ಆಟೊ, ಸಿಮೆಂಟ್‌ ವಲಯಕ್ಕೆ ಜಿಎಸ್‌ಟಿ ಇಳಿಕೆ?

ಹೊಸದಿಲ್ಲಿ : ಮೋದಿ 2.0 ಸರಕಾರದ ಅಡಿಯಲ್ಲಿ ಜಿಎಸ್‌ಟಿ ಮಂಡಳಿಯ ಮೊದಲ ಸಭೆ ಶುಕ್ರವಾರ ನಡೆಯಲಿದ್ದು, ಆಟೊಮೊಬೈಲ್‌, ಸಿಮೆಂಟ್‌ ವಲಯಕ್ಕೆ ಜಿಎಸ್‌ಟಿ ದರ ಇಳಿಕೆಯನ್ನು ನಿರೀಕ್ಷಿಸಲಾಗಿದೆ. ಜಿಎಸ್‌ಟಿ ಪದ್ಧತಿಯ ಸುಧಾರಣೆ ಅಂದಾಜಿಸಲಾಗಿದೆ.

ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್‌ ಅಧ್ಯಕ್ಷತೆಯಲ್ಲಿ ಸಭೆ ನಡೆಯಲಿದೆ. ಬಯಸಿದೆ. ಆಟೊಮೊಬೈಲ್‌ ವಲಯದ ಸಂಘಟನೆ ಸಿಯಾಮ್‌ ಕಾರುಗಳಿಗೆ ಶೇ.28ರಿಂದ ಶೇ.18ಕ್ಕೆ ಜಿಎಸ್‌ಟಿ ಕಡಿತ ಮಾಡಬೇಕು ಎಂದು ಒತ್ತಾಯಿಸಿದೆ. ಆದರೆ ಮಾರುತಿ ಸುಜುಕಿಯ ಅಧ್ಯಕ್ಷ ಆರ್‌.ಸಿ ಭಾರ್ಗವ ಅವರು ಜಿಎಸ್‌ಟಿ ದರ ಕಡಿತದ ಅಗತ್ಯ ಇಲ್ಲ ಎಂದು ಪ್ರತಿಕ್ರಿಯಿಸಿದ್ದಾರೆ ಎಂದು ವರದಿಯಾಗಿದೆ. ದೇಶದಲ್ಲಿ ಮೂಲ ಸೌಕರ್ಯ ಅಭಿವೃದ್ಧಿಯ ತುರ್ತು ಅಗತ್ಯ ಇದೆ. ಇದಕ್ಕಾಗಿ ಸರಕಾರಕ್ಕೂ ತೆರಿಗೆ ಆದಾಯದ ಅಗತ್ಯ ಇದೆ. ತೆರಿಗೆ ದರ ಇಳಿಸುವುದರಿಂದ ಮೂಲಸೌಕರ್ಯ ಕುಂಠಿತವಾಗಲಿದೆ. ಇದು ಆಟೊಮೊಬೈಲ್‌ ವಲಯದ ವ್ಯಾಪಾರಕ್ಕೂ ಹಿನ್ನಡೆಯಾಗಿ ಪರಿಣಮಿಸಲಿದೆ ಎಂದವರು ಹೇಳಿದ್ದಾರೆ.

ಜಿಎಸ್‌ಟಿ ಮಂಡಳಿಯ ಸಭೆ ಶುಕ್ರವಾರ ನಡೆಯಲಿದ್ದು, ಕೆಲ ಸುಧಾರಣೆಯ ನಿರ್ಧಾರಗಳನ್ನು ಕೈಗೊಳ್ಳುವ ಸಾಧ್ಯತೆ ಇದೆ. ಜಿಎಸ್‌ಟಿ ರಿಫಂಡ್‌ಗೆ ಏಕೀಕೃತ ವ್ಯವಸ್ಥೆ, (ಸಿಂಗಲ್‌ ಪಾಯಿಂಟ್‌ ರಿಫಂಡ್‌ ಸಿಸ್ಟಮ್‌) ಜಿಎಸ್‌ಟಿಯ ಆ್ಯಂಟಿ ಪ್ರಾಫಿಟರಿಂಗ್‌ ಅಥಾರಿಟಿಯ ಅವಧಿ ವಿಸ್ತರಣೆಯ ನಿರ್ಧಾರ ಪ್ರಕಟವಾಗುವ ನಿರೀಕ್ಷೆ ಇದೆ. ಇ-ಇನ್‌ವಾಯ್ಸ್‌ಗಳ ಸಮಸ್ಯೆಗಳ ನಿವಾರಣೆ, 2020ರ ವೇಳೆಗೆ ಜಿಎಸ್‌ಟಿ ಇ-ವೇ ಬಿಲ್‌ ಸಿಸ್ಟಮ್‌ ಮತ್ತು ಎನ್‌ಎಚ್‌ಎಐನ ಫಾಸ್ಟ್ಯಾಗ್‌ ವ್ಯವಸ್ಥೆಯ ಸಂಯೋಜನೆ ಬಗ್ಗೆ ಚರ್ಚೆ ನಿರೀಕ್ಷಿಸಲಾಗಿದೆ.

ದೇಶದಲ್ಲಿ ಎಲೆಕ್ಟ್ರಿಕ್‌ ವಾಹನಗಳಿಗೆ ಜಿಎಸ್‌ಟಿ ದರ ಶೇ.12ರಿಂದ ಶೇ.5ಕ್ಕೆ ಇಳಿಕೆಯಾಗುವ ನಿರೀಕ್ಷೆ ಇದೆ. ಜಿಎಸ್‌ಟಿ ಮಂಡಳಿಯ ಜೂನ್‌ 21ರ ಸಭೆಯಲ್ಲಿ ಈ ಬಗ್ಗೆ ನಿರ್ಧಾರ ಪ್ರಕಟವಾಗುವ ಸಾಧ್ಯತೆ ಇದೆ.

ಮೋದಿ 2.0 ಸರಕಾರ ಅಸ್ತಿತ್ವಕ್ಕೆ ಬಂದ ನಂತರ ಜಿಎಸ್‌ಟಿ ಮಂಡಳಿಯ ಮೊದಲ ಸಭೆ ಇದಾಗಿದ್ದು, ಎಲೆಕ್ಟ್ರಿಕ್‌ ವಾಹನ ವಲಯಕ್ಕೆ ಉತ್ತೇಜನ ನಿರೀಕ್ಷಿಸಲಾಗಿದೆ. ಪರಿಸರ ಮಾಲಿನ್ಯ ನಿಯಂತ್ರಣ ಹಾಗೂ ಪೆಟ್ರೋಲ್‌- ಡೀಸೆಲ್‌ ಮೇಲಿನ ಅವಲಂಬನೆಯನ್ನು ತಗ್ಗಿಸಲು ಭಾರತ ಕ್ರಮೇಣ ಎಲೆಕ್ಟ್ರಿಕ್‌ ವಾಹನಗಳಿಗೆ ಪರಿವರ್ತನೆ ಹೊಂದಲು ಬಯಸಿದೆ.