52,686 ಸ್ವಿಫ್ಟ್‌, ಬಲೆನೊ ವಾಪಸ್ ಪಡೆದ ಮಾರುತಿ ಸುಜುಕಿ

ಹೊಸದಿಲ್ಲಿ: ಮಾರುತಿ ಸುಜುಕಿ ಇಂಡಿಯಾ ಕಂಪನಿಯು ತನ್ನ 52,686 ನೂತನ ಸ್ವಿಫ್ಟ್‌ ಹಾಗು ಬಲೆನೊ ಕಾರುಗಳನ್ನು ಮತ್ತೊಮ್ಮೆ ಪರಿಶೀಲಿಸಲು ನಿರ್ಧರಿಸಿದೆ. ಕಾರಿನ ಬ್ರೇಕ್‌ ವಾಕ್ಯೂಮ್‌ ಹೋಸ್‌ ವಿಭಾಗದಲ್ಲಿ ತಾಂತ್ರಿಕ ಅಡಚಣೆ ಇರುವ ಸಾಧ್ಯತೆ ಹಿನ್ನೆಲೆಯಲ್ಲಿ ಮುಂಜಾಗರೂಕತಾಕ್ರಮವಾಗಿ ಕಂಪನಿ ಈ ನಿರ್ಧಾರ ತೆಗೆದುಕೊಂಡಿದೆ.

ಗ್ರಾಹಕರಿಗೆ ನೀಡಿರುವ ಕಾರುಗಳನ್ನು ಕಂಪನಿಯು ಪರಿಶೀಲಿಸಿ, ಲೋಪದೋಷವಿದ್ದರೆ, ಅಂಥ ಭಾಗವನ್ನು ಬದಲಿಸಿ ಕೊಡಲಿದೆ. 2017 ಡಿಸೆಂಬರ್‌ 1 ಮತ್ತು 2018 ಮಾರ್ಚ್‌ 16ರ ನಡುವೆ ತಯಾರಿಸಿದ ನೂತನ ಸ್ವಿಫ್ಟ್‌ ಹಾಗೂ ಬಲೆನೊ ಕಾರುಗಳನ್ನು ಮಾರುತಿ ಸುಜುಕಿಯು ಪರಿಶೀಲಿಸಲಿದೆ.

ಈ ವರ್ಷ ಫೆಬ್ರವರಿಯಲ್ಲಿ ಬಿಡುಗಡೆಯಾಗಿರುವ 44,982 ಸ್ವಿಫ್ಟ್‌ ಕಾರುಗಳು ಹಾಗೂ 7,704 ಬಲೆನೊ ಕಾರುಗಳ ತಪಾಸಣೆ ನಡೆಯಲಿದೆ. ಗ್ರಾಹಕರನ್ನು ಕಂಪನಿಯ ಡೀಲರ್‌ಗಳು ಸಂಪರ್ಕಿಸಲಿದ್ದು, ದೋಷವಿದ್ದರೆ ಅಂಥ ಬಿಡಿ ಭಾಗವನ್ನು ಉಚಿತವಾಗಿ ಬದಲಿಸಿಕೊಡಲಿದ್ದಾರೆ.