ಕೆಎಂಎಫ್‌ನಿಂದ ನವರಾತ್ರಿಯಲ್ಲಿ 120 ಮೆ.ಟನ್‌ ಸಿಹಿ ಉತ್ಪನ್ನ ಮಾರಾಟ - ಬಾಲಚಂದ್ರ ಜಾರಕಿಹೊಳಿ

ಗೋಕಾಕ: ನವರಾತ್ರಿ ಸಂದರ್ಭದಲ್ಲಿ 120 ಮೆಟ್ರಿಕ್‌ ಟನ್ (1.2 ಲಕ್ಷ ಕೆಜಿ)‌ ಸಿಹಿ ಉತ್ಪನ್ನಗಳನ್ನು ಮಾರಾಟ ಮಾಡುವ ಮೂಲಕ ಕೆಎಂಎಫ್‌ ಹೊಸ ದಾಖಲೆ ನಿರ್ಮಿಸಿದೆ ಎಂದು ಕೆಎಂಎಫ್‌ ಅಧ್ಯಕ್ಷರೂ ಆಗಿರುವ ಶಾಸಕ ಬಾಲಚಂದ್ರ ಜಾರಕಿಹೊಳಿ ಹೇಳಿದ್ದಾರೆ.

ನಗರದ ಗೋಕಾಕ ಫಾಲ್ಸ್‌ ರಸ್ತೆಯ ಜೆಎಸ್‌ಎಸ್‌ ಕಾಲೇಜ್‌ ಕಾಂಪ್ಲೆಕ್ಸ್‌ನಲ್ಲಿ ನಂದಿನಿ ಎಕ್ಸ್‌ಕ್ಲೂಸಿವ್‌ ಪಾರ್ಲರ್‌ ಉದ್ಘಾಟಿಸಿ ಅವರು ಮಾತನಾಡಿದರು.

"ಕೆಎಂಎಫ್‌ನಿಂದ ಬಿಹಾರ ಫೆಡರೇಷನ್‌ಗೆ 1,500 ಮೆ.ಟನ್‌ ಕೆನೆಭರಿತ ಹಾಲಿನ ಪುಡಿ, 650 ಮೆ.ಟನ್‌ ಕೆನೆ ರಹಿತ ಹಾಲಿನ ಪುಡಿ ಮತ್ತು 800 ಮೆ.ಟನ್‌ ಬೆಣ್ಣೆ ಮಾರಾಟ ಮಾಡಲು ಆದೇಶ ನೀಡಲಾಗಿದೆ. ಪ್ರಸ್ತುತ ಬೆಣ್ಣೆ 12.6 ಮೆ.ಟನ್‌, ಕೆನೆ ರಹಿತ ಹಾಲಿನ ಪುಡಿ 27.5 ಮೆ.ಟನ್‌ ದಾಸ್ತಾನು ಇದೆ. ಕೆಎಂಎಫ್‌ನ ಒಟ್ಟಾರೆ ಹಾಲಿನ ಶೇಖರಣೆ ಪ್ರತಿದಿನ 80 ಲಕ್ಷ ಲೀಟರ್‌ ಇದೆ,’’ ಎಂದು ಮಾಹಿತಿ ನೀಡಿದರು.

"ಹಾಲು ಮತ್ತು ಮೊಸರು, ಗುಡ್‌ಲೈಫ್‌ ಮತ್ತು ಫ್ಲೆಕ್ಸಿ ಹಾಲಿನ ಮಾರಾಟ ಒಟ್ಟಾರೆ ದಿನಂಪ್ರತಿ 45.80 ಲಕ್ಷ ಲೀಟರ್‌ಗಳಾಗಿದ್ದು, ಇತರೆ ಹೊರ ರಾಜ್ಯದ ಸಹಕಾರಿ ಡೇರಿಗಳಿಗೆ ಸಗಟು ಹಾಲಿನ ಮಾರಾಟ ದಿನಂಪ್ರತಿ 3.52 ಲಕ್ಷ ಲೀಟರ್‌ ಇದೆ," ಎಂದು ತಿಳಿಸಿದರು.