶೆ ಸಭೆ ನಡೆಯುತ್ತಿದ್ದು, ಬಡ್ಡಿ ದರ ಏರಿಕೆಯಾಗಬಹುದೇ ಎನ್ನುವ ಚರ್ಚೆಗಳು ನಡೆಯುತ್ತಿವೆ. ಬುಧವಾರ ಈ ಬಗೆಗಿನ ತೀರ್ಮಾನ ಹೊರಬೀಳಲಿದ್ದು, ಮಾರುಕಟ್ಟೆ ಮೇಲೆ ಪ್ರಭಾವ ಬೀರುವುದು ಖಚಿತ. ಆರ್ಥಿಕ ಪರಾಮರ್ಶೆಗೆ ಸಂಬಂಧಿಸಿದ ಆರ್‌ಬಿಐನ ಮೂರು ದಿನಗಳ ಸಭೆ ಬುಧವಾರ ಆರಂಭಗೊಂಡಿದೆ.

ಬಡ್ಡಿ ದರವನ್ನು(ರೆಪೊ ದರ) ಆರ್‌ಬಿಐ ಈ ಸಲ ಶೇ.0.25ರಷ್ಟು ಏರಿಕೆ ಮಾಡಬಹುದು ಎಂದು ನಿರೀಕ್ಷಿಸಲಾಗಿದೆ.

85 ಡಾಲರ್‌ ಮಟ್ಟಕ್ಕೆ ಕಚ್ಚಾ ತೈಲ

ಇದೇ ಮೊದಲ ಭಾರಿಗೆ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ದರ ಬ್ಯಾರೆಲ್‌ಗೆ 85 ಡಾಲರ್‌ನ ಸಮೀಪಕ್ಕೆ ತಲುಪಿದೆ. ಮಾರುಕಟ್ಟೆ ವಿಶ್ಲೇಷಕರ ಪ್ರಕಾರ, ಸದ್ಯದ ಟ್ರೆಂಡ್‌ಗಳನ್ನು ನೋಡಿದರೆ ಕಚ್ಚಾ ತೈಲದ ದರ 88ರಿಂದ 90 ಡಾಲರ್‌ನ ಮಟ್ಟ ಮುಟ್ಟು ವ ಸಾಧ್ಯತೆಗಳಿವೆ.

143.64 ಲಕ್ಷ ಕೋಟಿ ರೂ.ಗೆ ಇಳಿಕೆ

ಬಿಎಸ್‌ಇ ನೋಂದಾಯಿತ ಕಂಪನಿಗಳ ಮಾರುಕಟ್ಟೆ ಬಂಡವಾಳವು ಬುಧವಾರ 179 ಲಕ್ಷ ರೂ. ಕುಸಿದಿದೆ. ಅಂದರೆ, ಒಟ್ಟು ಬಂಡವಾಳವು 145.43 ಲಕ್ಷ ಕೋಟಿ ರೂ.ನಿಂದ 143.64 ಲಕ್ಷ ರೂ.ಗೆ ಇಳಿದಿದೆ. ಆಗಸ್ಟ್‌ 31ರಿಂದ ಈ ತನಕ ಹೂಡಿಕೆದಾರರ ಒಟ್ಟು 15.74 ಲಕ್ಷ ಕೋಟಿ ರೂ. ಸಂಪತ್ತು ಕರಗಿದೆ.