ಭಾರತಕ್ಕೆ ತೈಲ ಪೂರೈಕೆ: ಸೌಧಿ ಹಿಂದಿಕ್ಕಿ 2ನೇ ಸ್ಥಾನಕ್ಕೆ ಜಿಗಿದ ಇರಾನ್

ಹೊಸದಿಲ್ಲಿ: ಭಾರತಕ್ಕೆ ಎರಡನೇ ಅತಿದೊಡ್ಡ ತೈಲ ಪೂರೈಕೆದಾರ ರಾಷ್ಟ್ರವಾಗಿದ್ದ ಸೌಧಿಯನ್ನು ಮೂರನೇ ಸ್ಥಾನಕ್ಕೆ ತಳ್ಳುವುದರ ಮೂಲಕ ಇರಾನ್ ಎರಡನೇ ಸ್ಥಾನಕ್ಕೆ ಜಿಗಿದಿದೆ. ಇರಾಕ್ ಅಗ್ರಗಣ್ಯ ಸ್ಥಾನವನ್ನು ಕಾಯ್ದುಕೊಂಡಿದೆ. 2010- 11ರವೆರೆಗೂ ಇರಾನ್ ಭಾರತದ 2ನೇ ಅತಿ ದೊಡ್ಡ ತೈಲ ಪೂರೈಕೆದಾರ ಎನ್ನಿಸಿಕೊಂಡಿತ್ತು. ಆದರೆ ಇರಾನ್‌ನ ಅಣ್ವಸ್ತ್ರ ಕಾರ್ಯಕ್ರಮದ ಮೇಲೆ ಅಮೇರಿಕ ನಿರ್ಬಂಧ ಹೇರಿದ ಹಿನ್ನೆಲೆಯಲ್ಲಿ 7 ನೇ ಸ್ಥಾನಕ್ಕೆ ಕುಸಿದಿತ್ತು.

ಏಪ್ರಿಲ್- ಜೂನ್ ಅವಧಿಯಲ್ಲಿ ದೇಶ ಸೌಧಿ ಅರೇಬಿಯಾಗಿಂತ ಹೆಚ್ಚಿನ ತೈಲವನ್ನು ಇರಾನ್‌ನಿಂದ ಆಮದು ಮಾಡಿಕೊಂಡಿದೆ, ಎಂದು ಕೇಂದ್ರ ಪೆಟ್ರೋಲಿಯಂ ಸಚಿವ ಧರ್ಮೇಂದ್ರ ಪ್ರಧಾನ್ ಸಂಸತ್ತಿನಲ್ಲಿ ತಿಳಿಸಿದ್ದಾರೆ.

ಪ್ರಸಕ್ತ ವಿತ್ತೀಯ ವರ್ಷದ ಮೊದಲ ತ್ರೈಮಾಸಿಕದ ತೈಲ ಆಮದಿನ ಅಂಕಿಅಂಶಗಳಲ್ಲಿ ಇದು ಬಹಿರಂಗಗೊಂಡಿದ್ದು ಬರೋಬ್ಬರಿ 7 ವರ್ಷಗಳ ಬಳಿಕ ಇರಾನ್ ತನ್ನ ಸ್ಥಾನವನ್ನು ಹಿಂದೆ ಪಡೆದಿದೆ.

ಆದರೆ ಟೆಹರಾನ್ ಒಪ್ಪಂದದಿಂದ ಹಿಂದೆ ಸರಿದಿರುವ ಅಮೇರಿಕ , ಇರಾನ್‌ನಿಂದ ತೈಲ ಆಮದನ್ನು ನಿಲ್ಲಿಸುವಂತೆ ಭಾರತದ ಮೇಲೆ ಒತ್ತಡ ಹೇರುತ್ತಿದ್ದು, ನವೆಂಬರ್‌ವರೆಗೆ ಗಡುವು ನೀಡಿದೆ. ಇರಾನ್ ಮೇಲಿನ ಅವಲಂಬನೆ ತಗ್ಗಿಸಿ ಇತರ ದೇಶಗಳಿಂದ ಆಮದು ಮಾಡಿಕೊಳ್ಳುವತ್ತ ಗಮನ ಹರಿಸಲು ಸಾಕಷ್ಟು ಸಮಯವಿರುವುದರಿಂದ ತೈಲೋದ್ಯಮಿಗಳು ನಿರಾಳರಾಗಿದ್ದಾರೆ.

ಇರಾನ್‌ನಿಂದ ಆಮದಾಗುತ್ತಿರುವ ಪ್ರಮಾಣದ ತೈಲಕ್ಕೆ ಪರ್ಯಾಯ ಕಂಡುಕೊಳ್ಳುವುದೇನೂ ಸಮಸ್ಯೆಯಲ್ಲ. ಇರಾಕ್, ಸೌಧಿ ಅರೇಬಿಯಾ ಮತ್ತು ಕುವೈತ್‌ಗಳಿಂದ ಆಮದು ಮಾಡಿಕೊಳ್ಳಬಹುದು.