ಮಾರುತಿ ಸುಜುಕಿ ಕಾರುಗಳ ದರ ಏರಿಕೆ

ಹೊಸದಿಲ್ಲಿ: ದೇಶದ ಅತಿ ದೊಡ್ಡ ಕಾರು ಉತ್ಪಾದಕ ಮಾರುತಿ ಸುಜುಕಿ ಗುರುವಾರ ತನ್ನ ಕಾರುಗಳ ದರಗಳನ್ನು 34,494 ರೂ. ತನಕ ಏರಿಸಿದೆ. 2016-17ರ ಕೇಂದ್ರ ಬಜೆಟ್‌ನಲ್ಲಿ ಮೂಲ ಸೌಕರ್ಯ ಸೆಸ್ ಪ್ರಸ್ತಾಪವಿರುವ ಹಿನ್ನೆಲೆಯಲ್ಲಿ ದರ ಹೆಚ್ಚಳ ಅನಿವಾರ್ಯ ಎಂದು ಕಂಪನಿ ಹೇಳಿದೆ.

ನಾನಾ ಮಾದರಿಗಳ ಕಾರುಗಳ ಬೆಲೆ 1,441 ರೂ.ಗಳಿಂದ 34,494 ರೂ. ತನಕ ಏರಿಕೆಯಾಗಲಿದೆ. ಸಿಯಾಜ್ ಮತ್ತು ಎರ್ಟಿಗಾ ಕಾರುಗಳು ಮೂಲ ಸೌಕರ್ಯ ಸೆಸ್‌ನಿಂದ ಹೊರಗಿರುವುದರಿಂದ ಅವುಗಳ ಬೆಲೆಯಲ್ಲಿ ಬದಲಾವಣೆ ಇರುವುದಿಲ್ಲ ಎಂದು ತಿಳಿಸಿದೆ.

ಮಾರುತಿ ಸುಜುಕಿಯು ಎಂಟ್ರಿ ಲೆವೆಲ್ ಕಾರು ಆಲ್ಟೊ 800ನಿಂದ ಎಸ್-ಕ್ರಾಸ್ ತನಕ, 2.54 ಲಕ್ಷ ರೂ.ಗಳಿಂದ 11.69 ಲಕ್ಷ ರೂ. ತನಕದ ದರದ ಕಾರುಗಳನ್ನು ಮಾರಾಟ ಮಾಡುತ್ತಿದೆ. ಜರ್ಮನಿ ಮೂಲದ ಕಾರು ಉತ್ಪಾದಕ ಮರ್ಸಿಡಿಸ್ ಬೆನ್ಜ್ ಮಾರ್ಚ್ 15ರಿಂದ ಕಾರುಗಳ ದರವನ್ನು 5 ಲಕ್ಷ ರೂ. ತನಕ ಏರಿಸುವುದಾಗಿ ಘೀಷಿಸಿತ್ತು. ಟಾಟಾ ಮೋಟಾರ್ಸ್‌ ತನ್ನ ಕಾರುಗಳ ದರವನ್ನು 2,000 ರೂ.ಗಳಿಂದ 35,000 ರೂ. ತನಕ ಹೆಚ್ಚಿಸಿದೆ. ಹುಂಡೈ ಮೋಟಾರ್ ಇಂಡಿಯಾ ಮತ್ತು ಹೋಂಡಾ ಕಾರ್ಸ್‌ ಇಂಡಿಯಾ ಕೂಡ 3 ಸಾವಿರ ರೂ.ಗಳಿಂದ 80,000 ರೂ. ತನಕ ದರ ಏರಿಸಿವೆ.