ಹೊಸದಿಲ್ಲಿ: ಡೆಬಿಟ್‌ ಕಾರ್ಡ್‌, ಕ್ರೆಡಿಟ್‌ ಕಾರ್ಡ್‌, ಭೀಮ್‌ ಯುಪಿಐ ಅಥವಾ ಆಧಾರ್‌ ಆಧಾರಿತ ಹಣಕಾಸು ವರ್ಗಾವಣೆಗಳನ್ನು ಉತ್ತೇಜಿಸುವ ಉದ್ದೇಶದಿಂದ ಸರಕಾರ, 2000 ರೂ. ತನಕದ ಹಣ ವರ್ಗಾವಣೆಗಳಲ್ಲಿ ಎಂಡಿಆರ್‌ ಶುಲ್ಕವನ್ನು (ಮರ್ಚೆಂಟ್‌ ಡಿಸ್ಕೌಂಟ್‌ ರೇಟ್‌) ತಾನೇ ಭರಿಸಲಿದೆ.
ಮಾಹಿತಿ ತಂತ್ರಜ್ಞಾನ ಸಚಿವ ರವಿ ಶಂಕರ್‌ ಪ್ರಸಾದ್‌ ಅವರು ಈ ವಿಷಯವನ್ನು ತಿಳಿಸಿದ್ದಾರೆ. 2018ರ ಜನವರಿ 1ರಿಂದ ಎರಡು ವರ್ಷಗಳ ತನಕ ಸರಕಶಾರವೇ ಈ ಎಂಡಿಆರ್‌ ಶುಲ್ಕವನ್ನು ಭರಿಸಲಿದ್ದು, ಬ್ಯಾಂಕ್‌ಗಳಿಗೆ ಮರು ಪಾವತಿಸಲಿದೆ. ಇದರಿಂದ ಸರಕಾರದ ಬೊಕ್ಕಸಕ್ಕೆ 2,512 ಕೋಟಿ ರೂ. ಹೊರೆಯಾಗುವ ಅಂದಾಜಿದೆ.
ಈ ಡಿಜಿಟಲ್‌ ವರ್ಗಾವಣೆಗಳಲ್ಲಿ 2,000 ರೂ.ಗಿಂತ ಕೆಳಗಿನ ವರ್ಗಾವಣೆಗಳಿಗೆ ಸಂಬಂಧಿಸಿ ಗ್ರಾಹಕ ಅಥವಾ ವ್ಯಾಪಾರಿಗಳು ಎಂಡಿಆರ್‌ ರೂಪದಲ್ಲಿ ಯಾವುದೇ ಹೆಚ್ಚುವರಿ ಶುಲ್ಕವನ್ನು ನೀಡಬೇಕಾಗಿರುವುದಿಲ್ಲ ಎಂದು ಸಚಿವರು ತಿಳಿಸಿದರು. ಈಗ ಎಂಡಿಆರ್‌ ದರವನ್ನು ವ್ಯಾಪಾರಿಗಳು ಬ್ಯಾಂಕಿಗೆ ನೀಡಬೇಕಾಗಿರುತ್ತದೆ.