ಮಧ್ಯಪ್ರದೇಶ: ಕೈಗಾರಿಕೆಗಳಲ್ಲಿ ಸ್ಥಳೀಯರಿಗೆ 70% ಉದ್ಯೋಗ

ಭೋಪಾಲ್‌: ಕೈಗಾರಿಕೆಗಳಲ್ಲಿ ಸ್ಥಳೀಯರಿಗೆ ಶೇ.70ರಷ್ಟು ಉದ್ಯೋಗಾವಕಾಶ ನೀಡುವುದನ್ನು ಮಧ್ಯಪ್ರದೇಶದಲ್ಲಿನ ಕಾಂಗ್ರೆಸ್‌ ಸರಕಾರವು ಕಡ್ಡಾಯಗೊಳಿಸಿದೆ. ಸರಕಾರದಿಂದ ನೆರವು ಪಡೆಯುವ ಕೈಗಾರಿಕೆಗಳಿಗೆ ಈ ನಿಯಮ ಅನ್ವಯವಾಗುತ್ತದೆ.

ಡಿ.17ರಂದು ಮುಖ್ಯಮಂತ್ರಿಯಾಗಿ ಅಧಿಕಾರ ಸ್ವೀಕರಿಸಿದ್ದ ಕೆಲವೇ ಗಂಟೆಗಳಲ್ಲಿ ಉದ್ಯೋಗ ನೀತಿಯನ್ನು ಮುಖ್ಯಮಂತ್ರಿ ಕಮಲ್‌ ನಾಥ್‌ ಪ್ರಸ್ತಾಪಿಸಿದ್ದರು. ಸ್ಥಳೀಯ ಯುವಕರಿಗೆ ಶೇ.70ರಷ್ಟು ಉದ್ಯೋಗ ನೀಡುವ ಕೈಗಾರಿಕೆಗಳಿಗೆ ಮಾತ್ರ ಸರಕಾರವು ನೆರವು ನೀಡಲಿದೆ ಎಂದಿದ್ದರು. ಚುನಾವಣಾ ಪ್ರಣಾಳಿಕೆಯಲ್ಲೂ ಈ ಭರವಸೆ ನೀಡಲಾಗಿತ್ತು.

''ಹೊಸ ಉದ್ಯೋಗ ನೀತಿಯು ಪರಿಣಾಮಕಾರಿಯಾಗಿದೆ. ಸರಕಾರದಿಂದ ಉತ್ತೇಜನ ಮತ್ತು ನೆರವು ಪಡೆಯುವ ಎಲ್ಲ ಕೈಗಾರಿಕೆಗಳೂ ಶೇ.70ರಷ್ಟು ಉದ್ಯೋಗವನ್ನು ಸ್ಥಳೀಯರಿಗೆ ನೀಡಲೇ ಬೇಕು. ಸರಕಾರದ ನೆರವು ನಿರಾಕರಿಸುವ ಯಾವುದೇ ಪ್ರಸ್ತಾವನೆಗಳು ನಮಗೆ ಬಂದಿಲ್ಲ. ಹೀಗಾಗಿ, ಎಲ್ಲ ಕೈಗಾರಿಕೆಗಳೂ ನಿಯಮ ಪಾಲಿಸಲಿವೆ,'' ಎಂದು ಕೈಗಾರಿಕಾ ಇಲಾಖೆಯ ಪ್ರಧಾನ ಕಾರ್ಯದರ್ಶಿ ತಿಳಿಸಿದ್ದಾರೆ.