LIC IPO: ಬಹುನಿರೀಕ್ಷಿತ ಎಲ್‌ಐಸಿ ಐಪಿಒಗೆ ಸೆಬಿ ಒಪ್ಪಿಗೆ, ಆದರೆ ಸದ್ಯಕ್ಕಿಲ್ಲ ಷೇರು ಬಿಡುಗಡೆ!

ಹೊಸದಿಲ್ಲಿ: ಷೇರು ಮಾರುಕಟ್ಟೆ ನಿಯಂತ್ರಕ ಸಂಸ್ಥೆ ಸೆಬಿ ಬಹುನಿರೀಕ್ಷಿತ ಭಾರತಿಯ ಜೀವ ವಿಮಾ ನಿಗಮ (ಎಲ್‌ಐಸಿ)ದ ಐಪಿಒಗೆ ಒಪ್ಪಿಗೆ ನೀಡಿದೆ ಎಂದು ಮೂಲಗಳು ‘ಇಟಿ ನೌ’ಗೆ ತಿಳಿಸಿವೆ.

ಮೂಲಗಳ ಪ್ರಕಾರ ಎಲ್‌ಐಸಿ ಐಪಿಒಗೆ ಸೆಬಿ ವೀಕ್ಷಣಾ ಪತ್ರವನ್ನು ನೀಡಿದ್ದು 22 ದಿನಗಳ ಒಳಗಾಗಿ ಈ ಅನುಮತಿ ಸಿಕ್ಕಿದೆ. ಫೆಬ್ರವರಿಯಲ್ಲಿ ಎಲ್‌ಐಸಿಯು ಆರಂಭಿಕ ಷೇರು ಕೊಡುಗೆ (ಐಪಿಒ) ಸಂಬಂಧ ಕರಡು ದಾಖಲೆಗಳನ್ನು ಸೆಬಿಗೆ ಸಲ್ಲಿಸಿತ್ತು.

ಕಂಪನಿಯಲ್ಲಿ ಕೇಂದ್ರ ಸರಕಾರ ಶೇ. 100ರಷ್ಟು ಷೇರನ್ನು ಹೊಂದಿದ್ದು 31.62 ಕೋಟಿ (31,62,49,885) ಷೇರುಗಳನ್ನು ಮಾರಾಟ ಮಾಡಲಿದೆ. ಇದರಲ್ಲಿ ಶೇ. 50ರಷ್ಟು ಷೇರುಗಳು ಅರ್ಹ ಸಾಂಸ್ಥಿಕ ಖರೀದಿದಾರ (ಕ್ಯೂಐಬಿ)ರಿಗೆ ಮೀಸಲಾಗಿಡಲಾಗುತ್ತದೆ. ಸಾಂಸ್ಥಿಕೇತರ ಹೂಡಿಕೆದಾರರಿಗೆ ಶೇ. 15ರಷ್ಟು ಷೇರುಗಳನ್ನು ಮೀಸಲಿಡಲಾಗುತ್ತದೆ. ಉಳಿದ ಶೇ. 35 ಷೇರುಗಳನ್ನು ಸಾರ್ವಜನಿಕರಿಗೆ ನೀಡಲಾಗುತ್ತದೆ.

ಇದರಲ್ಲಿಯೂ ಕಂಪನಿಯ ಅರ್ಹ ಉದ್ಯೋಗಿಗಳು ಮತ್ತು ಪಾಲಿಸಿದಾರರಿಗೆ ಒಂದಿಷ್ಟು ಷೇರುಗಳನ್ನು ಮೀಸಲಿಡಲಾಗುತ್ತದೆ ಎಂದು ಡಿಆರ್‌ಎಚ್‌ಪಿ (ಡ್ರಾಫ್ಟ್‌ ರೆಡ್‌ ಹೆರಿಂಗ್‌ ಪ್ರಾಸ್ಪೆಕ್ಟಸ್‌)ನಲ್ಲಿ ಹೇಳಲಾಗಿದೆ. ಆಂಕರ್‌ ಹೂಡಿಕೆ ಭಾಗದಲ್ಲಿ ಮೂರನೇ ಒಂದು ಭಾಗ ದೇಶದ ಮ್ಯೂಚುವಲ್‌ ಫಂಡ್‌ಗಳಿಗೆ ಮೀಸಲಿಡಲಾಗುತ್ತದೆ.

ಈ ಹಿಂದಿನ ಯೋಜನೆ ಪ್ರಕಾರ ಇದೇ ಮಾರ್ಚ್‌ನಲ್ಲಿ ಐಪಿಒ ನಡೆಯಬೇಕಾಗಿತ್ತು. ಆದರೆ ರಷ್ಯಾ - ಉಕ್ರೇನ್‌ ಯುದ್ಧದಿಂದಾಗಿ ಷೇರು ವಿನಿಮಯ ಮಾರುಕಟ್ಟೆಯಲ್ಲಿ ಅಲ್ಲೋಲ ಕಲ್ಲೋಲ ಸೃಷ್ಟಿಯಾಗಿದ್ದು ಸರಕಾರ ಆರಂಭಿಕ ಷೇರು ಕೊಡುಗೆಯನ್ನು ಮುಂದಿನ ಹಣಕಾಸು ವರ್ಷಕ್ಕೆ ಮುಂದೂಡಿಕೆ ಮಾಡುವುದು ಬಹುತೇಕ ನಿಚ್ಚಳವಾಗಿದೆ.

