200, 500, 2000 ರೂ. ನೋಟುಗಳಿಗೆ ನೇಪಾಳ ನಿರ್ಬಂಧ

ಕಾಠ್ಮಂಡು: ನೇಪಾಳದಲ್ಲಿ ಈ ತನಕ ಚಲಾವಣೆಯಲ್ಲಿದ್ದ ಭಾರತದ 200, 500 ಮತ್ತು 2,000 ರೂ. ಮುಖಬೆಲೆಯ ನೋಟುಗಳ ಮಾನ್ಯತೆಯನ್ನು ಅಲ್ಲಿನ ಸರಕಾರ ರದ್ದುಗೊಳಿಸಿದೆ. ಇನ್ನು ಮುಂದೆ ಭಾರತದ 100 ರೂ. ಮುಖಬೆಲೆಯ ನೋಟುಗಳಿಗಷ್ಟೇ ನೇಪಾಳದಲ್ಲಿ ಮಾನ್ಯತೆ ನೀಡುವುದಾಗಿ ಸರಕಾರ ಹೇಳಿದೆ. ಈ ಪರಿಣಾಮ ನೇಪಾಳಕ್ಕೆ ತೆರಳುವ ಭಾರತೀಯ ಪ್ರವಾಸಿಗಳಿಗೆ ಮತ್ತು ಭಾರತದಲ್ಲಿ ಕೆಲಸ ಮಾಡುವ ನೇಪಾಳದ ಕಾರ್ಮಿಕ ವರ್ಗಕ್ಕೆ ತೊಡಕಾಗಲಿದೆ.

'ಹಿಮಾಲಯನ್‌ ನೇಷನ್‌' ಎಂದು ಗುರ್ತಿಸಲಾಗುವ ನೇಪಾಳದಲ್ಲಿ ಭಾರತದ ಕರೆನ್ಸಿಗಳನ್ನು ಹೆಚ್ಚಿನ ಪ್ರಮಾಣದಲ್ಲಿ ಅಲ್ಲಿನ ನಿವಾಸಿಗಳು ಮತ್ತು ವ್ಯಾಪಾರಿಗಳು ಬಳಸುತ್ತಾರೆ. ಉಳಿತಾಯ ಅಥವಾ ವಹಿವಾಟುಗಳಿಗೆ ಭಾರತದ ಕರೆನ್ಸಿ ಬಳಕೆಯಲ್ಲಿದೆ. ನೂರು ರೂ. ಮುಖಬೆಲೆಗಿಂತಲೂ ಹೆಚ್ಚಿನ ಮೌಲ್ಯದ ಕರೆನ್ಸಿಗಳನ್ನು ನಿಷೇಧಿಸಿದ್ದು, ಅವುಗಳ ಬಳಕೆ ಇನ್ನು ಮುಂದೆ ಕಾನೂನುಬಾಹೀರವಾಗಲಿವೆ. ತಮ್ಮಲ್ಲಿರುವ 200, 500 ಮತ್ತು 2,000 ರೂ. ಮುಖಬೆಲೆಯ ಕರೆನ್ಸಿಗಳನ್ನು ಬದಲಿಸಿಕೊಳ್ಳಿ ಎಂದು ನಾಗರಿಕರಿಗೆ ನೇಪಾಳದ ಸಚಿವ ಪ್ರಸಾದ್‌ ಬಾಸ್ಕೋಟಾ ಸೂಚಿಸಿದ್ದಾರೆ.

ಕಾಳಧನ ನಿಗ್ರಹಿಸುವ ನಿಟ್ಟಿನಲ್ಲಿ 2016ರಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು 1,000 ಹಾಗೂ 500 ಮುಖಬೆಲೆಯ ನೋಟುಗಳನ್ನು ನಿಷೇಧಿಸಿದ್ದರು. ಇದರಿಂದಾಗಿ ಭಾರತೀಯ ಕರೆನ್ಸಿಗಳನ್ನು ಬಳಸುತ್ತಿದ್ದ ನೇಪಾಳ, ಭೂತಾನ್‌ನಂಥ ದೇಶಗಳಿಗೆ ಅನಾನುಕೂಲವಾಗಿತ್ತು. ಭಾರತದ ನೋಟು ಅಮಾನ್ಯತೆಯಿಂದಾಗಿ ನೇಪಾಳ ಪ್ರಜೆಗಳಿಗೆ ಅನಾನುಕೂಲವಾಗಿದೆ. ಈ ಬಗ್ಗೆ ಭಾರತೀಯ ನಾಯಕರ ಜೊತೆ ಚರ್ಚಿಸುತ್ತೇವೆ ಎಂದು ನೇಪಾಳ ಪ್ರಧಾನಿ ಕೆ.ಪಿ.ಶರ್ಮಾ ಓಲಿ ಅಂದು ಹೇಳಿದ್ದರು.