ಮೆಹುಲ್‌ ಚೋಕ್ಸಿ ಕರೆ ತರಲು ಸಿಬಿಐ ಸಜ್ಜು

ಹೊಸದಿಲ್ಲಿ : ಪಂಜಾಬ್‌ ನ್ಯಾಷನಲ್‌ ಬ್ಯಾಂಕ್‌ ಹಗರಣದ ಆರೋಪಿ ಮೆಹುಲ್‌ ಚೋಕ್ಸಿಯನ್ನು ಭಾರತಕ್ಕೆ ಕರೆ ತರಲು ಸಿಬಿಐ, ಇ.ಡಿ ಪ್ರಯತ್ನ ಫಲ ಕಾಣುವ ಸಾಧ್ಯತೆ ಇದೆ. ವೆಸ್ಟ್‌ ಇಂಡೀಸ್‌ನಲ್ಲಿ ಚೋಕ್ಸಿ ಹಾಗೂ ಮತ್ತೊಬ್ಬ ವಿತ್ತಾಪರಾಧಿ ಜತಿನ್‌ ಮೆಹ್ತಾ ಇದ್ದಾರೆ ಎನ್ನಲಾಗಿದ್ದು, ಇವರನ್ನು ಕರೆ ತರಲು ಸಿಬಿಐ, ಇಡಿ ಅಧಿಕಾರಿಗಳು ಯತ್ನಿಸುತ್ತಿದ್ದಾರೆ.

ಸಿಬಿಐ ಹಾಗೂ ಇ.ಡಿ ಅಧಿಕಾರಿಗಳ ತಂಡ ಶೀಘ್ರದಲ್ಲಿಯೇ ವೆಸ್ಟ್‌ ಇಂಡೀಸ್‌ಗೆ ತೆರಳಲಿದೆ.ಕೆರಿಬಿಯನ್‌ ದ್ವೀಪ ರಾಷ್ಟ್ರಗಳಲ್ಲಿ ಲಭ್ಯವಿರುವ ವಿವಾದಾಸ್ಪದ ಪೇಯ್ಡ್‌ ಪೌರತ್ವ ಯೋಜನೆಗಳ ದುರ್ಲಾಭ ಪಡೆಯಲು ಚೋಕ್ಸಿ ಮೊದಲಾದವರು ಯತ್ನಿಸುತ್ತಿದ್ದಾರೆ. ಚೋಕ್ಸಿ ಇತ್ತೀಚೆಗೆ ಅಂಟಿಗುವಾ ಹಾಗೂ ಬಾರ್ಬುಡಾದ ಪೌರತ್ವ ಪಡೆದಿದ್ದರು. ಭಾರತದ ವಿತ್ತಾಪರಾಧಿಗಳು ಇಂಥ ರಾಷ್ಟ್ರಗಳಲ್ಲಿ ಹೂಡಿಕೆ ಮಾಡುವುದರ ಜತೆಗೆ ಅಲ್ಲಿನ ನಾಗರಿಕತ್ವವನ್ನೂ ಪಡೆಯುತ್ತಿದ್ದಾರೆ.