ಹಳ್ಳಿಗಳಲ್ಲೀಗ ಮೈಕ್ರೋ ಶಾಪಿಂಗ್‌ ಮಾಲ್‌: ಗ್ರಾಮೋದ್ಧಾರ ಕೇಂದ್ರಗಳಿಂದ ರಾಜ್ಯದಲ್ಲಿ ಉದ್ಯೋಗ ಸೃಷ್ಟಿ

ಬೆಂಗಳೂರು: ಸ್ಟಾಂಪ್‌ ವೆಂಡಿಂಗ್‌ ಸೇವೆಗಳು, ಜಿಎಸ್‌ಟಿ ನೋಂದಣಿ, ಪ್ಯಾನ್‌ ಕಾರ್ಡ್‌ ಸೇವೆಗಳು, ಇಎಸ್‌ಐ/ಪಿಎಫ್‌ ಸೇವೆಗಳು, ಡಿಎಸ್‌ಸಿ ಡಿಜಿಟಲ್‌ ಸಿಗ್ನೇಚರ್‌, ಆರ್‌ಟಿಸಿ, ಐಟಿಆರ್‌ ಸೇವೆಗಳು, ವಿದ್ಯುತ್‌ ಬಿಲ್‌ ಪಾವತಿ ಸೇರಿದಂತೆ ನಾನಾ ಸೇವೆಗಳು ಒಂದೇ ಕಡೆ, ಅದರಲ್ಲೂ ಗ್ರಾಮಗಳಲ್ಲಿ ಸಿಕ್ಕಿದರೆ ಹೇಗಿರುತ್ತದೆ? ಇಷ್ಟು ಮಾತ್ರವಲ್ಲ ಹಣ ವರ್ಗಾವಣೆ, ಠೇವಣಿ ಜಮೆ ಮಾಡುವುದೂ ಸೇರಿದಂತೆ ಬ್ಯಾಂಕಿಂಗ್‌ ಸೇವೆಗಳೂ ಇಲ್ಲುಂಟು. ಆರೋಗ್ಯ, ವಾಹನ ವಿಮೆ ಸೇವೆಗಳೂ ಇವೆ. ಇದರ ಜೊತೆಗೆ ಶಾಪಿಂಗ್‌ಗೂ ಅವಕಾಶ ಉಂಟು.

ಸೇವೆ ಮತ್ತು ವ್ಯಾಪಾರವನ್ನು ಒಳಗೊಂಡ ದೇಸಿ ಸ್ಕಿಲ್ಸ್‌ ಸಂಸ್ಥೆಯ 300ಕ್ಕೂ ಅಧಿಕ ಗ್ರಾಮೋದ್ಧಾರ ಕೇಂದ್ರಗಳು ರಾಜ್ಯದಲ್ಲಿ ಈಗಾಗಲೇ ಕಾರ್ಯರಂಭಗೊಂಡಿವೆ. ಬೆಂಗಳೂರು ಒನ್‌ಗಳಲ್ಲಿ ಸಿಗುವುದಕ್ಕಿಂತ ಹೆಚ್ಚಿನ ಸೇವೆಗಳು, ಜೊತೆಗೆ ಶಾಪಿಂಗ್‌ಗೆ ಪೂರಕವಾದ ಮಳಿಗೆಯನ್ನು ಸೇರಿಸಿದರೆ ಏನಾಗುತ್ತದೆಯೋ ಅದನ್ನು ಗ್ರಾಮಗಳ ಮಟ್ಟದಲ್ಲಿ ದೇಸಿ ಸ್ಕಿಲ್ಸ್‌ ಎನ್ನುವ ಸಂಸ್ಥೆ ಅನುಷ್ಠಾನಗೊಳಿಸುತ್ತಿದೆ. ಗ್ರಾಮೀಣರಿಗೆ ಮನೆ ಬಾಗಿಲಲ್ಲಿ ಸೇವೆ ಸಿಕ್ಕಿದರೆ, ಈ ಸೇವೆಯನ್ನು ನಿರ್ವಹಿಸುವವರಿಗೆ ಉದ್ಯೋಗವೂ ಸಿಕ್ಕಿದಂತಾಗಿದೆ.

ಮೂರು ವರ್ಷಗಳ ಹಿಂದೆ ಆರಂಭಗೊಂಡ ‘ದೇಸಿ ಸ್ಕಿಲ್ಸ್‌’ ಸಂಸ್ಥೆಯು ರಾಜ್ಯದ ಎಲ್ಲ6024 ಗ್ರಾಮ ಪಂಚಾಯತ್‌ಗಳಲ್ಲಿಯೂ ಗ್ರಾಮೋದ್ಧಾರ ಕೇಂದ್ರಗಳನ್ನು ತೆರೆಯುವುದಾಗಿ ಹೇಳಿದೆ. ಸ್ಥಳೀಯರು ಫ್ರಾಂಚೈಸಿಗಳನ್ನು ಪಡೆಯಬಹುದು. ವಿಶೇಷಚೇತನರು, ಮಹಿಳೆಯರಿಗೆ ಆದ್ಯತೆ ನೀಡಲಾಗುತ್ತಿದೆ. ಡಿಸಿಸಿ ಬ್ಯಾಂಕ್‌ ಸಾಲ ಸೌಲಭ್ಯವೂ ಇದೆ. ಪ್ರಾಂಚೈಸಿ ತೆರೆದವರು ತಿಂಗಳಿಗೆ 30 ಸಾವಿರ ರೂ.ಗೂ ಅಧಿಕ ಹಣವನ್ನು ಸಂಪಾದನೆ ಮಾಡುತ್ತಿದ್ದಾರೆ.

