ಸಾಲ ಹಗರಣ: 6 ತಿಂಗಳಲ್ಲಿ 15 ಮಂದಿ ಸಾವು

ಚೆನ್ನೈ : ತಮಿಳುನಾಡಿನಲ್ಲಿ 60 ಕೋಟಿ ರೂ.ಗಳ ಎಸ್‌ಬಿಐ ಸಾಲ ಹಗರಣ ಬಯಲಾಗಿದ್ದು, ಇಬ್ಬರನ್ನು ಬಂಧಿಸಲಾಗಿದೆ.

ಪ್ರಕರಣಕ್ಕೆ ಸಂಬಂಧಿಸಿದಂತೆ ವಿರುಧುನಗರ್‌ ಮತ್ತು ಥೇನಿ ಜಿಲ್ಲೆಗಳಿಗೆ ಸೇರಿದ ಕನಿಷ್ಠ 15 ಮಂದಿ ಸಾಲಗಾರರು 6 ತಿಂಗಳಿನಲ್ಲಿ ಸಂಶಯಾಸ್ಪದವಾಗಿ ಸಾವಿಗೀಡಾಗಿದ್ದಾರೆ. ಈ ರೀತಿ ಸಾವಿಗೀಡಾದವರು ರೈತರು, ದಿನಗೂಲಿ ಕಾರ್ಮಿಕರಾಗಿದ್ದು ಅವರ ಹೆಸರಿನಲ್ಲಿ ಸಾಲ ಪಡೆಯಲಾಗಿತ್ತು. ಅಲ್ಲದೇ ಪ್ರಕರಣದ ಇನ್ನೊಬ್ಬ ಆರೋಪಿ ನಾಪತ್ತೆಯಾಗಿದ್ದಾನೆ.

ಪ್ರಕರಣ ಇಷ್ಟೊಂದು ಗಂಭೀರವಾಗಿದ್ದರೂ ಸಾವುಗಳ ಬಗ್ಗೆ ಯಾವುದೇ ತನಿಖೆ ಆರಂಭಗೊಂಡಿಲ್ಲ. 2017ರ ಅಕ್ಟೋಬರ್‌ನಲ್ಲಿ ಹಗರಣ ನಡೆದಿದೆ. ಈ ಸಂಬಂಧ 169 ದೂರುಗಳು ದಾಖಲಾಗಿವೆ. 169 ರೈತರಿಗೆ 25 ಲಕ್ಷದಿಂದ 40 ಲಕ್ಷ ರೂ. ಒಳಗಿನ ಮಾರುಕಟ್ಟೆ-ಉತ್ಪನ್ನದ ಸಾಲಗಳನನ್ನು ನೀಡಲಾಗಿದೆ. ಇವರಲ್ಲಿ ಬಹುತೇಕರು ದಿನಗೂಲಿ ಕಾರ್ಮಿಕರಾಗಿದ್ದಾರೆ. ಸರಕಾರದ ಪಿಂಚಣಿ ಕೊಡಿಸುವುದಾಗಿ ಸಹಿ ಪಡೆದು ಒ.ಎಂ.ಎಸ್‌ ವೇಲುಮುರುಗನ್‌ ಮತ್ತು ಅವರ ಸೋದರಳಿಯ ಆರ್‌.ಶಂಬಗನ್‌ ವಂಚಿಸಿದ್ದಾರೆ ಎನ್ನಲಾಗಿದೆ. ಸಾಲ ವಸೂಲಿಗೆ ನೋಟಿಸ್‌ಗಳು ಬಂದ ಕಾರಣ, ವಾಸ್ತವ ಸಂಗತಿ ರೈತರಿಗೆ ಅರಿವಾಗಿದೆ.