2021ರ ಆರಂಭದಲ್ಲೇ ದೇಶೀಯ 5ಜಿ ನೆಟ್‌ವರ್ಕ್‌ ಸಿದ್ಧ: ಮುಕೇಶ್‌ ಅಂಬಾನಿ!

ಹೊಸದಿಲ್ಲಿ: ದೇಶದಲ್ಲಿ 2021ರ ಆರಂಭದಲ್ಲಿಯೇ ದೇಶೀಯ ನಿರ್ಮಿತ 5ಜಿ ನೆಟ್‌ವರ್ಕ್‌ ಬಿಡುಗಡೆಯಾಗಲಿದೆ. ಜಿಯೋ ಮತ್ತು ಗೂಗಲ್‌ ಸಹಭಾಗಿತ್ವವು ಭಾರತವನ್ನು 2ಜಿ ಮುಕ್ತಗೊಳಿಸಲಿದೆ ಎಂದು ರಿಲಯನ್ಸ್‌ ಇಂಡಸ್ಟ್ರೀಸ್ ಅಧ್ಯಕ್ಷ ಮುಕೇಶ್‌ ಅಂಬಾನಿ ಅವರು ಬುಧವಾರ ಘೋಷಿಸಿದ್ದಾರೆ.

ರಿಲಯನ್ಸ್‌ ಇಂಡಸ್ಟ್ರೀಸ್‌ನ 43ನೇ ವಾರ್ಷಿಕ ಸಾಮಾನ್ಯ ಸಭೆಯಲ್ಲಿ (ಎಜಿಎಂ) ತನ್ನ ಕಂಪನಿಯ ಪಾಲುದಾರರನ್ನು ಉದ್ದೇಶಿಸಿ ಮಾತನಾಡಿದರು. ರಿಲಯನ್ಸ್‌ ಜಿಯೋ ವೇದಿಕೆಯಲ್ಲಿ ಸುಮಾರು 20 ಸ್ಟಾರ್ಟ್‌-ಅಪ್‌ ಪಾಲುದಾರರೊಂದಿಗೆ ಜಾಗತಿಕ ಗುಣಮಟ್ಟದ 4ಜಿ ಮತ್ತು 5ಜಿ ತಂತ್ರಜ್ಞಾನಗಳ ಅಭಿವೃದ್ಧಿ ಪಡಿಸುವ ಸಾಮರ್ಥ್ಯ ಹೊಂದಿದೆ. ಕ್ಲೌಡ್‌ ಕಂಪ್ಯೂಟಿಂಗ್‌, ಸಾಧನಗಳು, ಒಎಸ್‌, ಬಿಗ್‌ ಡೇಟಾ, ಕೃತಕ ಬುದ್ಧಿಮತ್ತೆ (ಎಐ), ಎಆರ್‌/ವಿಆರ್‌, ಬ್ಲಾಕ್‌ಚೈನ್‌ ಸೇರಿದಂತೆ ಹಲವು ತಂತ್ರಜ್ಞಾನ ಅಭಿವೃದ್ಧಿ ಪಡುಸುವ ಸಾಮರ್ಥ್ಯ ಇರುವುದಾಗಿ ಅಂಬಾನಿ ಹೇಳಿದ್ದಾರೆ.

ರಿಲಯನ್ಸ್‌ ಕಂಪನಿ ತನ್ನ ಷೇರುಗಳ ವಿತರಣೆ ಹಾಗೂ ಜಿಯೊ ಪ್ಲಾಟ್‌ಫಾರ್ಮ್ಸ್‌ನಲ್ಲಿ ವಿದೇಶಿ ಕಂಪನಿಗಳ ಹೂಡಿಕೆಗಳ ಮೂಲಕ ಒಟ್ಟು ₹2,12,809 ಕೋಟಿ ಸಂಗ್ರಹಿಸಿದೆ.

ವಿಶ್ವದ ಟಾಪ್‌ 10 ಶ್ರೀಮಂತರ ಪಟ್ಟಿಯಲ್ಲಿ ಬಡ್ತಿ ಪಡೆಯುತ್ತಲೇ ಇದ್ದಾರೆ ಮುಕೇಶ್‌ ಅಂಬಾನಿ

ರಿಲಯನ್ಸ್‌ ಕಂಪನಿಯು ಇದೇ ಮೊದಲ ಬಾರಿಗೆ ವರ್ಚುವಲ್‌ ವಾರ್ಷಿಕ ಸಭೆ ನಡೆಸುತ್ತಿದೆ. ಈ ಸಭೆಯಲ್ಲಿ ಆನ್ಲೈನ್ ಮೂಲಕ ವಿಶ್ವದ 500 ವಿವಿಧ ಸ್ಥಳಗಳಿಂದ 1 ಲಕ್ಷಕ್ಕೂ ಹೆಚ್ಚು ಷೇರುದಾರರು ಒಮ್ಮೆಗೇ ಲಾಗ್ ಇನ್ ಆಗಿದ್ದಾರೆ. ಈ ವಿನೂತನ ತಂತ್ರಜ್ಞಾನದ ಮೂಲಕ ನಡೆಯುತ್ತಿರುವ ಸಭೆಯನ್ನು ಉದ್ದೇಶಿಸಿ ಮುಕೇಶ್ ಅಂಬಾನಿ ಮಾತನಾಡಿದರು. ಕೋವಿಡ್-19 ಸಂಕಷ್ಟ ಮುನ್ನವೇ ಭಾರತ ಅತೀಹೆಚ್ಚು ವೇಗದಿಂದ ಅಭಿವೃದ್ಧಿ ಸಾಧಿಸುತ್ತದೆ ಎಂದು ಮುಕೇಶ್ ಅಂಬಾನಿ ಹೇಳಿದರು .

ಜಿಯೋದಲ್ಲಿ 30,000 ಕೋಟಿ ರೂ. ಹೂಡಿಕೆಗೆ ಮುಂದಾದ ಗೂಗಲ್‌

ಫೇಸ್ಬುಕ್ ಸೇರಿದಂತೆ 13 ಹೂಡಿಕೆ ಒಪ್ಪಂದಗಳಿಂದ ರಿಲಯನ್ಸ್ 1.18 ಲಕ್ಷ ಕೋಟಿ ರೂ ಬಂಡವಾಳ ಸಂಗ್ರಹಿಸಿದೆ. ಇದಕ್ಕಾಗಿ ಸಂಸ್ಥೆಯ ಡಿಜಿಟಲ್ ವ್ಯವಹಾರದ ಶೇ. 25.24ರಷ್ಟು ಷೇರುಗಳನ್ನು ಮಾರಿದೆ. ಹಾಗೆಯೇ, ಹಾಲಿ ಷೇರುದಾರರಿಗೆ ತನ್ನ ಷೇರುಗಳನ್ನ (ರೈಟ್ಸ್ ಇಷ್ಯೂ) ಮಾರುವ ಮೂಲಕ 53,124 ಕೋಟಿ ರೂ. ಹಣ ಸಂಗ್ರಹಿಸಿದೆ.