ವಾಷಿಂಗ್ಟನ್‌: ಭಾರಿ ವೇಗವಾಗಿ ಹರಡುತ್ತಿರುವ ಜಾಗತಿಕ ಪಿಡುಗು ಕೋವಿಡ್‌-19 'ಪ್ರಮುಖ ಜಾಗತಿಕ ಆರ್ಥಿಕ ಹಿಂಜರಿತ'ಕ್ಕೆ ಕಾರಣವಾಗಬಹುದು ಎಂದು ವಿಶ್ವ ಬ್ಯಾಂಕ್ ಸಮೂಹದ ಅಧ್ಯಕ್ಷ ಡೇವಿಡ್ ಮಾಲ್ಪಾಸ್ ಎಚ್ಚರಿಸಿದ್ದಾರೆ.

ಈ ಸಂಬಂಧ ಶುಕ್ರವಾರ ಪ್ರತಿಕ್ರಿಯೆ ನೀಡಿರುವ ಅವರು, ಇದು ಅತ್ಯಂತ ಬಡ ಮತ್ತು ದುರ್ಬಲ ದೇಶಗಳ ಮೇಲೆ ಕಠಿಣ ಪರಿಣಾಮ ಬೀರಲಿದೆ ಎಂದು ತಿಳಿಸಿದ್ದಾರೆ.

ಈ ಕಾರಣಕ್ಕೆ "ವಿಶೇಷವಾಗಿ ಬಡ ದೇಶಗಳಿಗೆ ಬೃಹತ್ ಪ್ರಮಾಣದಲ್ಲಿ ಬೆಂಬಲ ಕಾರ್ಯಕ್ರಮಗಳೊಂದಿಗೆ ನಾವು ನೆರವು ನೀಡಲು ಉದ್ದೇಶಿಸಿದ್ದೇವೆ,” ಎಂಬುದಾಗಿ ಮಾಲ್ಪಾಸ್‌ ಲಿಂಕ್ಡ್‌ಇನ್‌ನಲ್ಲಿ ತಿಳಿಸಿದ್ದಾರೆ. ಸದ್ಯದಲ್ಲೇ ಈ ಸಂಬಂಧ ಇಥಿಯೋಪಿಯಾ, ಕೀನ್ಯಾ ಮತ್ತು ಇತರ ದೇಶಗಳ ನಾಯಕರೊಂದಿಗೆ ಶೀಘ್ರದಲ್ಲೇ ಮಾತುಕತೆ ನಡೆಸಲು ಉದ್ದೇಶಿಸಿದ್ದೇನೆ ಎಂದು ಅವರು ಮಾಹಿತಿ ನೀಡಿದ್ದಾರೆ.

ಐಟಿ ಉದ್ದಿಮೆಗೆ ಕೊರೊನಾ ಹೊಡೆತ: ಆದಾಯದಲ್ಲಿ ಶೇ.2-7 ಇಳಿಕೆ ಸಂಭವ!

ಜಾಗತಿಕವಾಗಿ 11,20,752 ಜನರಿಗೆ ಕೊರೊನಾ ವೈರಸ್‌ ಸೋಂಕು ತಗುಲಿದ್ದರೆ ಇದರಲ್ಲಿ 58,982 ಜನರು ಸೋಂಕಿನಿಂದ ಸಾವನ್ನಪ್ಪಿದ್ದಾರೆ. ವಿಶ್ವದ ಹೆಚ್ಚು ಕಡಿಮೆ ಎಲ್ಲಾ ದೇಶಗಳು ಲಾಕ್‌ಡೌನ್‌ ಘೋಷಿಸಿದ್ದು ಆರ್ಥಿಕ ವಹಿವಾಟುಗಳು ಸಂಪೂರ್ಣ ಸ್ಥಗಿತಗೊಂಡಿವೆ. ಪರಿಣಾಮ ಆರ್ಥಿಕ ಹಿಂಜರಿತದ ಛಾಯೆ ಢಾಳಾಗಿ ಕಾಣಿಸುತ್ತಿದೆ.