ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಪ್ರಯಾಣಿಕರ ಸಂಖ್ಯೆ ಶೇ 32.9 ಏರಿಕೆ

ಬೆಂಗಳೂರು: ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಮೂಲಕ 2018-19ನೇ ಸಾಲಿನ ಮೊದಲ ತ್ರೈಮಾಸಿಕದಲ್ಲಿ 80 ಲಕ್ಷ ಜನ ಪ್ರಯಾಣ ಮಾಡಿದ್ದು, ಶೇ.32.9ರ ಏರಿಕೆ ಕಂಡಿದೆ. ಅದೇ ರೀತಿ ಕಾರ್ಗೋ ನಿರ್ವಹಣೆಯಲ್ಲೂ ಶೇ.16.6ರಷ್ಟು ಏರಿಕೆಯಾಗಿದೆ.

ಈ ಹಿಂದಿನ ತ್ರೈಮಾಸಿಕದಲ್ಲಿ 66 ಲಕ್ಷ ಮಂದಿ ಪ್ರಯಾಣಿಸಿದ್ದರು. ಆದರೆ, ಈ ಬಾರಿ 69 ಲಕ್ಷ ದೇಶಿಯ ಹಾಗೂ 11 ಲಕ್ಷ ಅಂತಾರಾಷ್ಟ್ರೀಯ ಪ್ರಯಾಣಿಕರು ಸೇರಿ 80 ಲಕ್ಷ ಮಂದಿ ಪ್ರಯಾಣ ಮಾಡಿದ್ದಾರೆ. ಅದರಲ್ಲೂ ಜೂ.30ರಂದು ಒಂದೇ ದಿನ 98,869 ಮಂದಿ ಈ ಏರ್‌ಪೋರ್ಟ್‌ ಮೂಲಕ ಪ್ರಯಾಣಿಸಿದ್ದು ಸಾರ್ವಕಾಲಿಕ ದಾಖಲೆಯಾಗಿದೆ.

ಬೇಸಿಗೆ ರಜೆಯ ಹಿನ್ನೆಲೆಯಲ್ಲಿ ಏರ್‌ಲೈನ್ಸ್‌ ಕಂಪನಿಗಳು ನಾನಾ ಕೊಡುಗೆಗಳನ್ನು ನೀಡಿದ್ದವು. ಹೀಗಾಗಿ ಪ್ರಯಾಣಿಕರ ಸಂಖ್ಯೆ ಹೆಚ್ಚಳವಾಗಿದೆ ಎನ್ನಲಾಗಿದೆ. ಇದೇ ವೇಳೆ ಏರ್‌ ಟ್ರಾಫಿಕ್‌ ಮೂವ್‌ಮೆಂಟ್‌ನಲ್ಲೂ ಶೇ.32.9ರಷ್ಟು ಪ್ರಗತಿ ಕಂಡಿದೆ. 58,054 ವಿಮಾನಗಳು ಟೇಕ್‌ ಆಫ್‌, ಲ್ಯಾಂಡಿಂಗ್‌ ಆಗಿವೆ. ಕಳೆದ ಸಾಲಿನಲ್ಲಿ ಅದು 43,673 ರಷ್ಟಿತ್ತು. ಮೇ.4ರಂದು ಒಂದೇ ದಿನ ದಾಖಲೆಯ 685 ವಿಮಾನಗಳು ಹಾರಾಟ ನಡೆಸಿದ್ದವು.


ಕಾರ್ಗೋ ಸಾಗಣೆ:
ಕಾರ್ಗೊ ಸಾಗಣೆಯಲ್ಲೂ ಏರಿಕೆ ಕಂಡಿದ್ದು, 3 ತಿಂಗಳಲ್ಲಿ 97,486 ಮೆಟ್ರಿಕ್‌ ಟನ್‌ ಸರಕು ಸಾಗಣೆಯಾಗಿದೆ. ಕಳೆದ ಸಾಲಿನಲ್ಲಿ 83,584 ಮೆಟ್ರಿಕ್‌ ಟನ್‌ ಇತ್ತು. ಜೂನ್‌ ತಿಂಗಳೊಂದರಲ್ಲೇ 34,398 ಮೆಟ್ರಿಕ್‌ ಟನ್‌ ಸರಕು ನಿರ್ವಹಣೆಯಾಗಿ ದಾಖಲೆ ನಿರ್ಮಿಸಿದೆ.

ಎಂಟು ದೇಶಿಯ ಮತ್ತು 25 ಅಂತಾರಾಷ್ಟ್ರೀಯ ಏರ್‌ಲೈನ್ಸ್‌ ಸೇರಿ ಒಟ್ಟು 33 ಏರ್‌ಲೈನ್ಸ್‌ಗಳು ಭಾರತದ 45 ನಗರಗಳು ಮತ್ತು ವಿದೇಶದ 22 ನಗರಗಳನ್ನು ಬೆಂಗಳೂರು ಏರ್‌ಪೋರ್ಟ್‌ ಸಂಪರ್ಕಿಸುತ್ತಿದೆ ಮೇ1ರಿಂದ ಗಾಲ್‌ಧಿ ಏರ್‌ ಬೆಂಗಳೂರು-ಬಹ್ರೇನ್‌ ನಡುವೆ ನೇರ ವಿಮಾನ ಸೇವೆ ನೀಡುತ್ತಿದೆ. ಒಟ್ಟು 11 ಕಾರ್ಗೋ ಏರ್‌ಲೈನ್ಸ್‌ಗಳು ಬೆಂಗಳೂರಿನಿಂದ ಕಾರ್ಯಚರಣೆ ಮಾಡುತ್ತಿವೆ.


‘ಹೊಸ ತಂತ್ರಜ್ಞಾನದ ಮೂಲಕ ನಿರ್ವಹಣೆಯನ್ನು ಸರಳಗೊಳಿಸಲಾಗಿದೆ. ಮುಂದಿನ ದಿನಲ್ಲಿ ಇನ್ನಷ್ಟು ಪ್ರಗತಿ ಕಾಣಲಿದ್ದೇವೆ,’’ ಎಂದು ಏರ್‌ಪೋರ್ಟ್‌ ಸಿಇಒ ಹರಿ ಮರಾರ್‌ ಹೇಳಿದ್ದಾರೆ.