ಎಲ್‌ಪಿಜಿ ಸಿಲಿಂಡರ್‌ ದರ 2 ರೂ. ಏರಿಕೆ

ಹೊಸದಿಲ್ಲಿ: ಎಲ್‌ಪಿಜಿ ಅಡುಗೆ ಅನಿಲದ ಸಿಲಿಂಡರ್‌ ದರ 2 ರೂಪಾಯಿ ಏರಿಕೆಯಾಗಿದೆ. ಎಲ್‌ಪಿಜಿ ಡೀಲರ್‌ಗಳಿಗೆ ನೀಡುವ ಕಮಿಷನ್‌ ಮೊತ್ತವನ್ನು ಕೇಂದ್ರ ಸರಕಾರ ಹೆಚ್ಚಿಸಿದ್ದು, ಈ ಪರಿಣಾಮ ಸಿಲಿಂಡರ್‌ ದರದಲ್ಲಿ ಹೆಚ್ಚಳವಾಗಿದೆ.

ರಾಜಧಾನಿ ಹೊಸದಿಲ್ಲಿಯಲ್ಲಿ 14.2 ಕೆ.ಜಿ.ಸಬ್ಸಿಡಿ ಸಿಲಿಂಡರ್‌ ದರ ಈಗ ರೂ.505.34ರಿಂದ ರೂ. 507.42ಕ್ಕೆ ಏರಿಕೆಯಾಗಿದೆ. ಕೇಂದ್ರ ಇಂಧನ ಸಚಿವಾಲಯದ ಆದೇಶದನ್ವಯ ಏರಿಕೆ ಜಾರಿಗೆ ಬಂದಿದೆ.

ಕಳೆದ ಸಲ, ಅಂದರೆ 2017ರ ಸೆಪ್ಟೆಂಬರ್‌ನಲ್ಲಿ 14.2 ಕೆ.ಜಿ ಮತ್ತು 5 ಕೆ.ಜಿ ಸಿಲಿಂಡರ್‌ಗಳಿಗೆ ಸ್ಥಳೀಯ ಎಲ್‌ಪಿಜಿ ವಿತರಕರಿಗೆ ಕ್ರಮವಾಗಿ ರೂ.48.89 ಮತ್ತು ರೂ.24.20 ಕಮಿಷನ್‌ ನಿಗದಿ ಪಡಿಸಲಾಗಿತ್ತು. ಈಗ ಮತ್ತೆ 2 ರೂ. ಏರಿಕೆ ಮಾಡಲಾಗಿದೆ. ಈ ತಿಂಗಳಲ್ಲಿ ಎಲ್‌ಪಿಜಿ ಸಿಲಿಂಡರ್‌ ದರದಲ್ಲಿ ಆಗುತ್ತಿರುವ ಎರಡನೇ ಹೆಚ್ಚಳ ಇದಾಗಿದೆ. ತೆರಿಗೆ ಹೊಂದಾಣಿಕೆ ಕಾರಣಕ್ಕೆ ನ.1ರಂದು ಸಿಲಿಂಡರ್‌ ಮೂಲ ಬೆಲೆಯಲ್ಲಿ ಅಂದರೆ ಸಿಲಿಂಡರ್‌ವೊಂದಕ್ಕೆ ರೂ.2.94 ಹೆಚ್ಚಳ ಮಾಡಲಾಗಿತ್ತು. ಜಿಎಸ್‌ಟಿ ಪದ್ಧತಿ ಜಾರಿಗೆ ಬಂದ ಬಳಿಕ ಜೂನ್‌ನಿಂದ ಪ್ರತಿ ತಿಂಗಳೂ ಎಲ್‌ಪಿಜಿ ಸಿಲಿಂಡರ್‌ ದರದಲ್ಲಿ ಏರಿಕೆಯಾಗಿದೆ. ಈ ತನಕ ಒಟ್ಟು ಬೆಲೆ ರೂ.16.21 ಏರಿಕೆಯಾಗಿದೆ.

ಮುಂಬಯಿನಲ್ಲಿ 14.2 ಕೆ.ಜಿ. ಅಡಿಗೆ ಅನಿಲ ಸಿಲೆಂಡರ್‌ ಬೆಲೆ ಈಗ ರೂ.505.05ಕ್ಕೆ ಮುಟ್ಟಿದೆ. ಚೆನ್ನೈನಲ್ಲಿ ರೂ.495.39 ಇದೆ.