2020ರಲ್ಲಿ ನೇಪಥ್ಯಕ್ಕೆ ಸರಿಯಲಿದೆ ಒಮ್ನಿ

ಹೊಸದಿಲ್ಲಿ: ದೇಶದಲ್ಲಿ ಕಳೆದ ಮೂರು ದಶಕಗಳ ಕಾಲ ರಸ್ತೆಯಲ್ಲಿ ನಾನಾ ಅವತಾರಗಳಲ್ಲಿ ಓಡಾಡುತ್ತಿದ್ದ ಮಾರುತಿ ಸುಜುಕಿಯ ಪ್ರಖ್ಯಾತ ಒಮ್ನಿ ವ್ಯಾನ್‌ ಇನ್ನು ಎರಡೇ ವರ್ಷಗಳಲ್ಲಿ ಇತಿಹಾಸದ ಪುಟ ಸೇರಲಿದೆ.

2020ರ ಅಕ್ಟೋಬರ್‌ನಿಂದ ಒಮ್ನಿ ವ್ಯಾನ್‌ನ ಉತ್ಪಾದನೆ ಹಾಗೂ ಮಾರಾಟ ಸ್ಥಗಿತವಾಗಲಿದೆ. ವಾಹನಗಳ ಸುರಕ್ಷತೆಗೆ ಸಂಬಂಧಿಸಿದ ಹೊಸ ನಿಯಮಾವಳಿಗಳನ್ನು ಪೂರೈಸುವ ಉದ್ದೇಶದಿಂದ ಮಾರುತಿ ಸುಜುಕಿ ಈ ನಿರ್ಧಾರ ತೆಗೆದುಕೊಂಡಿದೆ. ಒಮ್ನಿಯ ಸ್ಥಾನವನ್ನು ವ್ಯಾಗನ್‌ಆರ್‌ ತುಂಬುವ ನಿರೀಕ್ಷೆ ಇದೆ.

2020ರ ಅಕ್ಟೋಬರ್‌ನಿಂದ ಜಾರಿಯಾಗಲಿರುವ ಭಾರತ್‌ ನ್ಯೂ ವೆಹಿಕಲ್ಸ್‌ ಸೇಫ್ಟಿ ಅಸೆಸ್‌ಮೆಂಟ್‌ ಪ್ರೋಗ್ರಾಮ್‌ (ಬಿಎನ್‌ವಿಎಸ್‌ಎಪಿ) ಸುರಕ್ಷತಾ ಮಾನದಂಡ ನಿಯಮಗಳನ್ನು ಪಾಲಿಸುವ ಸಲುವಾಗಿ, ಈಗಿನ ಒಮ್ನಿ ಉತ್ಪಾದನೆ ನಿಲ್ಲಿಸಲಾಗುವುದು ಎಂದು ಮಾರುತಿ ಸುಜುಕಿ ಇಂಡಿಯಾದ ಅಧ್ಯಕ್ಷ ಆರ್‌.ಸಿ ಭಾರ್ಗವ ತಿಳಿಸಿದ್ದಾರೆ.

ದೇಶದಲ್ಲಿ ಪರ್ಸನಲ್‌ ಕಾರ್‌, ಟ್ಯಾಕ್ಸಿ, ಸ್ಕೂಲ್‌ ವ್ಯಾನ್‌, ಆ್ಯಂಬುಲೆನ್ಸ್‌, ಲಗೇಜು ಸಾಗಣೆ ವಾಹನ ಸೇರಿದಂತೆ ಎಲ್ಲವೂ ಆಗಿದ್ದ ಓಮ್ನಿ ವ್ಯಾನ್‌ ಅನ್ನು ಉತ್ಪಾದನೆ ಮಾಡದಿರಲು ಕಂಪನಿ ನಿರ್ಧರಿಸಿದೆ.

2020ರ ಏಪ್ರಿಲ್‌ 1ರಿಂದ ಬಿಎನ್‌ವಿಎಸ್‌ಎಪಿ ನಿಯಮಾವಳಿಗಳು ಜಾರಿಗೆ ಬರಲಿದೆ. ಹೀಗಾಗಿ ಭಾರತ್‌ ಸ್ಟೇಜ್‌- 4 ಮಾದರಿಯ ಯಾವುದೇ ವಾಹನವನ್ನು ದೇಶದಾದ್ಯಂತ ಮಾರುವಂತಿಲ್ಲ. ಸುಪ್ರೀಂ ತೀರ್ಪಿನ ಪರಿಣಾಮ, ಭಾರತ್‌ ಸ್ಟೇಜ್‌-6 (ಬಿಎಸ್‌-6) ಮಾದರಿಯ ವಾಹನಗಳನ್ನಷ್ಟೆ ಮಾರಾಟ ಮಾಡಬೇಕು. ವಾಹನ ಸುರಕ್ಷತೆ, ಮಾಲಿನ್ಯ ನಿಯಂತ್ರಣದ ಮಾನದಂಡ ಪಾಲಿಸಲು ಅನರ್ಹವಾಗಿರುವ ಓಮ್ನಿ ಉತ್ಪಾದನೆಗೆ ಬ್ರೇಕ್‌ ಬೀಳಲಿದೆ.

