ಪೆಟ್ರೋಲ್‌, ಡೀಸೆಲ್‌ ಕಾರು ಖರೀದಿಸುವವರಿಗೆ ಕಾದಿದೆ ಶಾಕ್‌!

ಹೊಸದಿಲ್ಲಿ: ಒಂದು ವೇಳೆ ಭಾರತ ಈಗಿಂದೀಗಲೇ ಎಲೆಕ್ಟ್ರಿಕ್‌ ಕಾರುಗಳನ್ನು ಬಳಕೆ ಮಾಡಲು ತೀರ್ಮಾನಿಸಿದರೆ ಇಂಧನ ವೆಚ್ಚ 2030ರ ವೇಳೆಗೆ ಸುಮಾರು 6000 ಕೋಟಿ ಡಾಲರ್‌ನ್ನು ಉಳಿಸ ಬಹುದು. ಅಲ್ಲದೇ ಒಂದು ಗಿಗಾಟನ್‌ಗಳಷ್ಟು ಕಾರ್ಬನ್‌ ಹೊರಸೂಸುವಿಕೆಯನ್ನು ತಡೆಗಟ್ಟಬಹದು ಎಂದು ಚಿಂತಕರ ಚಾವಡಿ ನಡೆಸಿದ ಸರ್ವೆ ವೇಳೆ ತಿಳಿದು ಬಂದಿದೆ.

ವಾಯು ಮಾಲಿನ್ಯ ತಡೆಗಟ್ಟುವ ನಿಟ್ಟಿನಲ್ಲಿ ನೀತಿ ಆಯೋಗ ಹೊಸ ಚಿಂತನೆ ನಡೆಸಿದ್ದು ಈ ಕುರಿತು ಚಿಂತಕರ ಚಾವಡಿ ನಡೆಸಿದ ಸರ್ವೆಯಲ್ಲಿ, ಒಂದು ವೇಳೆ ಮುಂದಿನ ದಿನಗಳಲ್ಲಿ ದೇಶ ಹೆಚ್ಚಿನ ಪ್ರಮಾಣದಲ್ಲಿ ವಿದ್ಯುತ್‌ ಚಾಲಿತ ವಾಹನ ಮತ್ತು ಶೇರಿಂಗ್‌ ವಾಹನಗಳನ್ನು ಬಳಸಿದರೆ ಅಧಿಕ ಪ್ರಮಾಣದಲ್ಲಿ ಇಂಧನ ಉಳಿತಾಯ ಮಾಡಬಹುದು ಎಂದು ತಿಳಿಸಿದೆ.

ಪ್ರಧಾನಿ ನರೇಂದ್ರ ಮೋದಿ ಅಧ್ಯಕ್ಷತೆಯ ನೀತಿ ಆಯೋಗವು, ಡೀಸೆಲ್‌ ಮತ್ತು ಪೆಟ್ರೋಲ್‌ ಕಾರುಗಳ ಖರೀದಿಗೆ ಲಾಟರಿ ವ್ಯವಸ್ಥೆ ಮಾಡುವಂತೆ ಸೂಚಿಸಿದ್ದು, ಇದರ ಜತೆಯಲ್ಲಿಯೇ ಎಲೆಕ್ಟ್ರಿಕ್‌ ವಾಹನಗಳ ಬಳಕೆ ಉತ್ತೇಜಿಸಲು ಸಬ್ಸಿಡಿ ಸೇರಿದಂತೆ ಹಲವು ಕ್ರಮಗಳನ್ನು ಕೈಗೊಳ್ಳಲು ಶಿಫಾರಸು ಮಾಡಿದೆ.

ಈ ವರದಿಯನ್ನು ನೂತನ ಹಸಿರು ಕಾರು ನೀತಿ ಮೂಲಕ ಜಾರಿಗೊಳಿಸಬಹುದು ಎಂದು ಮೂಲಗಳು ಸುದ್ದಿಸಂಸ್ಥೆ ರಾಯ್ಟರ್ಸ್‌ಗೆ ತಿಳಿಸಿದೆ.