ಎಲ್‌ಪಿಜಿ ದರ ಮತ್ತೆ 50 ರೂ. ಏರಿಕೆ, ಒಂದೇ ತಿಂಗಳಲ್ಲಿ 100 ರೂ. ಏರಿಕೆ!

ಹೊಸದಿಲ್ಲಿ: ಎರಡು ವಾರಗಳ ಹಿಂದಷ್ಟೇ ಗೃಹ ಬಳಕೆ ಎಲ್‌ಪಿಜಿ ಸಿಲಿಂಡರ್‌ ದರ ದಿಢೀರ್‌ 50 ರೂ. ಏರಿಕೆಯಿಂದ ಕಂಗಾಲಾಗಿದ್ದ ಗ್ರಾಹಕರಿಗೆ ಬುಧವಾರ ಮತ್ತೊಂದು ಶಾಕ್‌ ತಟ್ಟಿದೆ. ಸಬ್ಸಿಡಿಯುಕ್ತ ಅಡುಗೆ ಅನಿಲ (ಎಲ್ಪಿಜಿ) ಸಿಲಿಂಡರ್‌ ದರವನ್ನು ಮತ್ತೆ 50 ರೂ. ಏರಿಸಲಾಗಿದೆ.

ಇದರೊಂದಿಗೆ ಕಳೆದ 15 ದಿನದಲ್ಲಿ ಎರಡು ಬಾರಿ ದರ ಏರಿಕೆಯಾದಂತಾಗಿದ್ದು, ಸಿಲಿಂಡರ್‌ ದರ ಒಟ್ಟು 100 ರೂ. ಜಿಗಿದಂತಾಗಿದೆ.
ಈ ಮುನ್ನ, ಡಿಸೆಂಬರ್‌ 2ರಿಂದ ಸದ್ದಿಲ್ಲದೇ ಸಾರ್ವಜನಿಕ ತೈಲ ಮಾರುಕಟ್ಟೆ ಕಂಪನಿಗಳು ಎಲ್‌ಪಿಜಿ ದರವನ್ನು ಹೆಚ್ಚಿಸಿದ್ದವು. ಈಗ ಡಿ.15ರಿಂದಲೇ ಜಾರಿಯಾಗುವಂತೆ ಮತ್ತೊಂದು ಸುತ್ತು ದರ ಏರಿಕೆ ಮಾಡಲಾಗಿದೆ. ಈಗಾಗಲೇ ಕೋವಿಡ್‌ ಸಾಂಕ್ರಾಮಿಕದಿಂದ ಹಣಕಾಸು ಬಿಕ್ಕಟ್ಟು, ಪೆಟ್ರೋಲ್‌ ಮತ್ತು ಡೀಸೆಲ್‌ ದರ ಏರಿಕೆ ಪೆಟ್ಟು, ಹಣದುಬ್ಬರ ಹೆಚ್ಚಳದಿಂದ ಹೈರಾಣಾಗಿರುವ ಸಾಮಾನ್ಯ ಜನತೆಗೆ ಗಾಯದ ಮೇಲೆ ಬರೆ ಎಳೆದಂತಾಗಿದೆ.

ಡಿಸೆಂಬರ್‌ಗೂ ಮೊದಲು ಜುಲೈನಲ್ಲಿ ಕೊನೆಯ ಬಾರಿಗೆ ದರ ಪರಿಷ್ಕರಣೆಯಾಗಿತ್ತು. ಕಚ್ಚಾತೈಲ ಬೆಲೆ ಇಳಿಕೆ ಹಾಗೂ ಲಾಕ್‌ಡೌನ್‌ ಹಿನ್ನೆಲೆಯಲ್ಲಿ ದರ ಹೆಚ್ಚಳಕ್ಕೆ ಮುಂದಾಗಿರಲಿಲ್ಲ. 5 ತಿಂಗಳಿನ ನಂತರ ಅಡುಗೆ ಅನಿಲ ದರವನ್ನು ಒಟ್ಟಿಗೆ 50 ರೂ. ಹೆಚ್ಚಿಸಲಾಗಿತ್ತು.

ಗೃಹಬಳಕೆ ಎಲ್‌ಪಿಜಿ ಗ್ರಾಹಕರಿಗೆ ಬೆಲೆ ಏರಿಕೆ ಬಿಸಿ: ಸಿಲಿಂಡರ್‌ಗೆ ₹50 ಏರಿಕೆ!
ಸಬ್ಸಿಡಿಯೂ ಸ್ಥಗಿತ

ಪ್ರತಿ ಕುಟುಂಬಕ್ಕೆ ವರ್ಷಕ್ಕೆ 12 ಗೃಹ ಬಳಕೆ ಎಲ್‌ಪಿಜಿ ಸಿಲಿಂಡರ್‌ಗೆ ಸರಕಾರ ನೀಡುತ್ತಿದ್ದ ಸಬ್ಸಿಡಿ ಕಳೆದ ಆರು ತಿಂಗಳಿಂದ ಗ್ರಾಹಕರಿಗೆ ದೊರೆಯುತ್ತಿಲ್ಲ. ಸಬ್ಸಿಡಿ ಮೊತ್ತವನ್ನು ಸಿಲಿಂಡರ್‌ ಖರೀದಿಸಿದ ಗ್ರಾಹಕರ ಬ್ಯಾಂಕ್‌ ಖಾತೆಗೆ ಹಾಕಲಾಗುತ್ತಿತ್ತು. ಆದರೆ, ಕಳೆದ ಮೇ ನಂತರ ಅಂತಾರಾಷ್ಟ್ರೀಯ ಕಚ್ಚಾ ತೈಲ ದರ ತೀವ್ರ ಕುಸಿದ ಪರಿಣಾಮ, ಸರಕಾರದ ತೈಲದ ಖರೀದಿ ದರವು ಮಾರುಕಟ್ಟೆ ದರಕ್ಕೆ ಇಳಿಮುಖವಾಗಿತ್ತು. ಹೀಗಾಗಿ ಎಲ್‌ಪಿಜಿ ಬಳಕೆದಾರರಿಗೆ ಯಾವುದೇ ಸಬ್ಸಿಡಿಯನ್ನು ಸರಕಾರ ನೀಡಿರಲಿಲ್ಲ. ದರ ಏರಿಕೆಯಾದರೂ ಸಬ್ಸಿಡಿ ಆರಂಭಿಸದಿರುವುದರಿಂದ ಗ್ರಾಹಕರಿಗೆ ಹೊರೆಯಾಗಿದೆ.

ಪರಿಷ್ಕೃತ ದರ (14.2 ಕೆ.ಜಿ. ಸಿಲಿಂಡರ್‌)

ಬೆಂಗಳೂರು: 697 ರೂ.
ಚೆನ್ನೈ: 710 ರೂ.
ಕೋಲ್ಕೊತಾ: 720
ಮುಂಬಯಿ: 694
ದಿಲ್ಲಿ: 694

ಇದೇ ವೇಳೆ ವಿಮಾನ ಇಂಧನ ದರ ಕೂಡ ಕಿಲೋ ಲೀ.ಗೆ 2,941 ರೂ. ಹೆಚ್ಚಳವಾಗಿದೆ.