2019ನೇ ಸಾಲಿಗೆ ಶೇ 8.65ರ ಬಡ್ಡಿ ನೀಡಲಿರುವ ಇಪಿಎಫ್‌ಓ: 4.5 ಕೋಟಿ ಭವಿಷ್ಯನಿಧಿ ಚಂದಾದಾರರಿಗೆ ಲಾಭ

ಹೊಸದಿಲ್ಲಿ: 2019ನೇ ಸಾಲಿಗೆ ಶೇ 8.65 ಬಡ್ಡಿದರವನ್ನು ಕಾರ್ಮಿಕ ಸಚಿವಾಲಯ ಮತ್ತು ಭವಿಷ್ಯನಿಧಿ ಮಂಡಳಿ (ಇಪಿಎಫ್‌ಓ) ನಿಗದಿಪಡಿಸಿವೆ. ಭವಿಷ್ಯನಿಧಿ ಮಂಡಳಿ ನಿರ್ದೇಶಕರು ಈ ದರವನ್ನು ಪ್ರಸ್ತಾಪಿಸಿದರು. 2017-18ರಲ್ಲಿ ಶೇ 8.55ರಷ್ಟಿದ್ದ ದರವನ್ನು ಈಗ ಶೇ 0.10ರಷ್ಟು ಹೆಚ್ಚಿಸಲಾಗಿದೆ. 2019ನೇ ವಿತ್ತವರ್ಷದಲ್ಲಿ ಭವಿಷ್ಯ ನಿಧಿ ಮಂಡಳಿಯಲ್ಲಿರುವ ಒಟ್ಟು ಠೇವಣಿಗೆ ಈ ಬಡ್ಡಿದರ ಅನ್ವಯವಾಗಲಿದೆ.

ಕಳೆದ ವರ್ಷ ಇಪಿಎಫ್‌ ಬಡ್ಡಿದರ ಐದು ವರ್ಷಗಳಲ್ಲೇ ಕಡಿಮೆಯಿತ್ತು. ಪ್ರಸ್ತುತ ಅದನ್ನು ಶೇ 0.10ರಷ್ಟು ಹೆಚ್ಚಿಸಿರುವುದರಿಂದ ಸುಮಾರು 4.5 ಕೋಟಿ ಪಿಎಫ್‌ ಚಂದಾದಾರರಿಗೆ ಲಾಭವಾಗಲಿದೆ.

ಹಾಗಿದ್ದರೂ ವಿತ್ತಸಚಿವಾಲಯ ಈ ಬಡ್ಡಿದರ ಏರಿಕೆ ಪ್ರಸ್ತಾವವನ್ನು ಆಕ್ಷೇಪಿಸಿತ್ತು. ಪ್ರಸ್ತಾವವನ್ನು ಮರುಪರಿಶೀಲಿಸುವಂತೆ ಕಾರ್ಮಿಕ ಸಚಿವಾಲಯ ಮತ್ತು ಪಿಎಫ್‌ ಮಂಡಳಿಗೆ ಸೂಚಿಸಿತ್ತು. ಈಗಾಗಲೇ ಠೇವಣಿ ಸಂಗ್ರಹಣೆ ವೆಚ್ಚ ಅಧಿಕವಿರುವುದರಿಂದ ಬ್ಯಾಂಕುಗಳು ಸಾಲದ ಬಡ್ಡಿ ದರ ತಗ್ಗಿಸಲು ನಿರಾಕರಿಸುತ್ತಿವೆ. ಹೀಗಾಗಿ ಠೇವಣಿ ಮೇಲಿನ ಬಡ್ಡಿದರವನ್ನು ಮತ್ತಷ್ಟು ಹೆಚ್ಚಿಸಲು ನಿರಾಕರಿಸುತ್ತಿವೆ. ಪಿಪಿಎಫ್‌ನಂತಹ ಸಣ್ಣ ಉಳಿತಾಯ ಮತ್ತು ಇಪಿಎಫ್‌ಗೆ ಹೆಚ್ಚಿನ ಬಡ್ಡಿ ನೀಡಬೇಕಿದ್ದರೆ, ಇತರ ಠೇವಣಿಗಳ ಮೇಲಿನ ಬಡ್ಡಿಯನ್ನು ಇಳಿಸಬೇಕಾಗುತ್ತದೆ ಎಂದು ಬ್ಯಾಂಕುಗಳು ವಾದಿಸಿವೆ.

ಹಾಗಿದ್ದರೂ ಇಪಿಎಫ್‌ಓ ತನ್ನ ಪ್ರಸ್ತಾಪಿತ ಬಡ್ಡಿ ದರಕ್ಕೆ ಅಂಟಿಕೊಂಡಿದೆ. ಹೆಚ್ಚಿನ ಬಡ್ಡಿ ನೀಡಿದ ಬಳಿಕವೂ ಇಪಿಎಫ್‌ಓ ಬಳಿ 150 ಕೋಟಿ ರೂ.ಗಳ ಹೆಚ್ಚುವರಿ ಲಾಭ ಉಳಿತಾಯವಾವಿರುತ್ತದೆ ಎಂದು ಅದು ತಿಳಿಸಿದೆ.

ಇಪಿಎಫ್‌ಓ ನಿರ್ಧಾರಕ್ಕೆ ವಿತ್ತಸಚಿವಾಲಯ ಶೀಘ್ರವೇ ಅಂತಿಮ ಮುದ್ರೆ ಒತ್ತಲಿದೆ ಎಂದು ಮೂಲಗಳು ತಿಳಿಸಿವೆ.