ಸರಕಾರ ಎಲ್‌ಐಸಿಯಲ್ಲಿರುವ ಶೇ. 5ರಷ್ಟು ಷೇರುಗಳನ್ನು ಮಾರಾಟ ಮಾಡಲು ಮುಂದಾಗಿದ್ದು ಈ ಮೂಲಕ ಸುಮಾರು 60,000 ಕೋಟಿ ರೂ. ಸಂಗ್ರಹಿಸುವ ಗುರಿ ಹಾಕಿಕೊಂಡಿದೆ. ಈ ಮೂಲಕ ಆದಾಯ ಕೊರತೆಯನ್ನು ಸ್ವಲ್ಪ ಮಟ್ಟಿಗೆ ನೀಗಿಸಲು ಹೊರಟಿದೆ.

ಒಮ್ಮೆ ಸೆಬಿ ಐಪಿಒಗೆ ಅನುಮತಿ ನೀಡಿದರೆ, ಇದು 12 ತಿಂಗಳವರೆಗೆ ಮಾನ್ಯವಾಗಿರುತ್ತದೆ. ಇದರ ಮೊದಲು ಐಪಿಒ ನಡೆಸಬೇಕಾಗುತ್ತದೆ.

ವಿಮಾ ವಲಯದಲ್ಲಿ ಹೇಗಿದೆ ಎಲ್‌ಐಸಿ ಹಿಡಿತ?

ಇತ್ತೀಚಿನ ಟಿಪ್ಪಣಿಯಲ್ಲಿ ಎಡೆಲ್‌ವೀಸ್, ದಶಕಗಳಿಂದ ವಿಮಾ ಮಾರುಕಟ್ಟೆಯಲ್ಲಿ ಎಲ್‌ಐಸಿ ಪ್ರಾಬಲ್ಯ ಹೊಂದಿದ್ದು, ಹೊಸ ವಿಮೆ ಪ್ರೀಮಿಯಂಗಳಲ್ಲಿ ಶೇ. 66ರಷ್ಟು ಪಾಲನ್ನು ಹೊಂದಿದೆ. ಈ ಮೂಲಕ ತನ್ನ ನಂತರದ ಪ್ರತಿಸ್ಪರ್ಧಿಗಿಂತ ಮೂರು ಪಟ್ಟಿಗೂ ಹೆಚ್ಚಿನ ಮಾರುಕಟ್ಟೆ ಪಾಲು ಹೊಂದಿದೆ. ಆಸ್ತಿ ನಿರ್ವಹಣೆ ವಿಚಾರಕ್ಕೆ ಬಂದಾಗ ಎಲ್‌ಐಸಿಯು ಶೇ. 80ರಷ್ಟು ಆಸ್ತಿ ನಿರ್ವಹಿಸುತ್ತಿದ್ದು, ಎರಡನೇ ಸ್ಥಾನದಲ್ಲಿರುವ ಕಂಪನಿಗಿಂತ 15 ಪಟ್ಟು ಹೆಚ್ಚಿನ ಆಸ್ತಿಯನ್ನು ನಿರ್ವಹಿಸುತ್ತಿದೆ ಎಂದು ಹೇಳಿದೆ.

ಅಲ್ಲದೆ, ಪಾಲಿಸಿ ಆಧಾರದಲ್ಲಿ ಶೇ. 75ರಷ್ಟು ಮಾರುಕಟ್ಟೆ ಪಾಲನ್ನು ಭಾರತೀಯ ಜೀವ ವಿಮಾನ ನಿಗಮ ಆಳವಾಗಿ ತಲುಪಿದೆ ಎಂದು ಎಡೆಲ್‌ವೀಸ್ ವಿಶ್ಲೇಷಿಸಿದೆ. ಇಂತಹ ಪ್ರಬಲ ಕಂಪನಿಯ ಷೇರುಗಳಿಗಾಗಿ ಹೂಡಿಕೆದಾರರು ಕಾತರದಿಂದ ಕಾಯುತ್ತಿದ್ದಾರೆ.

ತೀಕ್ಷ್ಣ ಒಳನೋಟ ಹಾಗೂ 20ಕ್ಕೂ ಹೆಚ್ಚು ವಲಯಗಳ ವಿಸ್ತೃತ ಮಾಹಿತಿ ಒಳಗೊಂಡ 'ಎಕನಾಮಿಕ್ ಟೈಮ್ಸ್' ವಿಶೇಷ ಲೇಖನಗಳಿಗಾಗಿ ಈಗಲೇ ಸಬ್‌ಸ್ಕ್ರೈಬ್ ಆಗಿ.