ಕರಾವಳಿ ಯುವಕನ ಸಾಹಸ: ಟೀ, ಚಾಕಲೇಟ್‌ ಬಳಿಕ ಬಂತು ಅಡಕೆ ಐಸ್‌ಕ್ರೀಂ!

18 ಸಾವಿರ ಉದ್ಯೋಗ ಸೃಷ್ಟಿಯ ಗುರಿ
‘‘ಉದ್ಯೋಗ ಮತ್ತು ಬಿಸಿನೆಸ್‌ಗೆ ಇಲ್ಲಿ ಅವಕಾಶವಿದೆ. ಒಂದು ಗ್ರಾಮೋದ್ಧಾರ ಕೇಂದ್ರದಲ್ಲಿ ಮೂರು ಜನರಂತೆ, ರಾಜ್ಯದ 6024 ಗ್ರಾಮ ಪಂಚಾಯತ್‌ಗಳಲ್ಲಿ 18,000 ಉದ್ಯೋಗ ಸೃಷ್ಟಿಸುವ ಗುರಿಯನ್ನು ಹೊಂದಿದ್ದೇವೆ,’’ ಎಂದು ‘ದೇಶಿ ಸ್ಕಿಲ್ಸ್‌’ ಸ್ಥಾಪಕ ಪ್ರಧಾನ ಕಾರ್ಯದರ್ಶಿ ಕೌಶಿಕ್‌ ಎಸ್‌.ಎಸ್‌ ಹೇಳಿದ್ದಾರೆ.

ವಲಸಿಗರೇ ಕರ್ನಾಟಕ ಬಿಟ್ಟು ತೊಲಗಿ! ಚರ್ಚೆಗೆ ಗ್ರಾಸವಾಯಿತು ಉದ್ಯೋಗ ಅಭಿಯಾನ

ಈ ಮಳಿಗೆಗಳು ಟೆನ್‌ ರುಪೀಸ್‌ ಸ್ಟೋರ್‌ಗಳೆಂದೇ ಖ್ಯಾತಿಯಾಗಿವೆ. ಬೇಳೆ, ಎಣ್ಣೆ ಹೊರತುಪಡಿಸಿ ಅಡುಗೆಗೆ ಬಳಕೆಯಾಗುವ ಬಹುತೇಕ ಪದಾರ್ಥಗಳನ್ನು 10 ರೂ. ಶ್ಯಾಷೆಯಲ್ಲಿ ಮಾರಾಟ ಮಾಡಲಾಗುತ್ತಿದೆ. ‘‘ಕಡಿಮೆ ಬೆಲೆಗೆ ಉತ್ತಮ ಉತ್ಪನ್ನಗಳನ್ನು ಪೂರೈಸಲಾಗುತ್ತಿದೆ,’’ಎನ್ನುತ್ತಾರೆ ‘ದೇಸಿ ಸ್ಕಿಲ್ಸ್‌’ ಸ್ಥಾಪಕ ಕಾರ್ಯದರ್ಶಿ ಕಾವ್ಯ ವೇಣು.

ಸ್ಟೇಷನರಿ ವಸ್ತುಗಳು, ಎಲ್‌ಇಡಿ ಲೈಟ್‌ಗಳು, ಸೋಲಾರ್‌ ಪವರ್‌ ಲೈಟ್‌ಗಳು, ವಾಟರ್‌ ಫ್ಯೂರಿಫೈಯರ್‌ಗಳು, ಎಸ್‌ಎಸ್‌ಎಲ್‌ಸಿ ಮತ್ತು ಪಿಯುಸಿಗೆ ಸ್ಟಡಿ ಮೆಟೀರಿಯಲ್ಸ್‌. ಐಎಎಸ್‌, ಕೆಎಎಸ್‌, ರೈಲ್ವೆ ಎಕ್ಸಾಮ್‌ಗೆ ಸ್ಪರ್ಧಾತ್ಮಕ ಬುಕ್ಸ್‌ ಸಹ ಮಾರಾಟ ಮಾಡಲಾಗುತ್ತಿದೆ. ಎಜುಕೇಷನಲ್‌ ವಿಡಿಯೋಗಳನ್ನು 999 ರೂ.ಗೆ ವಿದ್ಯಾರ್ಥಿಗಳಿಗೆ ತಲುಪಿಸುವ ಉದ್ದೇಶವನ್ನು ಸಂಸ್ಥೆ ಹೊಂದಿದೆ. ಸ್ಪರ್ಧಾತ್ಮಕ ಬೆಲೆಗಳಿಗೆ ಮಿಕ್ಸರ್‌, ಟಿವಿ, ಪೆನ್‌ ಡ್ರೈವ್, ಕುಕ್ಕರ್‌, ಐರನ್‌ ಬಾಕ್ಸ್‌ ಮತ್ತಿತರ ವಸ್ತುಗಳೂ ಇಲ್ಲಿ ಲಭ್ಯ.