ಮುಕೇಶ್‌ ಅಂಬಾನಿ, ಸುನಿಲ್‌ ಮಿತ್ತಲ್‌ಗೆ ಹುದ್ದೆ ನಷ್ಟ?

ಹೊಸದಿಲ್ಲಿ: ಮುಂಬರುವ 2021ರಿಂದ ರಿಲಯನ್ಸ್‌ ಇಂಡಸ್ಟ್ರೀಸ್‌ ಮುಖ್ಯಸ್ಥ ಮುಕೇಶ್‌ ಅಂಬಾನಿ, ಭಾರ್ತಿ ಏರ್‌ಟೆಲ್‌ ಮುಖ್ಯಸ್ಥ ಸುನಿಲ್‌ ಭಾರ್ತಿ ಮಿತ್ತಲ್‌ ಮುಂತಾದವರು ತಮ್ಮ ಕನಿಷ್ಠ ಒಂದು ಹುದ್ದೆಯನ್ನು ಕಳೆದುಕೊಳ್ಳಲಿದ್ದಾರೆ!

ಹೇಗೆ ಎನ್ನುತ್ತೀರಾ? ಮಾರುಕಟ್ಟೆ ನಿಯಂತ್ರಕ ಸೆಬಿಯ ನಿಯಮಾವಳಿಗಳ ಪ್ರಕಾರ, 2020ರ ಏಪ್ರಿಲ್‌ 1ರೊಳಗೆ ರಿಲಯನ್ಸ್‌, ಟಿಸಿಎಸ್‌, ಏರ್‌ಟೆಲ್‌ ಇತ್ಯಾದಿ 291 ಕಂಪನಿಗಳು ತಮ್ಮ ಮಂಡಳಿಗೆ ಕಾರ್ಯಕಾರಿಯೇತರ ಅಧ್ಯಕ್ಷರನ್ನು ನೇಮಕ ಮಾಡಿಕೊಳ್ಳಬೇಕು. ಹೀಗಾಗಿ ಇಂಥ ಕಂಪನಿಗಳು ತಮ್ಮ ಅಧ್ಯಕ್ಷ ಮತ್ತು ವ್ಯವಸ್ಥಾಪಕ ನಿರ್ದೇಶಕ (ಎಂ.ಡಿ) ಹುದ್ದೆಗಳನ್ನು ವಿಭಜಿಸಬೇಕಾಗುತ್ತದೆ. ಸದ್ಯಕ್ಕೆ ಅಂಬಾನಿ, ಮಿತ್ತಲ್‌ ಮುಂತಾದವರು ಅಧ್ಯಕ್ಷ ಹಾಗೂ ವ್ಯವಸ್ಥಾಪಕ ನಿರ್ದೇಶಕ ಎರಡೂ ಹುದ್ದೆಗಳನ್ನು ತಾವೇ ಹೊಂದಿದ್ದಾರೆ.

ಸೆಬಿ ನಿಯುಕ್ತಿ ಮಾಡಿದ್ದ ಕೋಟಕ್‌ ಸಮಿತಿಯ ಶಿಫಾರಸಿನ ಮೇರೆಗೆ ಸೆಬಿ ಈ ಕ್ರಮ ತೆಗೆದುಕೊಂಡಿದೆ. ಕಾರ್ಪೊರೇಟ್‌ ಆಡಳಿತದ ಸುಧಾರಣೆಯ ಯತ್ನಗಳಲ್ಲಿ ಇದೂ ಒಂದಾಗಿದೆ.