ಹೊಸದಿಲ್ಲಿ: ಆದಾಯ ತೆರಿಗೆ ಇಲಾಖೆಯು ನಿಶ್ಚಿತ ಠೇವಣಿಗಳಿಂದ 5 ಲಕ್ಷ ರೂ.ಗೂ ಹೆಚ್ಚು ಆದಾಯ ಗಳಿಸುವವರ ಆದಾಯದ ಮೇಲೆ ನಿಗಾ ವಹಿಸಲು ನಿರ್ಧರಿಸಿದೆ. ಇಂಥ ಆದಾಯಕ್ಕೆ ಸಂಬಂಧಿಸಿ ತೆರಿಗೆ ಪಾವತಿಯಾಗದೆ ಇರುವ ಸಾಧ್ಯತೆಯೂ ಇರಬಹುದು ಎಂಬ ಲೆಕ್ಕಾಚಾರದಲ್ಲಿ ಇಲಾಖೆ ಈ ಕ್ರಮಕ್ಕೆ ಮುಂದಾಗಿದೆ.
ಎಫ್‌ಡಿ ಮೂಲಕ ಉನ್ನತ ಮಟ್ಟದ ಆದಾಯ ಪಡೆಯುವವರು ಅದನ್ನು ಆದಾಯ ತೆರಿಗೆ ರಿಟನ್ಸ್‌ನಲ್ಲಿ, ತೆರಿಗೆಗೆ ಅರ್ಹ ಆದಾಯವೆಂದು ತೋರಿಸದೆ ಇರಲೂಬಹುದು ಎಂದು ಐ-ಟಿ ಇಲಾಖೆಯ ಹಿರಿಯ ಅಧಿಕಾರಿಗಳು ತಿಳಿಸಿದ್ದಾರೆ.
ತೆರಿಗೆ ನೆಲೆಯನ್ನು ವಿಸ್ತರಿಸುವ ಸರಕಾರದ ಕ್ರಮಗಳಲ್ಲಿ ಇದೂ ಒಂದಾಗಿದೆ. ಅನೇಕ ಮಂದಿ ವೃತ್ತಿಪರರು ತಮ್ಮ ಶುಲ್ಕಗಳನ್ನು ನಗದು ರೂಪದಲ್ಲಿ ಸ್ವೀಕರಿಸುತ್ತಾರೆ. ಹಾಗೂ ಐಷಾರಾಮಿ ಜೀವನ ನಡೆಸುತ್ತಿದ್ದರೂ, ತಮ್ಮ ನಿಖರ ಆದಾಯವನ್ನು ಐಟಿಆರ್‌ನಲ್ಲಿ ಬಹಿರಂಗಪಡಿಸುವುದಿಲ್ಲ . ಈ ಹಿನ್ನೆಲೆಯಲ್ಲಿ ನಿಗಾ ವಹಿಸಲಾಗುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಆದಾಯ ತೆರಿಗೆ ಇಲಾಖೆಯು ಎಫ್‌ಡಿಗಳ ಮೇಲಿನ ಟಿಡಿಎಸ್‌ (ಮೂಲದಲ್ಲಿಯೇ ತೆರಿಗೆ ಕಡಿತ) ಬಗ್ಗೆ ಬ್ಯಾಂಕ್‌ಗಳಿಂದಲೂ ಮಾಹಿತಿ ಪಡೆಯುತ್ತಿದೆ. ಇಂಥ ಸಂದರ್ಭಗಳಲ್ಲಿ ಅನೇಕ ಮಂದಿ ಶೇ.30ರ ತೆರಿಗೆ ಶ್ರೇಣಿಗೆ ಬರುತ್ತಿದ್ದರೂ ಶೇ.10ರ ತೆರಿಗೆ ಪಾವತಿಸಿರುವುದೂ ಇದೆ ಎನ್ನುತ್ತಾರೆ ಅಧಿಕಾರಿಗಳು.