ಸ್ವಿಸ್‌ ಬ್ಯಾಂಕ್‌ಗಳಲ್ಲಿ ಭಾರತೀಯರ ಹಣ ಶೇ.50 ಹೆಚ್ಚಳ

ಹೊಸದಿಲ್ಲಿ : ಅಚ್ಚರಿಯ ವಿದ್ಯಮಾನದಲ್ಲಿ ಭಾರತೀಯರು 2017ರಲ್ಲಿ ಸ್ವಿಸ್‌ ಬ್ಯಾಂಕ್‌ಗಳಲ್ಲಿ 7,000 ಕೋಟಿ ರೂ. ಹಣ ಠೇವಣಿ ಇಟ್ಟಿದ್ದು, ಶೇ.50ರಷ್ಟು ಹೆಚ್ಚಳವಾಗಿದೆ. ಇದರೊಂದಿಗೆ ಕಳೆದ ಮೂರು ವರ್ಷಗಳಿಂದ ಇಳಿಕೆಯಾಗುತ್ತಿದ್ದ ಟ್ರೆಂಡ್‌ ಬದಲಾಗಿದೆ ಎಂದು ವರದಿಯಾಗಿದೆ.

ಸ್ವಿಸ್‌ ನ್ಯಾಷನಲ್‌ ಬ್ಯಾಂಕ್‌ (ಎಸ್‌ಎನ್‌ಬಿ) ವರದಿಯ ಪ್ರಕಾರ, ಕಳೆದ ವರ್ಷ ಸ್ವಿಸ್‌ ಬ್ಯಾಂಕ್‌ಗಳಲ್ಲಿ ವಿದೇಶಿಯರು ಹೊಂದಿರುವ ಠೇವಣಿಯ ಒಟ್ಟು ಮೊತ್ತ ಶೇ.3ರಷ್ಟು ಏರಿಕೆಯಾಗಿದ್ದು, ರೂಪಾಯಿ ಲೆಕ್ಕದಲ್ಲಿ ಸುಮಾರು 100 ಲಕ್ಷ ಕೋಟಿ ರೂ.ಗೆ ಏರಿಕೆಯಾಗಿದೆ.

ಭಾರತದಲ್ಲಿ ಕೇಂದ್ರ ಸರಕಾರವು ಕಪ್ಪುಹಣ ನಿಯಂತ್ರಣಕ್ಕೆ ಕಠಿಣ ಕ್ರಮ ಜರುಗಿಸಿದ ನಂತರ ಸ್ವಿಸ್‌ ಬ್ಯಾಂಕ್‌ಗಳಲ್ಲಿ ಕಪ್ಪು ಹಣದ ಪ್ರಮಾಣ ಕುಸಿದಿತ್ತು. ಆದರೆ ಕಳೆದ ವರ್ಷ ಶೇ.50ರಷ್ಟು ಹೆಚ್ಚಳವಾಗಿದೆ. 2016ರಲ್ಲಿ ಸ್ವಿಸ್‌ ಬ್ಯಾಂಕ್‌ಗಳಲ್ಲಿ ಭಾರತೀಯರ ಹಣ ಶೇ.45 ಕಡಿಮೆಯಾಗಿತ್ತು. (4,500 ಕೋಟಿ ರೂ.) 2006ರಲ್ಲಿ ಭಾರತೀಯರು 23,000 ಕೋಟಿ ರೂ. ಹಣವನ್ನು ಸ್ವಿಸ್‌ ಬ್ಯಾಂಕ್‌ ಖಾತೆಗಳಲ್ಲಿ ಹೊಂದಿದ್ದರು.

ಈಗಾಗಲೇ ಸ್ವಿಜರ್ಲೆಂಡ್‌ ಭಾರತ ಹಾಗೂ ಇತರ ದೇಶಗಳಿಗೆ, ಕಾಳ ಧನಿಕರ ವಿವರಗಳನ್ನು ನೀಡಲು ಆರಂಭಿಸಿದ್ದು, ಭಾರತಕ್ಕೆ ಮತ್ತಷ್ಟು ಸಹಕಾರ ನೀಡುವ ಭರವಸೆ ಕೊಟ್ಟಿದೆ.