ಕೋವಿಡ್‌ ನಿರ್ಬಂಧಗಳ ಹಿನ್ನೆಲೆ: ಕಿಕ್‌ ಏರದ ಮದ್ಯ ಮಾರಾಟ

ಬೆಂಗಳೂರು: ಕೋವಿಡ್‌-19 ಸೋಂಕು ಹಿನ್ನೆಲೆಯಲ್ಲಿ ಕೈಗೊಂಡ ಬಿಗಿ ಕ್ರಮಗಳಿಂದ ಹೊಸ ವರ್ಷಾಚರಣೆಗೂ ಬ್ರೇಕ್‌ ಬಿದ್ದಿರುವ ಹಿನ್ನೆಲೆಯಲ್ಲಿ ಈ ಬಾರಿ 2020ರ ವರ್ಷಾಂತ್ಯದಲ್ಲಿ ಮದ್ಯ ಮಾರಾಟ ಖದರ್‌ ಅಷ್ಟೇನೂ ಏರಿಕೆಯಾಗಿಲ್ಲ.

ಆದರೆ, ಮಾರಾಟ ಪ್ರಮಾಣ ತೀವ್ರ ಕುಸಿತವೂ ಆಗಿಲ್ಲ. ಈ ವರ್ಷ ಡಿ.24 ರಿಂದ 31ರವರೆಗೆ 7 ದಿನಗಳಲ್ಲಿ 844.59 ಕೋಟಿ ರೂ. ಮೌಲ್ಯದ ಮದ್ಯ ಮಾರಾಟವಾಗಿದ್ದು, ಸರಕಾರಕ್ಕೆ 519.21 ಕೋಟಿ ರೂ. ಆದಾಯ ಬಂದಿದೆ. 2019ರ ಡಿ.24 ರಿಂದ ಡಿ.31 ರ ತನಕದ ಏಳು ದಿನಗಳಲ್ಲಿ ಒಟ್ಟು 878.25 ಕೋಟಿ ರೂ. ಮೌಲ್ಯದ ಐಎಂಎಲ್‌ ಹಾಗೂ ಬಿಯರ್‌ ಖರೀದಿಯಾಗಿತ್ತು. ಅದಕ್ಕೆ ಹೋಲಿಸಿದರೆ 33.66 ಕೋಟಿ ರೂ. ನಷ್ಟು ಕಡಿಮೆ ಮದ್ಯ ಮಾರಾಟ ದಾಖಲಾಗಿದೆ. ಇದರಿಂದ ಅಬಕಾರಿ ಇಲಾಖೆಗೆ ಬರೋಬ್ಬರಿ 500 ಕೋಟಿ ರೂ. ಆದಾಯ ಸಂಗ್ರಹವಾಗಿತ್ತು.

ಹಾಗಾಗಿ, 2019ರ ವಹಿವಾಟಿಗೆ ಹೋಲಿಸಿದರೆ 2020ರಲ್ಲಿ ಕೊರೊನಾ ಮತ್ತು ಹಲವು ನಿರ್ಬಂಧಗಳ ಹಿನ್ನೆಲೆಯಲ್ಲಿ ಮದ್ಯ ವ್ಯಾಪಾರ ಜೋರಾಗಿಲ್ಲ. ಹಾಗಾಗಿ, ಮದ್ಯ ವಹಿವಾಟು ನಿರೀಕ್ಷಿತ ಮಟ್ಟದಲ್ಲಿ ನಡೆದಿಲ್ಲ ಎನ್ನುತ್ತಾರೆ ಅಬಕಾರಿ ಅಧಿಕಾರಿಗಳು.

ಬೆಂಗಳೂರಿನಲ್ಲೇ 283 ಕೋಟಿ ರೂ. ಮದ್ಯ ವ್ಯಾಪಾರ

ಬೆಂಗಳೂರು ನಗರದಲ್ಲಿ 2020ರ ಡಿ.24ರಿಂದ 31ರವರೆಗೆ 283.77 ಕೋಟಿ ರೂ. ಮೌಲ್ಯದ ಮದ್ಯ ಮಾರಾಟವಾಗಿದೆ ಎನ್ನುತ್ತವೆ ಅಬಕಾರಿ ಇಲಾಖೆ ನೀಡಿರುವ ಅಂಕಿ- ಅಂಶಗಳು. 2019 ರಲ್ಲಿ 285.45 ಕೋಟಿ ರೂ. ಮೌಲ್ಯದ ಮದ್ಯ ಮಾರಾಟವಾಗಿತ್ತು. ಅದಕ್ಕೆ ಹೋಲಿಸಿದರೆ ಮದ್ಯ ವ್ಯಾಪಾರ ಕುಸಿದಿದೆ.