ಮಾಸ್ಟರ್‌ಕಾರ್ಡ್‌ನಿಂದ ನೇಮಕ ಹೆಚ್ಚಳ

ಹೈದರಾಬಾದ್‌ : ಬಹುರಾಷ್ಟ್ರೀಯ ಕಾರ್ಡ್‌ ಪೇಮೆಂಟ್ಸ್‌ ಕಂಪನಿ ಮಾಸ್ಟರ್‌ಕಾರ್ಡ್‌ ಕಂಪನಿಯು ಭಾರತದಲ್ಲಿ ಮುಂದಿನ 5 ವರ್ಷಗಳಲ್ಲಿ 7,000 ಕೋಟಿ ರೂ.ಗಳನ್ನು ಹೂಡಿಕೆ ಮಾಡಲಿದ್ದು, ತನ್ನ ಉದ್ಯೋಗಿಗಳ ಸಂಖ್ಯೆಯನ್ನು ಇಮ್ಮಡಿಗೊಳಿಸಲಿದೆ. ಈಗ 2,000 ಉದ್ಯೋಗಿಗಳನ್ನು ಹೊಂದಿದ್ದು, 4,000ಕ್ಕೆ ಏರಿಕೆ ಮಾಡಲಿದೆ.

ಮಾಸ್ಟರ್‌ಕಾರ್ಡ್‌ 2013ರಲ್ಲಿ ಭಾರತದಲ್ಲಿ ಕೇವಲ 29 ಉದ್ಯೋಗಿಗಳನ್ನು ಹೊಂದಿತ್ತು. ಇಂದು 2,000 ಮಂದಿಯನ್ನು ಒಳಗೊಂಡಿದೆ. ಎಲ್ಲರೂ ತಾಂತ್ರಿಕವಾಗಿ ನುರಿತರಾಗಿರುವ ಸಿಬ್ಬಂದಿಯಾಗಿದ್ದಾರೆ. ಭವಿಷ್ಯದಲ್ಲಿ ಮತ್ತಷ್ಟು ನೇಮಕಾತಿ ನಡೆಯಲಿದೆ ಎಂದು ಕಂಪನಿಯ ಮಾರುಕಟ್ಟೆ ವಿಭಾಗದ ಹಿರಿಯ ಉಪಾಧ್ಯಕ್ಷ ರಾಜೀವ್‌ ಕುಮಾರ್‌ ತಿಳಿಸಿದ್ದಾರೆ.

ದೇಶದ ಡಿಜಿಟಲ್‌ ಪೇಮೆಂಟ್‌ ಮಾರುಕಟ್ಟೆ ಗಣನೀಯವಾಗಿ ಬೆಳೆಯುತ್ತಿದ್ದು, ಕಂಪನಿಯ ವಹಿವಾಟು ವಿಸ್ತರಣೆಗೆ ಅನುಕೂಲಕರವಾಗಿ ಪರಿಣಮಿಸಿದೆ.

ಆರ್‌ಬಿಐ ಮಾರ್ಗದರ್ಶಿಯ ಪ್ರಕಾರ ಕಾರ್ಡ್‌ ಪೇಮೆಂಟ್ಸ್‌ ಕಂಪನಿಗಳು ಭಾರತೀಯರ ಹಣಕಾಸು ವರ್ಗಾವಣೆಗಳ ಮಾಹಿತಿಗಳನ್ನು ಭಾರತದಲ್ಲಿಯೇ ಉಳಿಸಿಕೊಳ್ಳಬೇಕು. ವಿದೇಶಗಳಲ್ಲಿ ಸಂಸ್ಕರಿಸುವಂತಿಲ್ಲ. ಹೀಗಾಗಿ ಮಾಸ್ಟರ್‌ಕಾರ್ಡ್‌ ಪುಣೆಯಲ್ಲಿನ ಘಟಕದಲ್ಲಿ ಸಂಸ್ಕರಿಸುತ್ತದೆ.