'' ಮಾರುತಿ 800 ಕಾರು ಕೂಡ ನಮಗೆ ಮಹತ್ವದ ಕಾರಾಗಿತ್ತು. ಆದರೂ ಬದಲಾದ ನಿಯಮಾವಳಿಗೆ ಅನುಗುಣವಾಗಿ ಅದರ ಉತ್ಪಾದನೆಯನ್ನೂ ಸ್ಥಗಿತಗೊಳಿಸಲಾಗಿತ್ತು. ಇದೀಗ ಒಮ್ನಿಯ ಸರದಿ ಬಂದಿದೆ. ಒಮ್ನಿಯ ಮುಂಭಾಗದ ವಿನ್ಯಾಸ ಸಮತಟ್ಟಾಗಿದೆ. ಇದು ನೂತನ ಅಪಘಾತ ತಡೆ ನಿಯಮಾವಳಿಗಳನ್ನು ಪೂರೈಸುತ್ತಿಲ್ಲ. ಆಲ್ಟೊ 800, ಮಾರುತಿ ಇಕೊ ವಾಹನಗಳ ವಿನ್ಯಾಸಗಳನ್ನೂ, ಸುರಕ್ಷತೆಯ ಹೊಸ ನಿಯಮಾವಳಿಗೆ ಪೂರಕವಾಗಿ ಇದೆಯೇ ಎಂಬುದನ್ನು ಪರಿಶೀಲಿಸಲಾಗುತ್ತಿದೆ. ಹೊಸ ನೀತಿಗೆ ಅನುಗುಣವಾಗಿ ಕಾರುಗಳ ಮಾದರಿಯ ವಿನ್ಯಾಸ, ರೂಪುರೇಷೆಗಳಲ್ಲಿ ಬದಲಾವಣೆಯಾಗಲಿದೆ ಎಂದು ಭಾರ್ಗವ ತಿಳಿಸಿದ್ದಾರೆ.

ಒಮ್ನಿ ವ್ಯಾನ್‌ ಅನ್ನು 1984ರಲ್ಲಿ ಬಿಡುಗಡೆಗೊಳಿಸಲಾಗಿತ್ತು. ನಂತರ ಹೆಚ್ಚಿನ ಯಾವುದೇ ಬದಲಾವಣೆಗೆ ಒಳಗಾಗಿರಲಿಲ್ಲ. ಕಳೆದ 34 ವರ್ಷಗಳಲ್ಲಿ ಎರಡು ಸಲ ಮಾತ್ರ ಸ್ವಲ್ಪ ಬದಲಾವಣೆ ಮಾಡಲಾಗಿತ್ತು. ಒಂದು ಸಲ ಹೆಡ್‌ ಲ್ಯಾಂಪ್‌, ಹೊಸ ಡ್ಯಾಶ್‌ ಬೋರ್ಡ್‌ ಎಂದು ಬದಲಾವಣೆ ನಡೆದಿತ್ತು. ಇದು 796 ಸಿಸಿ, 3 ಸಿಲಿಂಡರ್‌ ಎಂಜಿನ್‌ ಅನ್ನು ಒಳಗೊಂಡಿದೆ.

ಆಲ್ಟೊ 800 ಮತ್ತು ಮಾರುತಿ ಎಕೊ ವ್ಯಾನ್‌ ಕೂಡ ಹೊಸ ಸೇಫ್ಟಿ ನಿಯಮಾವಳಿಯನ್ನು ಪೂರೈಸುತ್ತಿಲ್ಲ. ಹೀಗಿದ್ದರೂ, ನಿಯಮಗಳಿಗೆ ತಕ್ಕಂತೆ ಕಾರನ್ನು ಬದಲಾಯಿಸಲು ಕಂಪನಿ ಯತ್ನಿಸುತ್ತಿದೆ ಎಂದು ಭಾರ್ಗವ ವಿವರಿಸಿದ್ದಾರೆ.

ಟ್ವೀಟ್‌ ತಮಾಷೆ

34 ವರ್ಷಗಳ ಬಳಿಕ, ಮಾರುತಿ ಓಮ್ನಿ, ಬಾಲಿವುಡ್‌ನ ಅಫಿಷಿಯಲ್‌ ಕಿಡ್ನಾಪಿಂಗ್‌ ಕಾರ್‌ ದಿನಗಳು ಕೊನೆಯಾಗಲಿವೆ...


ಸಿಐಡಿಗಳ ಸೇವೆ ನಿಂತ ಬಳಿಕ, ಈಗ ಮಾರುತಿ ಓಮ್ನಿ ದಿನಗಳೂ ಮುಗಿದಿವೆ.