ವಿದೇಶಿ ದೇಣಿಗೆ ಪಡೆಯಲು ಎನ್‌ಜಿಒಗಳಿಗೆ ಎಸ್‌ಬಿಐ ಖಾತೆ ಕಡ್ಡಾಯ

ಹೊಸದಿಲ್ಲಿ: ಗೃಹ ಸಚಿವಾಲಯವು ದೇಶದಲ್ಲಿನ ಎಲ್ಲ ಸರಕಾರೇತರ ಸಂಸ್ಥೆಗಳು (ಎನ್‌ಜಿಒ) ವಿದೇಶಿ ದೇಣಿಗೆಯನ್ನು ಸ್ವೀಕರಿಸಲು ಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾದ ದಿಲ್ಲಿಯ ಶಾಖೆಯಲ್ಲಿ 2021ರ ಮಾರ್ಚ್‌ 31ರೊಳಗೆ ಖಾತೆ ತೆರೆಯಬೇಕೆಂದು ಸೂಚಿಸಿದೆ.

ಎಫ್‌ಸಿಆರ್‌ಎ (ವಿದೇಶಿ ದೇಣಿಗೆ ನಿಯಂತ್ರಣ ಕಾಯಿದೆ) ಅಡಿಯಲ್ಲಿ ಯಾವುದೇ ಎನ್‌ಜಿಒಗಳು ಇತರ ಬ್ಯಾಂಕ್‌ ಖಾತೆಯ ಮೂಲಕ ವಿದೇಶಿ ದೇಣಿಗೆಯನ್ನು ಸ್ವೀಕರಿಸುವಂತಿಲ್ಲ. ಎಫ್‌ಸಿಆರ್‌ಎ ಬ್ಯಾಂಕ್‌ ಖಾತೆ ತೆರೆಯುವ ಪ್ರಕ್ರಿಯೆ ಬಗ್ಗೆ ಗೃಹ ಸಚಿವಾಲಯವು ಮಂಗಳವಾರ ಮಾರ್ಗದರ್ಶಿಯನ್ನು ಪ್ರಕಟಿಸಿದೆ.

ಎಸ್‌ಬಿಐನ ‘ಹೊಸದಿಲ್ಲಿ ಪ್ರಧಾನ ಶಾಖೆ, ( ಎನ್‌ಡಿಎಂಬಿ), 11 ಸಂಸದ್‌ ಮಾರ್ಗ್‌ ಹೊಸದಿಲ್ಲಿ-110001’ ವಿಳಾಸದ ಶಾಖೆಯಲ್ಲಿಯೇ ಎಫ್‌ಸಿಆರ್‌ಎ ಬ್ಯಾಂಕ್‌ ಖಾತೆಯನ್ನು ತೆರೆಯಬೇಕು. ಎನ್‌ಜಿಒಗಳ ವಿದೇಶಿ ದೇಣಿಗೆ ಸ್ವೀಕೃತಿಯನ್ನು ಪಾರದರ್ಶಕಗೊಳಿಸಲು, ಅವ್ಯವಹಾರ ನಡೆಯದಂತೆ ತಡೆಯಲು ಈ ನಿಯಂತ್ರಕ ಕ್ರಮವನ್ನು ಅಳವಡಿಸಲಾಗುತ್ತಿದೆ ಎಂದು ಸರಕಾರ ತಿಳಿಸಿದೆ. ಈ ಸಂಬಂಧ ಕಾಯಿದೆಗೂ ತಿದ್ದುಪಡಿ ತರಲಾಗಿತ್ತು.

ಅಮ್ನೆಸ್ಟಿ ಮೂಲ ಸಂಸ್ಥೆ ವಿರುದ್ಧ ತನಿಖೆ ಇಲ್ಲ: ಸರಕಾರದ ಸ್ಪಷ್ಟನೆ
ಆದರೆ ಇದರಿಂದ ಸಣ್ಣ ಸಣ್ಣ ಸರಕಾರೇತರ ಸಂಸ್ಥೆಗಳಿಗೆ ಹೆಚ್ಚಿನ ತೊಂದರೆಯಾಗಲಿದೆ ಎಂಬ ಆಕ್ಷೇಪ ಕೂಡ ಕೇಳಿ ಬಂದಿದೆ.