ಹೊಸದಿಲ್ಲಿ: ಐಷಾರಾಮಿ ಕಾರುಗಳಿಗೆ ಗರಿಷ್ಠ ಶೇ.25ರಷ್ಟು ಸೆಸ್‌ ವಿಧಿಸುವ ಸುಗ್ರೀವಾಜ್ಞೆಗೆ ಕೇಂದ್ರ ಸಚಿವ ಸಂಪುಟ ಸಭೆಯು ಬುಧವಾರ ಅಂಗೀಕಾರ ನೀಡಿದೆ. ಪ್ರಸ್ತುತ ಶೇ.15ರಷ್ಟಿರುವ ಸೆಸ್‌ ಇನ್ನು ಮುಂದೆ ಶೇ.25ಕ್ಕೆ ಏರಲಿದೆ.
ಜಿಎಸ್‌ಟಿ ಪರಿಹಾರ ಕಾಯ್ದೆಗೆ ತಿದ್ದುಪಡಿ ತಂದು ಮಧ್ಯಮ ಮತ್ತು ಬೃಹತ್‌ ಗಾತ್ರದ ಐಷಾರಾಮಿ ಕಾರುಗಳ ಮೇಲಿನ ಸೆಸ್‌ ಹೆಚ್ಚಳಕ್ಕೆ ಸಂಪುಟವು ಅನುವು ಮಾಡಿಕೊಟ್ಟಿದೆ. ಜು.1ರಂದು ಜಿಎಸ್‌ಟಿ ಜಾರಿಯಾದ ನಂತರ ಎಸ್‌ಯುವಿ, ಮಧ್ಯಮ ಗಾತ್ರ, ದೊಡ್ಡ ಹಾಗೂ ಐಷಾರಾಮಿ ಕಾರುಗಳ ಬೆಲೆ ಸ್ವಲ್ಪ ಮಟ್ಟಿಗೆ ಇಳಿಕೆಯಾಗಿತ್ತು. ಇದೀಗ ಸೆಸ್‌ ಹೆಚ್ಚಳವಾಗಲಿದ್ದು, ಕಾರ್‌ ದರಗಳು ಏರಿಕೆಯಾಗಲಿವೆ.
'ಸೆಸ್‌ ಹೆಚ್ಚಳ ಕುರಿತಾಗಿ ಜಿಎಸ್‌ಟಿ ಮಂಡಳಿ ಕೈಗೊಂಡಿದ್ದ ತೀರ್ಮಾನಕ್ಕೆ ಕೇಂದ್ರ ಸಚಿವ ಸಂಪುಟ ಅಂಗೀಕಾರ ನೀಡಿದೆ. ಜಿಎಸ್‌ಟಿಯಂಥ ನೀತಿಯ ಉದ್ದೇಶ ಐಷಾರಾಮಿ ಉತ್ಪನ್ನಗಳ ದರವನ್ನು ಇಳಿಕೆ ಮಾಡುವುದಲ್ಲ. ಜನ ಸಾಮಾನ್ಯರ ಬಳಕೆಯ ಉತ್ಪನ್ನಗಳು ದುಬಾರಿಯಾಗಬಾರದು ಎನ್ನುವುದು ಕೇಂದ್ರದ ಆಶಯ,' ಎಂದು ಸಂಪುಟ ಸಭೆ ನಂತರ ಕೇಂದ್ರ ಹಣಕಾಸು ಸಚಿವ ಅರುಣ್‌ ಜೇಟ್ಲಿ ಹೇಳಿದ್ದಾರೆ.