ಮೆಡಿಕ್ಲೇಮ್ ಪ್ರೀಮಿಯ್ ಹೆಚ್ಚಳ: ನಿವೃತ್ತ ಬ್ಯಾಂಕ್‌ ಉದ್ಯೋಗಿಗಳ ಜೇಬಿಗೆ ಹೊರೆ

ಕೋಲ್ಕೊತಾ: ಬ್ಯಾಂಕ್‌ ಉದ್ಯೋಗಿಗಳಿಗೆ ಮೆಡಿಕಲ್‌ ಇನ್ಷೂರೆನ್ಸ್‌ ರಕ್ಷೆಯನ್ನು ಒದಗಿಸುವ ಗುತ್ತಿಗೆ ಹೊಂದಿರುವ ಯುನೈಟೆಡ್‌ ಇಂಡಿಯಾ ಇನ್ಷೂರೆನ್ಸ್‌ ಕಂಪನಿಯು, ಮತ್ತೆ ಪ್ರೀಮಿಯಂ ಅನ್ನು ಹೆಚ್ಚಿಸಲಿದೆ ಮೂಲಗಳು ಹೇಳಿವೆ.

ಪ್ರೀಮಿಯಂ ಶೇ.10ರಿಂದ 15ರಷ್ಟು ಹೆಚ್ಚಾಗಲಿದ್ದು, ಬ್ಯಾಂಕ್‌ ಉದ್ಯೋಗಿಗಳ ಮೇಲೆ ಹೆಚ್ಚಿನ ಹೊರೆ ಬೀಳಲಿದೆ. ಗ್ರೂಪ್‌ ಮೆಡಿಕ್ಲೇಮ್‌ ಪಾಲಿಸಿಯು ಹಾಲಿ ಮತ್ತು ನಿವೃತ್ತ ಬ್ಯಾಂಕ್‌ ಉದ್ಯೋಗಿಗಳಿಗೆ ಅನ್ವಯವಾಗುತ್ತದೆ.

ಹಣಕಾಸು ವರ್ಷ 2020ರಲ್ಲಿ ಪ್ರೀಮಿಯಂ ಮೊತ್ತವು 26,000 ರೂ.ಗಳಿಂದ 30,000 ರೂ.ಗೆ ಏರಿಕೆಯಾಗುವ ಅವಕಾಶಗಳಿವೆ.

''ಕಳೆದ ನಾಲ್ಕು ವರ್ಷಗಳಲ್ಲಿ ಪ್ರೀಮಿಯಂ ಮೊತ್ತವು 4 ಪಟ್ಟು ಹೆಚ್ಚಳವಾಗಿದೆ,'' ಎಂದು ಅಖಿಲ ಭಾರತ ಬ್ಯಾಂಕ್‌ ನಿವೃತ್ತ ಉದ್ಯೋಗಿಗಳ ಫೆಡರೇಷನ್‌ನ ಪ್ರಧಾನ ಕಾರ್ಯದರ್ಶಿ ಎಸ್‌.ಸಿ.ಜೈನ್‌ ಹೇಳಿದ್ದಾರೆ.

ನಗದು ವಿತ್‌ಡ್ರಾಗೆ ಟಿಡಿಎಸ್‌

ಹೊಸದಿಲ್ಲಿ: ಆದಾಯ ತೆರಿಗೆ ಕಾಯ್ದೆಯ ತಿದ್ದುಪಡಿಯಿಂದಾಗಿ ನೂತನ ಟಿಡಿಎಸ್‌(ಮೂಲದಲ್ಲೇ ತೆರಿಗೆ ಕಡಿತ) ನಿಯಮವು ಸೆ.1ರಿಂದ ಜಾರಿಗೆ ಬಂದಿದೆ. ಅದರ ಪ್ರಕಾರ, ದೊಡ್ಡ ಮೊತ್ತದ ನಗದನ್ನು ವಿತ್‌ಡ್ರಾ ಮಾಡಿದಾಗ ಟಿಡಿಎಸ್‌ ಅನ್ವಯವಾಗಲಿದೆ.

ಎಚ್‌ಎಫ್‌ಸಿ ಬ್ಯಾಂಕ್‌ನಲ್ಲಿ ಹಣಕಾಸು ವರ್ಷದಲ್ಲಿ ಒಟ್ಟು 1 ಕೋಟಿ ರೂ.ಗೂ ಅಧಿಕ ಮೊತ್ತವನ್ನು ವಿತ್‌ಡ್ರಾ ಮಾಡಿದ ಪಕ್ಷದಲ್ಲಿ ಶೇ.2ರಷ್ಟು ಟಿಡಿಎಸ್‌ ತೆರಬೇಕಾಗುತ್ತದೆ. ಹಣಕಾಸು ವರ್ಷವು 2019ರ ಏಪ್ರಿಲ್‌ನಿಂದ ಆರಂಭವಾಗಿದ್ದು, ವಿತ್‌ಡ್ರಾ ಮೊತ್ತವು 1 ಕೋಟಿ ರೂ. ದಾಟಿದರೆ ಮಾತ್ರ ಟಿಡಿಎಸ್‌ ಕಡಿತವಾಗುತ್ತದೆ.

ಸರಕಾರ, ಬ್ಯಾಂಕಿಂಗ್‌ ಕಂಪನಿ ಅಥವಾ ಕೋ-ಆಪರೇಟಿವ್‌ ಸೊಸೈಟಿ, ಅಂಚೆ ಕಚೇರಿಗಳ ಸಿಬ್ಬಂದಿಯ ಕೆಲಸ ಸಂಬಂಧಿ ವಿತ್‌ಡ್ರಾಗಳಿಗೆ ಟಿಡಿಎಸ್‌ ಅನ್ವಯವಾಗುವುದಿಲ್ಲ.